ކައުންސިލްތަކުގެ ދައުރު 5 އަހަރަށް ހެދުމަށް ގާނޫނުއަސާސީއަށް އިޞްލާޙު ގެނައުމުގެ ބިލު ބަލައިގެންފި
28 އޮކްޓޯބަރު 2019 | ހޯމަ 09:31މި ބިލް ދިރާސާ ކުރާނީ މުޅި މަޖިލީހުގެ ކޮމެޓީއިން
މަޖިލިސް 2019
ކައުންސިލްތަކުގެ ދައުރުގެ މުއްދަތު 5 އަހަރަށް ހެދުމަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އިޞްލާޙު ގެނައުމުގެ ބިލު މަޖިލީހުން ބަލައިގަނެފިއެވެ.
މަޖިލީހުގެ ރައީސް މުހައްމަދު ނަޝީދު ވިދާޅުވީ މި ބިލު ދިރާސާ ކުރާނީ މުޅި މަޖިލީހުގެ ކޮމެޓީން ކަމަށެވެ.
ސަރުކާރުން މި ބިލު ހުށަހެޅުމުގެ ބޭނުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ އަށްވަނަ ބާބުގައި ބަޔާން ކުރާ ލޯކަލް ކައުންސިލްގެ ދައުރު ފަސްއަހަރަށް އިތުރުކުރުމާއި، ކައުންސިލްތަކުގެ ރައީސުންނާއި ނައުބުރައީސުންނާއި ސީދާ ރައްޔިތުންގެ ވޯޓަކުން އިންތިޚާބު ކުރެވޭ ބައެއް ކަމުގައި ހަމަޖެއްސުމަށްޓަކައި އިޞްލާޙުތައް ގެނައުމެވެ.
މި ބިލުގައި ވަނީ ރަށު ކައުންސިލްތަކާއި ސިޓީ ކައުންސިލްތަކާއި ގައި ހިމެނެންވާނީ އެ ކައުންސިލް ނިޞްބަތްވާ ރަށުގެ ދިމިކްރާތީ އުޞޫލްތަކުގެ މަތިން ސިއްރު ވޯޓަކުން އެ ކައުންސިލަށް އިންތިޚާބު ކުރާ މެމްބަރުން ކަމަށެވެ. އަދި އަތޮޅު ކައުންސިލްގެ ރައީސާއި ނައިބު ރައީސް ފިޔަވައި އެ ކައުންސިލްތަކުގައި ހިމެނެންވާނީ އެ އިދާރާގައި ހިމެނޭ ރަށު ކައުންސިލްތަކަށް އިންތިޚާބު ކުރާ ރައީސުން ކަމަށެވެ.
މީގެ އިތުރުން އިދާރީ ދާއިރާތައް ހިންގުމަށްޓަކައި އުފައްދާ ރަށު ކައުންސިލްތަކާއި ސިޓީ ކައުންސިލްތަކާއި އަތޮޅު ކައުންސިލްތަކުގެ ރައީސުންނާއި ނައިބު ރައީސުލް އިންތިޚާބު ކުރާނީ އެ ކައުންސިލް ނިޞްބަތްވާ ޞަރަޙައްދުގެ ރައްޔިތުންގެ މެދުގައި ދިމިކްރާތީ އުޞޫލުތަކުގެ މަތީން ނަގާ ސިއްރު ވޯޓަކުން ކަމަށް ބިލުގައި ވެއެވެ.
އިދާރީ ދާއިރާތައް ހިންގުމަށްޓަކައި އިންތިޚާބު ކުރެވޭ ކައުންސިލްތަކުގެ އުމުރަކީ 5 އަހަރުގެ ގޮތުގައި ކަނޑައެޅުން ވެސް ބިލުގައި ހިމެނެއެވެ.
މި ޤާނޫނަށް ޢަމަލު ކުރަން ފަށާނީ މި ޤާނޫނު ފާސްވެ، ތަބްދީޤުކޮށް ދިވެހި ސަރުކާރުގެ ގެޒެޓުގައި ޝާއިއު ކުރާ ދުވަހުން ފެށިގެންނެވެ.
