ޕްރިމިއާ ލީގު: ބާންލީ ބަލިކޮށް ޗެލްސީން ލީގު ތާވަލުގެ ހަތަރު ވަނައިގައި ހަމަޖެހިލައިފި

އިނގިރޭސި ޕްރިމިއާ ލީގުގައި ބާންލީ ބަލިކޮށް ޗެލްސީން ލީގު ތާވަލުގެ ހަތަރުވަނައިގައި ހަމަޖެހިލައިފިއެވެ.

ބާންލީ ދަނޑުގައި ކުޅުނު މި މެޗު ޗެލްސީން ކާމިޔާބުކުރީ 4-2 ގެ ނަތީޖާ އަކުންނެވެ.

މެޗު ފަށައިގެން ޗެލްސީން ބޯޅަ ކޮންޓްރޯލް ކޮށް މޮޅަށް ކުޅެފައިވާއިރު މެޗުގެ 21 ވަނަ މިނެޓުގައި ޗެލްސީން ވަނީ ލަނޑު ޖަހައި ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ކްރިސްޓަން ޕޮލަސިކްއެވެ. މި ލަނޑަށްފަހު ވެސް ޗެލްސީން ދިޔައީ ބާންލީގެ ގޯލަށް ފުލުފުލުގައި ހަމަލާ އުފައްދަމުންނެވެ. އެގޮތުން ފުރަތަމަ ހާފުގެ ފަހު މިނެޓުގައި ޕޮލަސިކް ވަނީ ޗެލްސީ އަށް އިތުރު ލަނޑެއް ކާމިޔާބުކޮށްދީ މެޗުގެ ލީޑު ފުޅާކޮށްފައެވެ. މި ލަނޑު އޭނާ ކާމިޔާބުކުރީ މިޑްފިލްޑަރ ވިލިއަންގެ އެހީތެރިކަމާއި އެކުގައެވެ.

މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާ އަކުންނެވެ.

މެޗުގެ ދެވަނަ ހާފު ފަށައިގެން ޗެލްސީން އެޓީމުގެ އެޓޭކްތައް އިތުރަށް ވަރުގަދަކުރި އިރު މެޗުގެ 56 ވަނަ މިނެޓުގައި ޕޮލަސިކް ވަނީ ޗެލްސީ އަށް އިތުރު ލަނޑެއް ޖަހައިދީ އޭނާގެ ހެޓްރިކް ފުރިހަމަ ކޮށްފައެވެ. ޕޮލަސިކް ލަނޑު ޖެހިތާ ދެ މިނެޓު ފަހުން ވިލިއަން ވަނީ އިތުރު ލަނޑެއް ޗެލްސީ އަށް ކާމިޔާބުކޮށްދީ ލީޑު އިތުރަށް ފުޅާ ކޮށްދީފައެވެ. މި ލަނޑު އޭނާ ކާމިޔާބުކުރީ އަބްރަހަމްގެ އެހީތެރިކަމާއި އެކުގައެވެ.

ޗެލްސީ އިން ކާމިޔާބުކުރި ހަތަރުވަނަ ލަނޑާ އެކު ބާންލީ އިން ވަނީ އެޓީމުގެ ކުޅުން ރަނގަޅު ކޮށް ޗެލްސީގެ ހާފަށް ބާރު ބޮޑު ކޮށްފައެވެ. އެގޮތުން ބާންލީ އިން ވަނީ ފުލުފުލުގައި ޗެލްސީގެ ގޯލަށް ހަމަލާތައް އުފައްދަމުންނެވެ. އެގޮތުން މެޗުގެ 86 ވަނަ މިނެޓުގައި ބާންލީ އިން ވަނީ ލަނޑު ޖަހާ ފަރަގު ކުޑަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޖޭ ރޮޑްރިގޭޒް އެވެ. އަދި ބާންލީ އިން ކާމިޔާބުކުރި ދެވަނަ ލަނޑު މެޗުގެ 89 ވަނަ މިނެޓުގައި އެޓީމަށް ކާމިޔާބުކޮށްދިނީ މެކްނިލްއެވެ.

މި ނަތީޖާ އާއި އެކު ޗެލްސީ އިން ލީގު ތާވަލުގެ ހަތަރު ވަނައިގައި އޮތީ ލިބުނު 20 ޕޮއިންޓާއެކުގައެވެ. ލީގު ތާވަލުގެ އެއްވަނައިގައި އޮތް ލިވަރޕޫލަށް 25 ޕޮއިންޓް ލިބިފައިވާއިރު ދެވަނައިގައި އޮތް މެންޗެސްޓާ ސިޓީ އަށް ލިބިފައިވަނީ 22 ޕޮއިންޓެވެ. އަދި މެޗުން ބަލިވި ބާންލީ އޮތީ 12 ޕޮއިންޓާއެކު ލީގު ތާވަލުގެ 11 ވަނައިގައެވެ.