ސުޕްރީމް ކޯޓުން ކުރި ޙުކުމާއި ގުޅިގެން ރައްޔިތުންގެ މަޖިލީހުގެ ގޮނޑި ގެއްލުނު، ނިމިދިޔަ 18 ވަރަ ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އަޙްމަދު ނާޒިމް، ބަދަލު ހޯދަން ހުށަހެޅި މައްސަލައިގެ އިސްތިޢުނާފު އަޑުއެހުންތައް ހައިކޯޓުގައި ފަށައިފި އެވެ.

ސިވިލް ކޯޓުގެ، ރަޖިސްޓްރާރގެ ނިންމުން އަލުން ބަލައި އެކޯޓުން ނިންމާފައިވާ ނިންމުމާމެދު ހިތްހަމަ ނުޖެހި، ހައިކޯޓަށް ނާޒިމް ހުށަހެޅުއްވި އެމައްސަލައިގެ އިސްތިޢުނާފު އަޑުއެހުންތައް ފަށާފައިވަނީ ހޯމަ ދުވަހު އެވެ.

ނާޒިމުގެ ގޮނޑި ގެއްލުނީ، މެމްބަރުކަމުގައި ހުންނަވަނިކޮށް އޭނާގެ މައްޗަށް 2015 ވަނަ އަހަރު ސާބިތުވި މަކަރާއި ހީލަތް ހެދުމުގެ މައްސަލައިގައި ސުޕްރީމް ކޯޓުން 25 އަހަރު ދުވަހުގެ ޖަލު ޙުކުމެއް އިއްވުމާއި ގުޅިގެންނެވެ. ނަމަވެސް ނާޒިމުގެ ފަރާތުން އެ މައްސަލަ ރިވިއުކުރަން ސުޕްރީމް ކޯޓަށް މިދިޔަ އަހަރުގެ ޑިސެމްބަރު މަހުގެ ތެރޭގައި ހުށައެޅުއްވުމުން ކޯޓުން ވަނީ އޭނާގެ ޙުކުމް ބާޠިލު ކޮށްފައެވެ.

ނާޒިމްގެ ގޮނޑި ގެއްލިފައި ވަނީގެ ރައީސް މައުމޫން އަބްދުލްޤައްޔޫމްގެ ސަރުކާރުގެ ދުވަސްވަރު، އެޓޯލްސް މިނިސްޓްރީގެ އޮޑިޓް ރިޕޯޓާއި ގުޅިގެން، ހިންގާފައިވާ މަކަރާއި ހީލަތް ހެދުމުގެ ކުށުގެ ދައުވާއާ ގުޅިގެންނެވެ.

ގޮނޑި ގެއްލުމުގެ ސަބަބުން އެވީ މުއްދަތުގެ ތެރޭގައި ލިބެން ޖެހޭ މުސާރަ އާއި އިނާޔަތްތައް އަދި ޕެންޝަން ފައިސާ ދޭން ކަނޑައަޅައި ދިނުމަށް އެދި ނާޒިމް އެއްމެ ފުރަތަމަ ސިވިލް ކޯޓަށް ހުށައެޅުއްވީ މިއަހަރުގެ ފެބްރުއަރީ މަހުގެ ތިންވަނަ ދުވަހުގައެވެ. ނަމަވެސް ހަމަ އެ މަހުގެ ދިހަވަނަ ދުވަހު ސިވިލް ކޯޓުގެ ރަޖިސްޓްރަރ ވަނީ މައްސަލަ ބަލައިނުގަތުމަށް ނިންމަވާފައެވެ.

ރަޖިސްޓްރަރ މިހެން ނިންމެވީ، މަތީ ކޯޓަކުން ނިންމާ މައްސަލަތަކުގައި ބަދަލު ދިނުމުގެ އިހްތިސާސް ސިވިލް ކޯޓަށް ނެތްކަމަށް ބުނެއެވެ. ރަޖިސްޓްރަރގެ ނިންމުން ރިވިއުކޮށްދިނުމަށް އެދި ސިވިލް ކޯޓުގެ އިސް ގާޒީއަށް ހުށައެޅުއްވުމުން، މާޗް 25ވަނަ ދުވަހު ގާޒީ ނިންމެވީ ރަޖިސްޓްރަރގެ ނިންމުން ރަނގަޅު ކަމަށެވެ.

ނާޒިމްގެ ގޮނޑި ގެއްލުމާއެކު، ދިއްގަރު ދާއިރާގެ ބައި އިލެކްޝަންގައި ރައީސް މައުމޫންގެ ދަރިކަލުން އަޙްމަދު ފާރިޝް މައުމޫން ވާދަ ކުރައްވާ ވަނީ އެ އިންތިޚާބު ކާމިޔާބު ކުރައްވާފަ އެވެ.

ނާޒިމްގެ މައްޗަށް ސުޕްރީމް ކޯޓުން އިއްވި 25 އަހަރުގެ ޖަލު ހުކުމް ހަމަ އެ ކޯޓުން ބާޠިލު ކުރުމާއެކު، މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ އިންތިހާބުގައި ދިއްގަރު ދާއިރާއަށް ރައީސް މައުމޫންގެ ކެންޑިޑޭޓެއްގެ ގޮތުގައި ވާދަކުރައްވާފައި ވެއެެވެ. ނަމަވެސް އެ އިންތިޚާބުގައި ދިއްގަރު ދާއިރާގެ ގޮނޑި ކާމިޔާބު ކުރެއްވީ އެމްޑީޕީގެ މެމްބަރު އިކްރާމް ޙަސަނެވެ.