ކޯޓުތަކުގައި ހުރި މައްސަލަތައް ލަސްވާތީ ޓާސްކް ފޯހެއް ހަދަން މާދަމާ ވޯޓަށް އަހަނީ!
3 ނޮވެމްބަރު 2019 | އާދީއްތަ 10:251900 އަށްވުރެ ގިނަ މައްސަލަ ކްރިމިނަލް ކޯޓުގައި އެބައޮތް
ޖުޑީޝަރީ ކޮމެޓީގެ ބައްދަލުވުމެއްގެ ތެރެއިން--
ކޯޓުތަކަށް ހުށަހަޅާފައިވާ މައްސަލަތައް ނުނިމި ލަސްވާ ސަބަބު ދެނެގަތުމަށް ޓާސްކް ފޯހެއް އެކުލަވާލުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީން ޖުޑީޝަލް ސަރވިސް ކޮމިޝަނަށް (ޖޭއެސްސީ) އަށް ލަފާދިނުމަށް ނިންމާފައިވާ ނިންމުމަށް ހޯމަ ދުވަހު ބާއްވާ ރައްޔިތުންގެ މަޖިލީހުގެ ޖަލްސާގައި ވޯޓަށް އެހުމަށް އެޖެންޑާ ކޮށްފި އެވެ.
ރައްޔިތުން މަޖިލީހުގެ ހޯމަ ދުވަހުގެ ޖަލްސާގެ އެޖެންޑާގައިވާ ގޮތުން، ކްރިމިނަލް ކޯޓުގައި ނުނިމި ހުރި މައްސަލަތަކާގުޅޭ ރިޕޯޓު" އާގުޅޭ މައްސަލަ، ރައްޔިތުންގެ މަޖިލީހުގެ ޖުޑީޝިއަރީ ކޮމިޓީން ދިރާސާކުރައްވައި ނިންމެވިގޮތުގެ ރިޕޯޓު އިއްވުން ހިމެނެއެވެ.
އެރިޕޯޓް އިއްވުމާއެކު، އެރިޕޯޓަށް ބަހުޘް ކުރަން ބޭނުންވާ އަދި އިސްލާޙެއް ހުށަހެޅަން ބޭނުންވާނަމަ އެފުރުޞަތު މެމްބަރުންނަށް ލިބޭނެ އެވެ. އަދި އެރިޕޯޓަށް ބަހުޘްކުރުމަށް ހަމަ އެޖަލްސާގައި އެރިޕޯޓަށް ވޯޓަށް އެހޭނެއެވެ.
މަޖިލީހުގެ ޖުޑީޝަރީ ކޮމެޓީން ޓާސްކު ފޯހެއް ހެދުމަށް ޖޭއެސްސީއަށް ލަފާދިނުމަށް ނިންމާފައިވަނީ، ސަރުކާރާއި ރައްޔިތުންގެ މަޖިލީހާއި ގުޅިގެން ރާއްޖޭގެ ޝަރުއީ ދާއިރާ އިސްލާހުކުރުމަށް ހިންގާ ޕްރޮގުރާމުގެ ތެރެއިންނެވެ. އެގޮތުން ޖޭއެސްސީއަށް ބޮޑެތި ބަދަލުތަކެއް ގެނެސް، ޖޭއެސްސީ މެދުވެރިކޮށް، ވަނީ ކޯޓުތަކުގައި ހުރި މައްސަލަތަކާއި، ކޯޓުތަކުގައި ހުރި މައްސަލަތައް ނުނިމި ލަސްވަމުންދާ ސަބަބުތައް ދެނެގަތުމަށް ނިންމާފަ އެވެ.
އެގޮތުން ޖޭއެސްސީން ވަނީ ކްރިމިނަލް ކޯޓުގައި ހުރި މައްސަލަތައް ލަސްވާ ސަބަބު ދެނަގަނެ، ރައްޔިތުންގެ މަޖިލީހަށް ރިޕޯޓެއް ހުށަހަޅާފަ އެވެ. މަޖިލީހުގެ ޖުޑީޝަރީ ކޮމެޓީން އެރިޕޯޓް ދިރާސާ ކުރުމަށްފަހު ނިންމާފައި ވަނީ، ދައުލަތުގެ ކަމާބެހޭ މުއައްސަސާތައް ތަމްސީލުކުރާނޭ މީހުން ހިމަނައިގެން އިންޓަރ އެޖެންސީ ޓާސްކް ފޯހެއް އެކުލަވާލައި އެމައްސަލައަށް ހައްލެއް ގެނެވިދާނެ ކަމަށެވެ. އެހެންކަމުން އެފަދަ ޓާސްކް ފޯހެއް އެކުލަވާލުމަށް ޖޭއެސްސީއަށް ލަފާއެރުވުމަށް ކޮމިޓީއިން ވަނީ ފާސްކޮށްފަ އެވެ.
މައްސަލަ ދިރާސާކޮށް ނިންމި ރިޕޯޓުގައި ބުނެފައިވަނީ، އެ ޓާސްކް ފޯސްގެ މެންޑޭޓްތަކުގެ ތެރޭގައި، ކޯޓުތަކުގައި މައްސަލަތައް ނުބެލި ލަސްވަމުންދާ ސަބަބުތައް ހޯދައި، އެކަން ހައްލު ކުރުމަށް އެޅެންހުރި ފިޔަވަޅުތައް ފާހަގަކުރުން ކަމަށެވެ. އަދި އެ ފިޔަވަޅުތައް ތަންފީޒު ކުރުމަށް ކުރަންވީ ކަންކަން ހިމަނައި ރިޕޯޓެއް އެކުލާވަލުން ވެސް ހިމެނެ އެވެ.
ޖޭއެސްސީން މަޖިލީހަށް ފޮނުވި ރިޕޯޓުގައިވާގޮތުން، ކްރިމިނަލް ކޯޓުގައި ނުނިމި 1900 އަށްވުރެ ގިނަ މައްސަލަ އެބައޮތެވެ. އޭގެ ތެރޭގައި 10 އަހަރަށްވުރެ ގިނަ ދުވަސްވެފައިވާ 12 މައްސަލައަކާއި، ފަސް އަހަރަށްވުރެ ގިނަ ދުވަސްވެ 10 އަހަރު ހަމަނުވާ 12 މައްސަލައެއް ހިމެނެ އެވެ. މީގެއިތުރުން ވެސް ޖޭއެސްސީ ރިޕޯޓުގައި ނުނިމި ގިނަ ދުވަސްވެފައިވާ ގިނަ މައްސަލަތަކެއް ހުރިކަން ވަނީ ފާހަގަކޮށްފަ އެވެ.
