އަމާޒަކީ ހަތަރު އަހަރުގެ ތެރޭގައި އެއްކޮށް ލުއި ފުޅިއަށް ބަދަލުކުރުން: މޯލްޑިވް ގޭސް
މިއީ ދަގަނޑު ފުޅިއަށް ވުރެ މާ ރައްކާތެރި އަދި ފަޔަރ ސޭފްޓީ ރަނގަޅު ފުޅިތަކެއް
މޯލްޑިވް ގޭހުން ކުރިއަށް ގެންދިޔަ ލުއިފުޅި ޕްރޮމޯޝަނެއްގެ ތެރެއިން
މޯލްޑިވް ގޭސްގެ އަމާޒަކީ ކުރިއަށް އޮތް ހަތަރު އަހަރުގެ ތެރޭގައި މިހާރު ބޭނުންކުރަމުން އަންނަ ދަގަނޑު ފުޅިތައް އެއްކޮށް ބޭނުންކުރުން ހުއްޓާލުމަށް ފަހު، ލުއި ފުޅިއަށް ބަދަލުކުރުން ކަމަށް އެ ކުންފުނިން ބުނެފިއެވެ.
މޯލްޑިވް ގޭހުން މިހެން ބުނެފައިވަނީ މިދިޔަ ހަފުތާގެ ތެރޭގައި އެ ކުންފުނީގެ އިސްވެރިން މަޖިލީހުގެ ސްޓޭޓް އޯންޑް އެންޓަރޕްރައިސަސް ކޮމިޓީއަށް ހާޒިރުކުރުމުންނެވެ. އެގޮތުން އެ ކުންފުނީގެ ޗެއަރމަން އަދި އެކްޓިންގ މެނޭޖިންގ ޑިރެކްޓަރ އަހްމަދު ޝިފާން ވިދާޅުވީ، ދަގަނޑު ފުޅި ބޭނުންކުރުން ހުއްޓާލުމަށް ފަހު ލުއިފުޅިއަށް ބަދަލުކުރަން މިހާރު ބޯޑުން ނިންމާފައިވާ ކަމަށެވެ.
މިހެން މިކަން ކުރަން ނިންމި ސަބަބުތައް ކިޔައިދެއްވަމުން ޝިފާން ވިދާޅުވީ، ލުއިފުޅިތަކަކީ ރައްކާތެރި ފުޅިތަކެއް ކަމަށާއި އެ ފުޅިތަކަކީ ގޮވާ ޒާތުގެ ފުޅިތަކެއް ނޫން ކަމަށެވެ. ކަސްޓަމަރުންގެ ރައްކާތެރިކަމަކީ އެންމެ ބޮޑަށް ސަމާލުކަންދޭ ކަންތައް ކަމަށްވެސް ޝިފާން ފާހަގަކުރެއްވިއެވެ.
ލުއިފުޅިއަށް ބަދަލުކުރުމުގެ އިތުރު ފައިދާތައް ކިޔައިދެއްވަމުން ޝިފާން ވިދާޅުވީ، އެއީ ގެންގުޅެން ފަސޭހަ އަދި ލޭބަރުންނަށް ވެސް ލުއިތަކެއް ލިބިގެންދާ ފުޅިތަކެއް ކަމުގައެވެ. އަދި އަލިފާނުގެ ރައްކާތެރިކަމާއި މެއިންޓެނަންސްއަށް ބެލިކަމުގައިވީ ނަމަވެސް، ލުއިފުޅި މާ ބޮޑަށް ވެސް ރަނގަޅުކަމަށް ޝިފާން ވިދާޅުވިއެވެ.
މޯލްޑިވް ގޭހުން މިހާރު ގެންގުޅޭ ދިހަ ކިލޯގެ ލުއިފުޅީގެ އަގުތަކަށް ބަލާއިރު، ލުއިފުޅިއެއް ލިބެނީ 1774 ރުފިޔާގެ ޑިޕޮސިޓެއް ބެހެއްޓުމަށް ފަހުގައެވެ. މިއީ ދަގަނޑު ފުޅިއެއް ނެގުމަށް ބަހައްޓަން ޖެހޭ ޑިޕޮސިޓަށް ވުރެ 1124 ރުފިޔާ ބޮޑު އަދަދެކެވެ. ނަމަވެސް ދެ ވައްތަރުގެ ފުޅި ރީފިލް ކުރަންވެސް ހަރަދުކުރަން ޖެހެނީ 200 ރުފިޔާއެވެ.
މޯލްޑިވް ގޭހުން ގެންގުޅޭ ލުއިފުޅިތަކަކީ ގޭސް ހުސްވަމުންދާ މިންވަރު ވެސް އެނގޭނެހެން، ޓްރާންސްޕޭރެންޓް ކަވަރެއް ލާފައި ހުންނަ، ގެންގުޅެން ފަސޭހަ ފުޅިތަކެކެވެ. އަދި އާންމުންގެ ތެރޭގައި ލުއިފުޅި ގެންގުޅޭ މިންވަރު އިތުރުކުރުމުގެ ގޮތުން، ދޭތެރެ ދޭތެރެއިން އެ ކުންފުނިން ލުއިފުޅިއާ ގުޅޭ ތަަފާތު އެކި ޕްރޮމޯޝަންތައް ކުރިއަށް ގެންދެއެވެ.
