އިރުފާން ރުޝްދީ އާއި އޭނާ އާއި އެކު ހައްޔަރު ކުރެވުނު މީހުންގެ ބަންދުގެ މުއްދަތު ޖަހައިފި
އިރުފާން ރުޝްދީ ފެނިފައިވަނީ ހޮނިހިރު ދުވަހުގެ ދަންވަރު 1:00 ހާއިރު
މ. ކުރިރުއްމަގު، އިރުފާން ރުޝްދީ
މަރާލައިފައިވާ މީހުންނާއި ގެއްލުވާލައިފައިވާ މީހުންގެ މަރުތައް ތަހުޤީޤުރާ ކޮމިޝަނުން ހޯދަން އިއުލާނުކޮށްފައިވާ މ. ކުރިރުއްމަގު، އިރުފާން ރުޝްދީ އާއި އޭނާ އާއި އެކު ހައްޔަރު ކުރެވުނު މީހުންގެ ބަންދުގެ މުއްދަތަށް ގދ މެޖިސްޓްރޭޓް ކޯޓުން 15 ދުވަސް ޖަހައިފިއެވެ.
އިރުފާން ރުޝްދީ ފެނިފައިވަނީ ހޮނިހިރު ދުވަހުގެ ދަންވަރު 1:00 ހާއިރު ގދ ތިނަދޫ އާއި 15 މޭލު ބޭރުން އޮޔާ ދަނިކޮށް އެމްއެންޑީއެފުން އެހީތެރިވި "ބްލޫ ވޭވް" ނަމަކަށް ކިޔާ ލޯންޗުގައި ހުއްޓާކަމަށް ފުލުހުން ވަނީ މައުލޫމާތު ދީފައެވެ. 4 މީހުންނާއި އެކު ޕެޓްރޯލް ހުސްވެ އޮޔާ ދާކަމަށް އެމްއެންޑީއެފް އާއި ފުލުހުންނަށް މައުލޫމާތު ލިބުމުން، އެމްއެންޑީއެފް ސްކޮޑް ރަން އިން އެހީތެރިކަން ފޯރުކޮށްދީ ލޯންޗްގެ ވެރި ފަރާތުން ޕެޓްރޯލް ހަމަޖެއްސުމާއެކު، ހޮނިހިރު ދުވަހުގެ ފަތިހު 4:22 ގައި ލޯންޗް ތިނަދޫއަށް ގެންދިޔަކަމަށް ވެސް ވަނީ މައުލޫމާތު ދީފައެވެ.
އެގޮތުން ފުލުހުންނަށް އެ ލޯންޗްގައި ޝައްކު ކުރެވޭ ކަންތައްތަކެއް ހުރުމުން، ލޯންޗްގައި ތިބި 4 މީހުން ތިނަދޫ ޕޮލިސްޓޭޝަނަށް ގެނެސް ބެލި ބެލުމުން، އޭގެ ތެރޭގައި ތޫނު އެއްޗަކުން ހަމަލާދީ މ. ސަރުމާގެ، ފާތިރު މުހައްމަދު މަރާލި މައްސަލައިގައި މަރުގެ ކޮމިޝަނުން ހޯދަން އިޢުލާނުކުރި އަދި ފުލުހުން ތިން އަހަރު ވަންދެން ހޯދަމުންދާ އިރުފާން ރުޝްދީ ހުރިކަން އެނގިފައިވާކަމަށެވެ.
މަރުގެ ކޮމިޝަނުން ހުކުރު ދުވަހު ކޮށްފައިވާ ޓުވީޓެއްގައި ބުނެފައިވަނީ 3 އަހަރު ވެގެންދިޔައިރު މުއައްސަސާތަކަށް އިރުފާން ހޯދިފައި ނުވާކަމަށާއި މީގެކުރިން އިމިގްރޭޝަނުން، 2015 ވަނަ އަހަރު ފާތިރު ރާއްޖެއިން ބޭރަށް ދިޔަ ފަހުން އެނބުރި އައިސްފައި ނުވާކަމަށް ބުނެފައިވާކަމަށެވެ. ނަމަވެސް 2016 ވަނަ އަހަރުގެ ޖޫން މަހު މަރުގެ ހާދިސާއެއްގައި އެ ސަރަހައްދުގައި ހަރަކާތްތެރިވަނިކޮށް ސީސީޓީވީ ކެމެރާ ފުޓޭޖުން ފެންނަކަމަށް މަރުގެ ކޮމިޝަނުން ވަނީ ބުނެފައެވެ.
އުމުރުން 14 އަހަރުގެ ފާތިރު މަރާލާފައިވަނީ 2016 ވަނަ އަހަރުގެ ޖޫން މަހުގެ ތިން ވަނަ ދުވަހުގެ ރޭ 9:20 ހާއިރު އެވެ. ފުލުހުން މައުލޫމާތު ދީފައިވާ ގޮތުގައި ފާތިރު މަރާލާފައިވަނީ ގްރޫޕަކުން ސަރުމާގެ އަށް ވަދެ ތޫނު އެއްޗެހި ބޭނުންކޮށްގެން ދިން ހަމަލާއެއްގަ އެވެ. އެ ހަމަލާއާ ގުޅިގެން އައިޖީއެމް ހޮސްޕިޓަލަށް ފާތިރު ގެންދިޔަ އިރުވެސް އޭނާ މަރުވެފައިވާ ކަމަށް ފުލުހުން ބުނެފައިވެ އެވެ.
