ބައެއް މީހުންގެ އަމަލުތައް ހުންނަގޮތުން ގަސްތައް މަރުވަނީ: އެންވައިރަމެންޓް މިނިސްޓްރީ
ގަސްތައް ހެލުވުމާއި ގަސްތަކުގައި ބަރުތަކެތި ލައްގާކަން ވަނީ ފާހަގަކުރެވިފައި
ގަސްތަކަށް ތެޔޮ އަޅާފައިވާ ފޮޓޯއެއް
ބައެއް މީހުންގެ އަމަލު ބަހައްޓާގޮތުން މާލެ ފެހިކުރުމަށް އިންދާފައިވާ ގަސްތައް މަރުވަމުންދާކަން ފާހަގަކުރެވެމުންދާކަމަށް އެންވައިރަމެންޓް މިނިސްޓްރީން ބުނެފިއެވެ.
އެންވައިރަމެންޓް މިނިސްޓްރީގެ ރަސްމީ ޓްވިޓަރ އެކައުންޓް މެދުވެރިކޮށް ކޮށްފައިވާ ޓުވީޓެއްގައި ބުނެފައިވަނީ، ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ 100 ދުވަހުގެ ވައުދުތަކުގެ ދަށުން މުޅި ރާއްޖެ ފެހި ކުރުމުގެ ޕްރޮގުރާމްގެ ދަށުން ބޮޑުތަކުރުފާނު މަގުގައި މިނިސްޓްރީއާއި މާލެ ސިޓީ ކައުންސިލް ގުޅިގެން އިންދާފައިވާ ގަސްތައް ބައެއް ފަރާތްތަކުގެ އަމަލު ބަހައްޓާގޮތުން މަރުވަމުންދާކަން ފާހަގަކުރެވިފައިވާކަމަށެވެ.
ޓުވީޓުގައި އިތުރަށް ބުނެފައިވަނީމ ގަސްތައް ހެލުވުމާއި ގަސްތަކުގައި ބަރުތަކެތި ލެއްގުމުގެ އިތުރުން ލޯންޗުފަހަރުންބަދަލުކުރާ އަޑީތެޔޮ ގަސްގަހުގެ ބުޑަށް އަޅާކަން ފާހަގަކުރެވިފައިވާކަމަށެވެ. މީގެއިތުރުން، ގަސްތައް ކައިރީގައި ކަޅު ތެޔޮ ފުޅިތަކާއި ހަންތައް ބަހައްޓާ އެ ތަކެތި ބިމަށް ފޭދިގެންދާގޮތަށް މަތި ނަގާފައި ހުންނަކަންވެސް މިނިސްޓްރީން ވަނީ ފާހަގަކޮށް އެފަދަ އެއްވެސް ކަމެއް ނުކުރުމަށް އާންމުންނަށް އިލްތިމާސްކޮށްފައެވެ.
އަދި މިފަދަ ކަންކަމުގައި ކޮންމެ ބޭފުޅަކުވެސް އެ ބޭފުޅެއްގެ ފަރުދީ ޒިންމާ އަދާކޮށް، ރާއްޖޭގެ ފެހިކަން ދަމަހައްޓަން މަސައްކަތްކުރުމަށް ތިމާވެއްޓާއި ބެހޭ ވުޒާރާއިން ވަނީ އިލްތިމާސްކޮށްފައެވެ.
