ރެޑްކްރެސެންޓުގެ ޚިދުމަތަތްތައް ފުޅާ ކުރުމަށް މާލީ އެހީތެރިކަމެއް ބޭނުންވާ ކަމަަށް
ރެޑްކްރެސެންޓްގެ އަމީން އާއްމު އައިޝަތު ނޫރާ
މޯލްޑިވިއަން ރެޑް ކްރެސެންޓުގެ ހިންގުން ހަރުދަނާކޮށް، ދެމުންދާ ޚިދްމަތްތައް ފުޅާކުރުމަށް ގާތްގަނޑަކަށް 8 މިލިއަން ރުފިޔާގެ އަހަރީ ބަޖެޓެއް ބޭނުންވާކަމަށް އެ ޖަމާޢަތުން ބުނެފިއެވެ.
މިއަދުގެ ރައްޔިތުންގެ މަޖިލިީހުގެ އިޖްތިމާޢީ ކޮމެޓީއަށް ހާޒިރުވެ، ރެޑްކްރެސެންޓްގެ އަމީން ޢާއްމު އައިޝަތު ނޫރާ ވިދާޅުވީ ދިވެހި ރެޑްކްރެސެންޓުގެ ޚިދުމަތްތައް ފުޅާ ކޮށް، ލާމަރުކަޒުކޮށް ޚިދުމަތްތައް ފޯރުކޮށްދިނުމަށްޓަކައި ސަރުކާރުގެ ފަރާތުން ކޮންމެވެސް މިންވަރެއްގެ މާލީ އެހީތެރިކަމެއް ބޭނުންވާ ކަމަށެވެ. ދިވެހިރާއްޖެއަކީ ރެޑް ކްރެސެންޓް ފަދަ ޖަމާޢަތްތަކަށް މާލީ ގޮތުން އެހީތެރިވެވޭވަރުގެ ފުދުންތެރި ޤައުމެއްކަން ހުރިހާ ފަރާތްތަކުންވެސް ޤަބޫލު ކުރާކަން ފާހަގަކުރައްވާ، ނޫރާވަނީ ގާތްގަނޑަކަށް 8 މިލިއަން ރުފިޔާގެ އަހަރީ ބަޖެޓެއް ދިނުމަށް އިލްތިމާސްކުރައްވާފައެވެ.
މި ބައްދަލުވުމުގައި ރެޑްކްރެސެންޓުގެ ފަރާތުންވަނީ އެހެން ޤައުމުތަކުން އެ ޤައުމުތަކުގެ ރެޑްކްރޮސް ނުވަތަ ރެޑްކްރެސެންޓް ފަދަ ޖަމާޢަތްތަކަށް އެހީތެރިވާ ގޮތްތައް މިސާލާއެކު ކޮމެޓީއަށް ހުށަހަޅާފައެވެ.
ރެޑްކްރެސެންޓްގެ އަމީން ޢާންމު ވިދާޅުވީ ދަރުމަވެރިންނަށް ބޭނުންވާ ތަމްރީނުދިނުމާއި އިދާރީ ކަންތައް ހިންގުމަށްޓަކައި ވެސް މާލީ ގޮތުން އެހީތެރިކަން ބޭނުންވާ ކަމަށެވެ. ރާއްޖޭގެ ހުރިހާ އަތޮޅެއްގައިވެސް ރެޑްކްރެސެންޓްގެ ގޮތްޕެއް ޤާއިމުކޮށް، އެ އަތޮޅެއްގައި ތިބޭ ދަރުމަވެރިންނަށް ބަރޯސާ ވެވޭގޮތަކަށް އޮތުމުގެ މުހިއްމުކަން ނޫރާ ފާހަގަކުރެއްވިއެވެ. ބައިނަލްއަޤުވާމީ އެހީގައި ފަންނީ އެހީއާއި އިންސާނީ ވަޞީލަތްތައް ތަރައްޤީކުރިނަމަވެސް، ޤައުމީ ފެންވަރެއްގައި ރެޑްކްރެސެންޓުގެ ޚިދްމަތް ފޯރުކޮށްދިނުމަށް ބޭނުންވާ މައި ޚަރަދުތައް ކަވަރުކުރަން ބޭނުންވާކަމަށެވެ.
މިއަދު ކޮމެޓީ ބައްދަލުވުމުގައި ދިވެހި ރެޑްކްރެސެންޓަށް ދިމާވާ ގޮންޖެހުންތައް ޙިއްސާ ކޮށްފައިވާއިރު ކޮމެޓީއަށް ހާޒިރުވި ހުރިހާ މެމްބަރުންވެސް ވަނީ ދިވެހި ރެޑްކްރެސެންޓުން ޤައުމަށް ކޮށްދޭ އަގުހުރި މަސައްކަތް ފާހަގަ ކުރައްވާ، އެ ކަމަށް ޝުކުރު އަދާ ކުރައްވާފައެވެ.
