ބަޖެޓް 2020: އިޖުތިމާޢީ ރައްކާތެރިކަމަށް 3 ބިލިއަން ރުފިޔާ
އަސާސީ ބޭނުންތައް ފުއްދުމުގެ ތަނަވަސްކަން ނެތް ފަރުދުންނަށް އެހީވުމަށް 525.4 މިލިއަން ރުފިޔާ
އާސަންދަ އޮފީސް
އަންނަ އަހަރަށް ލަފާކުރާ ދައުލަތުގެ ބަޖެޓްގައި އިޖުތިމާޢީ ރައްކާތެރިކަމަށް 3991 މިލިއަން ރުފިޔާ ހިމަނައިފި އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ ރައްޔިތުންނަށް އިޖުތިމާޢީ ރައްކާތެރިކަން ކަށަވަރުކޮށްދިނުމުގެ ގޮތުން ސަރުކާރުން ފޯރުކޮށްދޭ އެހީތައް ދިނުމުގައި ހަމަހަމަ އުސޫލެއް ގާއިމުކުރުމަށް ބަޖެޓްގައި އިސްކަންދީފައިވާނެ ކަމަށެވެ.
އެގޮތުން އަސާސީ ބޭނުންތައް ފުއްދުމުގެ ތަނަވަސްކަން ނެތް ފަރުދުންނަށް އެހީވުމަށް ބަޖެޓްގައި 525.4 މިލިއަން ރުފިޔާ ކަނޑައެޅިފައިވާނެ ކަމަށް މިނިސްޓަރ ވިދާޅުވި އެވެ. އަދި އާސަންދަ ސްކީމަށް 950.8 މިލިއަން ރުފިޔާ ބަޖެޓްކުރެވިފައިވާ ކަމަށް މިނިސްޓަރ ވިދާޅުވި އެވެ.
އަންނަ އަހަރުގެ ބަޖެޓްގައި ކުޑަކުދިންނާއި ގުޅޭ ޚިދުމަތްތަކަށް ދިނުމަށް ބޭނުންވާ ފެސިލިޓީ ގާއިމުކުރުމަށް 37 މިލިއަން ރުފިޔާ ހިމަނާފައިވާއިރު ދުވަސްވީ މީހުންގެ މަރުކަޒެއް ހުޅުމާލެ އާއި ލ އަތޮޅުގައި ގާއިމުކުރުމަށް 14 މިލިއަން ރުފިޔާ ވަނީ ކަނޑައަޅާފަ އެވެ. އަދި އަންހެނުންނަށް ފަރުވާދޭ ރެސިޑެންޝަލް ފެސިލިޓީއެއް ގާއިމުކުރުމަށް 7 މިލިއަން ރުފިޔާ ވަނީ ބަޖެޓްގައި ހިމަނާފަ އެވެ.
މީގެއިތުރުން ކަރަންޓުގެ އަގު ހެޔޮ ކުރުމަށް 350 މިލިއަން ރުފިޔާ ދިނުމަށް ބަޖެޓްގައި ހިމަނާފައިވާއިރު ކާބޯތަކެތި އަގު ހެޔޮކުރުމުގެ ގޮތުން ދޭ ފައިސާގެ ގޮތުގައި 254 މިލިއަން ރުފިޔާ ވަނީ ބަޖެޓްގައި ހިމަނާފަ އެވެ. ތަކެތި ނުވަތަ ޚިދުމަތުގެ އަގު ހެޔޮ ކުރުމަށް 445 މިލިއަން ރުފިޔާ ދިނުމަށް ބަޖެޓްގައި ހިމަނާފައިވާއިރު ޚާއްސަ އެހީއަށް ބޭނުންވާ ފަރާތްތަކަށް ދިނުމަށް 216 މިލިއަން ރުފިޔާ ވަނީ ބަޖެޓް ގައި ހިމަނާފަ އެވެ. އަދި އެކަނިވެރި މައިން ނުވަތަ ބަފައިންނަށް ދިނުމަށް 53 މިލިއަން ރުފިޔާ ވަނީ ބަޖެޓްގައި ކަނޑައަޅާފަ އެވެ.
މިހިނގާ 2019 ވަނަ އަހަރު އިޖުތިމާޢީ ރައްކާތެރިކަމަށް ކަނޑައަޅާފައިވަނީ 3824 މިލިއަން ރުފިޔާ އެވެ.
