ސަރުކާރު ބައެއް މުވައްޒަފުންގެ އެޓިޓިއުޑް މައްސަލަ ހައްލު ކުރުމަށް މަސައްކަތް ކުރަން: އަސްލަމް

ސަރުކާރު ބައެއް މުވައްޒަފުންގެ އެޓިޓިއުޑްގެ މައްސަލަ ހުންނަ ކަމަށް ގަބޫލު ކުރައްވާ ކަމަށާއި، އެކަންތައްތައް ހައްލު ކުރުމަށް މަސައްކަތް ކުރައްވަމުން ގެންދަވާ ކަމަށް މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ ކޮންޓްރެކްޓަރުންނަށް ދިމާވާ ބައެއް ދަތިތަކާއި ގުޅިގެން، "ކޮންސްޓްރަކްޝަން އިންޑަސްޓްރީ ޗެލެންޖެސް އެންޑް ޕޮސިބްލް ސޮލިއުޝަންސް" ނުވަތަ ދިވެހިރާއްޖޭގެ އިމާރާތްކުރުމުގެ ދާއިރާގައި ހުރި ގޮންޖެހުންތައް ހައްލުކުރެވޭނެ ގޮތްތައް ދެނެގަތުމަށް ބޭއްވި ކޮންފަރެންސްގައި ވާހަކަދައްކަވަމުންނެވެ.

Advertisement

މިނިސްޓަރ ވިދާޅުވީ ކޮންޓްރެކްޓަރުންގެ މަސައްކަތްތައް ކުރިއަށް ގެންދިއުމަށް، ވަކިން ޚާއްސަކޮށް ސަރުކާރުގެ ކޮންޓްރެކްޓްތަކުގައި މަސައްކަތް ކުރާ ފަރާތްތަކަށް ވަރަށް ގިނަ ގޮންޖެހުންތައް ކުރިމަތިވާކަމަށް ޤަބޫލުކުރައްވާ ކަމަށެވެ. އެގޮތުން ލިބެންޖެހޭ ޕޭމަންޓްތަށް ލަސްވާ މައްސަލަ މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ ސަރުކާރު ބައެއް މުވައްޒަފުންގެ ވިސްނުން ހުންނަނީ ބޭނުން އިރަކު އެކަމެއް ކޮށް ނިންމާ ގޮތަށް ކަމަށެވެ. އެގޮތުން ގިނަ ފަހަރަށް އެ މަސައްކަތެއް ނިންމަނީ މުއްދަތު ހަމަވާފަހުންކަން މިނިސްޓަރ ފާހަގަކުރެއްވިއެވެ.

އަސްލަމް ވިދާޅުވީ އެ އެޓިޓިއުޑް ބަދަލު ކުރެވޭތޯ މަސައްކަތް ކުރަމުން ގެންދަވާ ކަމަށެވެ. އަދި އެ ޒާތުގެ މައްސަލަތައް ހައްލު ކުރުމަށް އަބަދުވެސް މަސައްކަތް ކުރައްވަމުން ގެންދަވާ ކަމަށެވެ. ނަމަވެސް އަދި ދާން ބޭނުންވާ އަމާޒަކަށް ނުދެވޭ ކަމަށް ވެސް ވިދާޅުވިއެވެ.

ކޮންފަރެންސްގައި އިތުރަށް ވާހަކަދައްކަވަމުން މިނިސްޓަރ ވިދާޅުވީ ކޮންފަރެންސްގެ ސަބަބުން އެދެވޭ ހައްލެއް ލިބިގެންދާނެ ކަމަށެވެ.

ކޮންސްޓްރަކްޝަން އިންޑަސްޓްރީ ޗެލެންޖެސް އެންޑް ޕޮސިބްލް ސޮލިއުޝަންސްގެ ފުރަތަމަ ދެ އެޑިޝަން ބޭއްވިގެން ދިޔައީ ސެމިނަރ އެއްގެ ނަމުގައެވެ. އެގޮތުން ފުރަތަމަ އެޑިޝަން 2007 ވަނަ އަހަރު ބޭއްވުނު އިރު ދެވަނަ އެޑިޝަން އެއް ބާއްވާފައިވަނީ 2018 ވަނަ އަހަރެވެ. ތިން ވަނަ އެޑިޝަން އިން ފެށިގެން ކޮންފަރެންސްއެއްގެ ގޮތުގައި ގެންދަން ގަސްދުކުރަނީ ފުޅާ ދާއިރާއެއްގައި މަޝްވަރާ ކުރުމުގެ ފުރުސަތު ބައިވެރިވާ ފަރާތްތަކަށް ދިނުމުގެ ބޭނުމުގައެވެ.