ސަލާމަތީ ސަބަބުތަކަށްޓަކައި ތަހުގީގަށް ހާޒިރު ނުވެވޭނެ: އަޒްރާ

އިސްލާމްދީނާއި ރަސޫލާ އަށް ފުރައްސާރަކޮށް މޯލްޑިވިއަން ޑިމޮކްރަސީ ނެޓްވޯކް (އެމްޑީއެން)ގައި ރިޕޯޓް ނެރުނު މައްސަލައިގައި ހިންގާ ތަހުގީގަށް ހާޒިރުނުވެވޭނެ ކަމަށް އެ ރިޕޯޓް ލިޔުމުގައި އިސްކޮށް އުޅުއްވި އަޒްރާ ނަސީމް ފުލުހުންނަށް އަންގައިފިއެވެ.

ފުލުހުން ބުނީ އަޒްރާއާއި ޝަހިންދާ އިސްމާއިލް ތަހުގީގަށް ހާޒިރުކުރުމަށް ޗިޓު ފޮނުވުމުން، އެ ދެމީހުންގެ ތެރެއިން އަޒްރާވަނީ ސަލާމަތީ ސަބަބުތަކަށްޓަކައި އަދި ރައްކާތެރި މާހައުލެއް ލިބޭނެކަމުގެ ޔަގީންކަން ނެތް ކަމަށް ފާހަގަކޮށް ރާއްޖެ އައުމަށް އުޒުރުވެރިވާ ކަމަށް ބުނެފައި ކަމަށެވެ.

އަދި މައްސަލައިގައި ހިމެނޭ ޝަހިންދާގެ ޖަވާބެއް ނުލިބޭ ކަމަށާއި، އޭނާއަށް ފޮނުވި ޗިޓްގެ މުއްދަތު ހަމަ ނުވާ ކަމަށް ވެސް ފުލުހުން ބުންޏެވެ. ޝަހިންދާ އާއި އަޒްރާ ދިރިއުޅެމުން އަންނަނީ ރާއްޖެއިން ބޭރުގައެވެ.

ޝަހިންދާއާއި އަޒްރާ ތަހުގީގަށް ހާޒިރުވުމަށް ދެ ހަފްތާގެ މުއްދަތެއް ފުލުހުން ދީފައިވަނީ މިދިޔަ މަހުގެ 24 ވަނަ ދުވަހުއެވެ. މި މުއްދަތު ހަމަވާނީ އަންނަ ހަފްތާގެ ބުދަ ދުވަހަށެވެ.

މި މައްސަލައިގެ ތަހުގީގު ފުލުހުން ފެށިއިރު ވެސް ޝަހިންދާ އާއި އަޒްރާ ތިބީ ރާއްޖެ އިން ބޭރުގައެވެ.

އެމްޑީއެން ރިޕޯޓާ ގުޅިގެން ހިންގާ ތަހުގީގުގައި ފުލުހުން ވަނީ އިލްމުވެރިންތަކެއް ލައްވައި އެ ރިޕޯޓް ދިރާސާކޮށްފައެވެ. އެ ދިރާސާގައި، އިސްލާމްދީނަށް ތައުހީނުކޮށްފައިވާ ކަމަށް އިލްމުވެރިން ވިދާޅުވުމުން، އެކަން ޖަމިއްޔާތަކުގެ މަސްއޫލުވެރިފަރާތް ކަމަށްވާ، ޔޫތު މިނިސްޓްރީ އަށް ފުލުހުން ވަނީ އަންގާފައެވެ.