މާދަމާ ބާއްވަން ހަމަޖެއްސި ފަނޑިޔާރު އާދަމް މުޙައްމަދު ޢަބުދުﷲގެ ތަހުޤީޤް އަޑުއެހުން ފަސްކޮށްފި
ތަހުގީގު ފަސްކޮށްފައިވަނީ ރަސްމީ ދަތުރުފުޅެއްގައި ފަނޑިޔާރު ފުރާވަޑައިގަންނަވާތީ
ފަނޑިޔާރު އާދަމް މުހައްމަދު އަބުދުﷲ
މާދަމާ ބާއްވަން ކުރިން ނިންމާފައި އޮތް ފަނޑިޔާރު އާދަމް މުޙައްމަދު ޢަބުދުﷲގެ ތަހުޤީޤް އަޑުއެހުން ފަސްކޮށްފިއެވެ.
ފަނޑިޔާރު އާދަމް މުޙައްމަދުގެ ސުލޫކީ މައްސަލައިގެ ތަހުޤީޤުގެ ދެ ވަނަ އަޑުއެހުން ފެށުމާއެކު ފަނޑިޔާރު ވަކީލަކު އައްޔަން ނުކުރެވޭކަމަށް ވިދާޅުވެ ޝަކުވާތައް ފައްޓެވުމާއި ގުޅިގެން، ވަކީލަކު އައްޔަނުކުރުމަށް ފަނޑިޔާރަށް ފަހު ފުރުސަތު އަރުވައި 4 ވަނަ ދުވަހުގެ 10:30 މުއްދަތެއް ދީފައެވެ. ޖޭއެސްސީން ބުނެފައިވަނީ ތަޙުޤީޤު އަޑުއެހުން ފަސްކުރެވިފައިވަނީ ފަނޑިޔާރު އާދަމް މުޙައްމަދު ޢަބުދުﷲ ދަތުރުފުޅެއްގައި ފުރާވަޑައިގަތުމަށް ހަމަޖެހިފައި ވާތީކަމަށާއި އެނބުރި ވަޑައިގެންނެވުމުން ކުރިއަށް ގެންދެވޭނެކަމަށެވެ.
ފަނޑިޔާރު އާދަމް މުޙައްމަދުގެ ޤާނޫނީ ވަކީލުންގެ ގޮތުގައި ހަމަޖައްސާފައިވާ، ޑރ. މުޙައްމަދު ޖަމީލު އަޙްމަދާއި ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ދަށުން ހިނގަމުންދިޔަ ޖުޑީޝަލް އެކަޑަމީގެ ކުރީގެ ޗާންސެލަރ އަޙްމަދު މާޖިދެވެ.
ޖޭއެސްސީގެ ތަހުޤީޤު ކޮމެޓީގެ ބުދަ ދުވަހުގެ ބައްދަލުވުމުގައި، ފަނޑިޔާރު އާދަމް މުޙައްމަދުގެ ޤާނޫނީ ވަކީލަކަށް ޖަމީލު ބަލައި ނުގަންނަން ވަނީ ނިންމާފަ އެވެ. ސަބަބެއް ކަމަށް ވަނީ، ސުޕްރީމް ކޯޓުގައި މިހާރު ހިނގަމުންދާ ދުސްތޫރީ މައްސަލައެއްގެ އެއް ޙަސްމަށް ޖަމީލު ވެވަޑައިގަންނަވާތީ އެވެ. އެ މައްސަލަ ބައްލަވާ ފަނޑިޔާރުންގެ ބެންޗުގައި ފަނޑިޔާރު އާދަމް މުޙައްމަދު ހިމެނިވަޑައިގަންނަވާތީ، އެއީ ފަނޑިޔާރުގެ ސުލޫކީ މިންގަޑާ ޚިލާފުކަމެއް ކަމަށެވެ. އަދި ވަކި ސުލޫކީ މައްސަލައެއްގެ ގޮތުގައި އެމައްސަލަ ޖޭއެސްސީއަށް ހުށަހެޅުމަށް ނިންމާފައިވާ ކަމަށްވެސް ތަހުޤީޤު ކޮމެޓީން ނިންމާފައި ވެއެވެ.
ދެވަނަ ޤާނޫނީ ވަކީލެއްގެ ގޮތުގައި ބުދަ ދުވަހުގެ އަޑުއެހުމަށް ވަޑައިގެންނެވި މާޖިދު ބުރާސްފަތި ދުވަހުގެ އަޑުއެހުމަށް ވަޑައިގަންނަވާފައެއް ނުވެއެވެ. އަދި އޭނާ ވަޑައިނުގެންނެވި ސަބަބެއް ފަނޑިޔާރު އާދަމް މުޙައްމަދަށާއި، ޖޭއެސްސީއަށްވެސް އަންގަވާފައެއް ނުވެއެވެ.
ފަނޑިޔާރު ވިދާޅުވީ ވަކީލަކު ހޯދުމަށް ވަރަށް މަސައްކަތްކުރެއްވިކަމަށެވެ. ނަމަވެސް ވަކީލަކު ލިބިވަޑައިނުގެންނެވިކަމަށާއި، ވަކީލުން އެކަމަށް އުޒުރުވެރިވެވަޑައިގަންނަވާކަމަށެވެ. ސަބަބެއްކަމަށް ފަނޑިޔާރު އާދަމް މުޙައްމަދު ވިދާޅުވީ ދެން ވަޑައިގަންނަވާ ވަކީލަކުވެސް ބަލައި ނުގަތުމަށް ޖޭއެސްސީން ނިންމަފާނެތީ އާއި، އެ ވަކީލުގެ މައްސަލަ ބަރ ކައުންސިލަށް ފޮނުވާކަމުގެ ބިރު ވަކީލުންނަށް އޮތުމުންނެވެ.
ބުދަ ދުވަހު ޢާންމުކޮށް ހުޅުވާލައިގެން ބޭއްވި ތަހުޤީޤް ބައްދަލުވުމުގެ ރިޔާސަތު ބެލެހެއްޓެވީ ޖޭއެސްސިގެ ނައިބް ރައީސް މަސްތޫރު ހުސްނީ އެވެ.
