ސެންޓޭ އާއި ރިޒޭ ހިމަނައިގެން ގައުމީ ފުޓުބޯޅަ ޓީމު މެލޭޝިއާއަށް!

ވޯލްޑްކަޕް ކޮލިފިކޭޝަނުގައި ނޮވެމްބަރު މަހު ފިލިޕީންސް އަދި ގުއާމާއި ދެކޮޅަށް އަމިއްލަ ދަނޑުގައި ކުޅެން ހަމަޖެހިފައިވާ މެޗަށް ތައްޔާރުވުމަށް ރާއްޖޭގެ ގައުމީ ފުޓުބޯޅަ ޓީމު މެލޭޝިއާއަށް ފުރައިފިއެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނީ ނޮވެމްބަރު މަހު 14 ގައި ރާއްޖޭގައި ފިލިޕީންސް އާއި ދެކޮޅަށް ކުޅޭ މެޗާއި ނޮވެމްބަރު މަހުގެ 19 ވަނަ ދުވަހު ގުއާމާއި ދެކޮޅަށް ކުޅޭ މެޗަށް ތައްޔާރު ވުމުގެ ގޮތުން ގައުމީ ޓީމު މެލޭޝިޔާގައި ކޭމްޕުކުރުމަށް ހަމަޖެހިފައިވާ ކަމަށަވެ. އަދި މި ކޭމްޕުގައި އެކުވެރިކަމުގެ މެޗުތަކެއް ހަމަޖެއްސުމަށް މަސައްކަތް ކުރަމުން އަންނަ ކަމަށެވެ.

މެލޭޝިއާގައި ކޭމްޕުކުރާ ގައުމީ ޓީމުގައި ހިމެނެނީ މާޒިޔާގެ 10 ކުޅުންތެރިންނާއި، ކްލަބް އީގަލްސްގެ ފަސް ކުޅުންތެރިންނާއި، ކްލަބް ގްރީން ސްޓްރީޓްސްގެ ހަތަރު ކުޅުންތެރިންނާއި، ފޯކައިދޫ ފުޓުބޯޅަ ކްލަބްގެ ދެ ކުޅުންތެރިން، ދަ ގްރާންޑޭ ގެ ދެ ކުޅުންތެރިންނާއި ޓީސީ ސްޕޯޓްސް ކްލަބްގެ ދެ ކުޅުންތެރިން އަދި ޔުނައިޓެޑް ވިކްޓްރީގެ ކުޅުންތެރިޔެކެވެ.

ވޯލްޑް ކަޕް ކޮލިފިކޭޝަނުގައި އަމިއްލަ ދަނޑުގައި ރާއްޖެއިން ކުޅުމަށް ހަމަޖެހިފައިވާ ދެ މެޗަށް ތައްޔާރު ވަމުންދާއިރު ގައުމީ ޓީމު ކޮމެޓީ އިން އަންނަނީ މި ދެ މެޗަށް ސަޕޯޓަރުން ވެއްދުމަށް މަސައްކަތްތަކެއް ކުރަމުންނެވެ.

ގައުމީ ޓީމު ކޮމެޓީގެ ޗެއާމަން އަލީ ވަހީދު ވިދާޅުވީ މި ދެ މެޗަށް ސަޕޯޓަރުން ނެރުމަށް ކުރެވެންހުރި ހުރިހާ މަސައްކަތެއް ކުރާނެ ކަމަށާއި އެގޮތުން ގަލޮޅު ދަނޑު ފުރާލާ މަޖީދީ މަގުގައި ސްކްރީން ބަހައްޓައިގެން ވެސް ބެލޭނެ ގޮތް ހަދާނެ ކަމަށެވެ.

ކޮލިފިކޭޝަނުގައި ރާއްޖެއިން މިހާތަނަށް ތިން މެޗު ކުޅެފައިވާއިރު މޮޅުވެފައިވަނީ އެންމެ މެޗަކުންނެވެ. އަމިއްލަ ދަނޑުގައި ޗައިނާ އަތުން 5-0 އިން ބަލިވިއިރު ސީރިއާ އަތުން ރާއްޖެ ބަލިވެފައިވަނީ 2-1 ގެ ނަތީޖާ އަކުންނެވެ. ކޮލިފިކޭޝަނުގައި ރާއްޖެއިން މޮޅުވެފައިވަނީ ރަށުން ބޭރުގައި ގުއާމް އަތުން 1-0 ގެ ނަތީޖާ އަކުންނެވެ.

ރާއްޖެ ހިމެނޭ ގްރޫޕްގެ އެއްވަނައިގައި ސީރިއާ ނުވަ ޕޮއިންޓާއެކު އޮތް އިރު ދެވަނައިގައި ޗައިނާ އޮތީ ހަތް ޕޮއިންޓާއެކުގައެވެ. މިގްރޫޕްގެ ތިން ވަނައިގައި ހަތަރު ޕޮއިންޓާއެކު ފިލިޕީންސް އޮތްއިރު ހަތަރުވަނައިގައި ރާއްޖެއިން އޮތީ ތިންޕޮއިންޓާއެކުގައެވެ. އަދި ގްރޫޕްގެ ފުލުގައި ގުއާމް އޮތީ ކުޅުނު ހުރިހާ މެޗަކުން ބަލިވެ ޕޮއިންޓެއް ނުލިބިއެވެ.