އިޓާލިއަން ލީގު: ޔުވެންޓަސް އެއްވަރުވިއިރު، އިންޓައިން ފުރުސަތު ނަގާލައިފި

އިޓާލިއަން ލީގުގައި ޔުވެންޓަސް އެއްވަރުވިއިރު، ޕޮއިންޓް ތާވަލުގެ އެއްވަނައަށް އަރަން ލިބުނު ފުރުސަތު އިންޓަ މިލާނުން ނަގާލައިފިއެވެ.

ހޮނިހިރު ދުވަހުގެ ރޭ ކުޅުނު މެޗުން ޔުވެންޓަސް އެއްވަރުވީ ލީޗްއާ ވާދަކޮށް 1-1 ގެ ނަތީޖާއަކުންނެވެ.

ލީޗް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ޔުވެންޓަސްއިންނެވެ. އެގޮތުން އެޓީމުން ވަނީ ލީޗްގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތައްވެސް ހޯދާފައެވެ.

މި ހާފްގައި ލީޗްއަށްވެސް ވަނީ ލަނޑު ޖެހުމަށް މަދުން ނަމަވެސް ފުރުސަތުތައް ލިބިފައެވެ. ނަމަވެސް އެޓީމަށްވެސް ލިބުނު ފުރުސަތުތަކުގެ ބޭނުން އެންމެ އެދެވޭ ގޮތެއްގައި ހިފިފައެއް ނުވެއެވެ.

ދެވަނަ ހާފް ފެށިގެން ޔުވެންޓަސްއިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ޕައުލޯ ޑިބާލާއެވެ.

މި ލަނޑާއެކު ލީޗްއިން ކުޅުން ރަނގަޅުކޮށް 56 ވަނަ މިނެޓުގައި ނަތީޖާ ހަމަހަމަ ކުރިއެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މޮނަކޮސޫއެވެ.

މި ނަތީޖާއާއެކު ޔުވެންޓަސް އޮތީ ކުޅުނު ނުވަ މެޗުން ލިބުނު 23 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ލީޗް އޮތީ ކުޅުނު ނުވަ މެޗުން ލިބުނު 8 ޕޮއިންޓާއެކު ޕޮއިންޓް ތާވަލުގެ 16 ވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން އިންޓަ ވަނީ ޕާމާ އަތުން 2-2 ގެ ނަތީޖާއަކުން އެއްވަރުވެފައެވެ.

އިންޓަ ދަނޑުގައި ކުޅުނު މި މެޗު ފެށިގެން ރަނގަޅަށް ކުޅެމުންދިޔައީ އެޓީމުންނެވެ. އެގޮތުން އެޓީމުން ވަނީ 23 ވަނަ މިނެޓުގައި ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކަންޑްރޭވާއެވެ.

ނަމަވެސް ޕާމާއިން ވަނީ އޭގެ ތިން މިނެޓު ފަހުން މެޗުގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ކަރަމޯއެވެ. އަދި 30 ވަނަ މިނެޓުގައި ޖަވީނިއޯ ކާމިޔާބުކުރި ލަނޑުން ޕާމާއިން ވަނީ މެޗުގެ ލީޑު ނަގާފައެވެ.

ފުރަތަމަ ހާފް 1-2 ގެ ނަތީޖާއިން އިންޓަގެ މައްޗަށް ޕާމާ ކުރީގައި އޮވެގެން ނިމުނު ނަމަވެސް، ދެވަނަ ހާފް ފެށިގެން އިންޓައިން ވަނީ މޮޅު ކުޅުމެއް ދައްކާފައެވެ.

އެގޮތުން އިންޓައިން ވަނީ އެޓީމުގެ ހަމަލާތައް ގިނަކޮށް، ޕާމާގެ ގޯލަށް ނުރައްކާކޮށް ގިނަ ހަމަލާތައް ފޮނުވާލާފައެވެ. ނަތީޖާއެއްގެ ގޮތުން 51 ވަނަ މިނެޓުގައި އެޓީމުން ވަނީ ރޮމެލޫ ލުކާކޫގެ ލަނޑުން މެޗުގެ ނަތީޖާ ހަމަހަމަކޮށްފައެވެ.

މި ނަތީޖާއާއެކު އިންޓަ އޮތީ ކުޅުނު ނުވަ މެޗުން ލިބުނު 22 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން އިންޓަ މޮޅުވި ނަމަ، އެއް ޕޮއިންޓްގެ ލީޑަކާއެކު އެޓީމަށް ޕޮއިންޓް ތާވަލުގެ އެއްވަނަ ލިބޭނެއެވެ.