ޗެމްޕިއަންސް ލީގު: އެންމެ ފަހުގެ ޗެމްޕިއަން ލިވަރޕޫލަށް ފަސޭހަ މޮޅެއް

ޔޫއެފާ ޗެމްޕިއަންސް ލީގުގައި އެންމެ ފަހުގެ ޗެމްޕިއަން ލިވަރޕޫލުން ފަސޭހަ ކަމާއިއެކު ގެންކް ބަލިކޮށްފިއެވެ.

ގެންކްގެ ދަނޑުގައި ކުޅުނު މި މެޗު ލިވަރޕޫލުން ކާމިޔާބުކުރީ 4-1 ގެ ނަތީޖާ އަކުންނެވެ.

މެޗުފަށައިގެން ދެވަނަ މިނެޓުގައި ލިވަރޕޫލުން ލަނޑު ޖަހައި ލީޑު ނެގިއިރު މި ލަނޑު އެޓީމަށް ކާމިޔާބުކޮށްދިނީ ފެބިންހޯގެ އެހީތެރިކަމާއި އެކު ޗެމްބަލިންގ އެވެ. މި ލަނޑަށްފަހު ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު ލިވަރޕޫލުން ދިޔައީ ފުލުފުލުގައި ގެންކް ގެ ގޯލަށް ހަމަލާތަށް އުފައްދަމުންނެވެ.

މި މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާ އަކުންނެވެ.

މެޗުގެ ދެވަނަ ހާފުގައި ލިވަރޕޫލް ކުޅުންތެރިންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު މި ހާފުގެ 57 ވަނަ މިނެޓުގައި ޗެމްބަލިންގ ވަނީ އިތުރު ލަނޑެއް ޖަހާ ލިވަރޕޫލަށް ލީޑު ފުޅާ ކޮށްދީފައެވެ. މި ލަނޑު އޭނާ ޖެހީ ފިރިމީނޯގެ އެހީތެރިކަމާއި އެކުގައެވެ. މި ލަނޑަށްފަހު ވެސް ލިވަރޕޫލުން ވަނީ ފުލުފުލުގައި ގެންކް ގޯލަށް ހަމަލާތައް ފޮނުވައިލަމުންނެވެ. އެގޮތުން މެޗުގެ 77 ވަނަ މިނެޓުގައި މާނޭ ވަނީ އިތުރު ލަނޑެއް ޖަހާ މެޗުގެ ނަތީޖާ 3-0 ކަށް ބަދަލު ކޮށްލައިފައެވެ. މި ލަނޑު އޭނާ ޖެހީ މުހައްމަދު ސަލާހުގެ އެހީތެރިކަމާއި އެކުގައެވެ. މި މެޗުގައި ލިވަރޕޫލުން ޖެހި ފަހު ލަނޑު އެޓީމަށް ކާމިޔާބުކޮށްދިނީ ސަލާހް އެވެ.

މި މެޗުގެ 88 ވަނަ މިނެޓުގައި ގެންކްގެ އޮޑޭ ވަނީ ލަނޑު ޖަހައި ފަރަގު ކުޑަ ކޮށްދީފައެވެ.

މި ނަތީޖާ އާއި އެކު ލިވަރޕޫލުން ގްރޫޕް "އީ" ގެ ދެވަނައިގައި ހަ ޕޮއިންޓާއިއެކު އޮތް އިރު ގްރޫޕްގެ އެއްވަނައިގައި ނަޕޯލީއިން އޮތީ ހަތް ޕޮއިންޓާއެކުގައެވެ. އަދި މެޗުން ބަލިވި ގެންކް އޮތީ އެއް ޕޮއިންޓާއި އެކު ހަތަރުވަނައިގައެވެ.