ފިލްމު އެވޯޑްސްގެ ނޮމިނޭޝަންތައް ނޮވެމްބަރ 10 ގައި އިއުލާންކުރަނީ
ފިލްމު އެވޯޑްސްގައި 12 ފީޗާ ފިލްމާއި އެއް ކުރު ފިލްމު ބައިވެެރިކުރި
ނޫސްވެރިންނަށް ބޭއްވި ބައްދަލުކުރެއްވުމުގެ ތެރެއިން
މި މަހުގެ ފަނަރަ ވަނަ ދުވަހު ބާއްވަން ނިންމާފައިވާ ނުވަވަނަ ގައުމީ ފިލްމު އެވޯޑްސްގައި މި އަހަރު އެވޯޑް ދޭން ނިންމާފައިވާ ކެޓެގަރީތަކުގެ ނޮމިނޭޝަންތައް ނޮވެމްބަރ 10 ވަނަ ދުވަހު އިއުލާނު ކުރާނެ ކަމަށް ނޭޝަނަލް ސެންޓަރ ފޯ ދި އާޓްސް (އެންސީއޭ) އިން ބުނެފިއެވެ.
ފިލްމު އެވޯޑްސް އާއި ބެހޭގޮތުން މީޑިއާ ތަކަށް މައުލޫމާތު ދިނުމަށް ހޮނިހިރު ދުވަހު މެންދުރު ބޭއްވި ނޫސްވެރިންގެ ބައްދަލުވުމެއްގައި އާޓްސް އެންޑް ކަލްޗަރ މިނިސްޓްރީގެ ޑެޕިއުޓީ މިނިސްޓަރ ވަލީދާ ވަލީދު ވިދާޅުވީ، މި އަހަރުގެ ފިލްމު އެވޯޑްސްއަށް 12 ފީޗާ ފިލްމުގެ އިތުރުން އެއް ކުރު ފިލްމު ހުށަހަޅާފައިވާ ކަމަށެވެ.
ވަލީދާ އިތުރަށް ވިދާޅުވީ، އެ އެވޯޑަށް ކުރިމަތިލާން ހުޅުވާލީ އެވޯޑުގެ އުސޫލަށް ބަދަލުގެނައުމަށް ފަހުގައި ކަމަށާއި ފިލްމު އެވޯޑްސް އަށް ޓެކްނިކަލް ކޮމިޓީއެއް އެކުލަވާލެވުނު ކަމަށެވެ. އަދި އެ ކޮމިޓީގެ ތެރެއިން ފިލްމުތަކަށް ޖަޖް ކުރުން ވެސް ކުރިޔަށް ދިޔަ ކަމަށް ވެސް ވަލީދާ ވިދާޅުވިއެވެ.
ނުވަވަނަ ފިލްމު އެވޯޑްސް ހަފްލާގައި އެވޯޑް ދިނުމުގައި ފިލްމުތަކަށް އިންސާފު ކުރަން މި އަހަރު ހަތް ފަންޑިޔާރުން ތިބޭ ޕެނަލެއް އެކުލަވާލާފައި ވެއެވެ. ޕެނަލްގައި ހިމެނެނީ ޑައިރެކްޓަރު މުހައްމަދު ނިޔާޒު (ޓެޑްރީ) އާއި އައިމިނަތު ނަޖީބާއި ފާތުމަތު ލީޒާ އާއި އައިމިނަތު އިނާސް އާއި އަހުމަދު އަހުސަނާއި ނޫރާ އިބްރާހިމް ޒާހިރު އަދި ޝާރިފް އަލީ އެވެ.
ވަލީދާ ވިދާޅުވީ ފަންނާނުންނަށް މިއަހަރު މާގިނަ ކަންތައްތަކެއް ކުރެވިގެން ނުދިޔަ ނަމަވެސް، އަންނަ އަހަރުން ފެށިގެން ގިނަ ކަންތައްތަކެއް ރޭވުމަށް މިނިސްޓްރީންނާއި މިނިސްޓަރު ޔުމްނާ މައުމޫން ވެސް އުންމީދުކުރައްވާ ކަމަށެވެ
މިއަހަރުގެ އެވޯޑްސް ގައި ވާދަކުރަނީ 2017 އަދި 2018 ވަނަ އަހަރު ރިލީޒްކުރި ފިލްމުތަކެވެ. އެއީ "މަލިކާ، "ވިޝްކާ"، "އިލް ނޮއިސް"، "ބޮސް"، "ނޯޓީ ފޯޓީ"، "ހައްދު"، "މީ ލޯތްބަކީ"، "ނޭދެން ވަކިވާކަށް"، "ދެވަންސޫރަ"، "ރޭވުމުން"، "ތިޔަ ލޯތްބާ ދުރަށް" އަދި ކުރު ފިލްމު "ކަނޑު އިބިލީސް" އެވެ.
ނުވަވަނަ ފިލްމު އެވޯޑްސްގެ ޓައިޓަލް ސްޕޮންސަރަކީ ބައިސްކޯފުއެވެ.
