އެމްއެމްޕީއާރުސީގެ ބޮޑު ވައްކަމުގައި ބައިވެރިވި ފަރާތްތަކުގެ ނަންތަކެއް ކޮމެޓީން ސިއްރެއް ނުކުރަން: ޔައުޤޫބް
ސިއްރުކުރީ އެ މައްސަލައިގައި ޝާމިލުވި މީހުންގެ އެކި އެކި މައްސަލަތަކުގެ މުހިއްމު މައުލޫމާތުތައް މިވަގުތު ސިއްރުކުރަން ޖެހޭތީ
ދާންދޫ ދާއިރާގެ މެމްބަރު ޔައުގޫބް އަބްދުﷲ
ރައްޔިތުންގެ މަޖިލީހުގެ މާލިއްޔަތު ކޮމެޓީން ސިއްރުކުރީ މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް (އެމްއެމްޕީއާރުސީ)ގެ ޚިޔާނާތުގައި ބައިވެރިވި ފަރާތްތަކުގެ ނަންތަކެއް ނޫން ކަމަށް ދާންދޫ ދާއިރާގެ މެމްބަރު ޔައުގޫބް އަބްދުﷲ ވިދާޅުވެއްޖެއެވެ.
ޔައުގޫބް މިހެން ވިދާޅުވީ ބުދަ ދުވަހުގެ މަޖިލީހުގެ ޖަލްސާގައި ހުށަހެޅުނު އެމްއެމްޕީއާރުސީގެ ޚިޔާނާތުގެ މައްސަލައިގައި ހިމެނޭ އެންމެހާ ފަރާތްތަކާއި ގޮތް ނޭނގޭ ގޮތަށް ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތަކަުގައި އެކިގޮތްގޮތުން ޝާމިލުވެފައިވާ ފަރާތްތަކުގެ ނަންތައް ހާމަކޮށް އެ ފަރާތްތަކަށް ވަގުތުން ވަގުތައް ފިޔަވަޅުއެޅުމަށް ގޮވާލާ ކުއްލި މައްސަލައަށް ބަހުސް ކުރައްވަމުންނެވެ.
ޔައުގޫބް ވިދާޅުވީ ޕްރޮސެކިއުޓަރ ޖެނެރަލް އައިޝަތު ބިޝާމްއާއިއެކު ހޯމަ ދުވަހު ބޭއްވުނު ބައްދަލުވުމުގައި އެމްއެމްޕީއާރުސީގެ ޚިޔާނާތުގައި ދައުލަތުގެ ވަޒީރުންނާއި މިހާރުގެ މަޖިލިސް މެމްބަރުންނާއި ސިފައިންނާއި ފުލުހުންގެ އިތުރުން މާލިއްޔަތު ކޮމެޓީގައި ވެސް އެ މައްސަލައިގައި ޝާމިލުވާ ބައެއް މެމްބަރުން އެބަތިބި ކަމަށް ޕީޖީ ވިދާޅުވިކަމަށެވެ. އަދި އިންސާފު ހޯދަން ބޭނުންވާނަމަ އެ ފަރާތްތައް އެކަހެރި ކުރުން މުހިއްމުކަމަށް ގަބޫލު ކުރެއްވޭ ކަމަށް ޔައުގޫބް ވިދާޅުވިއެވެ. އަދި އެކަހެރި ކުރެވޭނީ އެ ފަރާތްތަކުގެ ނަންތައް ހާމަވެގެން ކަމަށް އެނާ ވިދާޅުވި އެވެ.
ޔައުގޫބް ވިދާޅުވީ މާލިއްޔަތު ކޮމެޓީއަށް މި މައްސަލައިގައި ޝާމިލުވި ފަރާތްތައް ހިމެނޭ ލިސްޓު ސިއްރު ކުރާކަށް ވޯޓެއް ނުދެއްވާނެ ކަމަށެވެ. އަދި ސިއްރު ނުވެސް ކުރެވޭނެ ކަމަށެވެ.
ހޯމަ ދުވަހު ބޭއްވުނު މާލިއްޔަތު ކޮމެޓީގެ ބައްދަލުވުން ސިއްރު ކުރުމުން ރައްޔިތުންގެ ހިތްތަކުގައި ކަންބޮޑުވުންތަކެއް ހުރިކަން އެނގިލައްވާ ކަމަށް ޔައުގޫބް ވިދާޅުވިއެވެ. ޔައުގޫބް ވިދާޅުވީ މާލިއްޔަތު ކޮމެޓީގައި ސިއްރުކުރީ އެމްއެމްޕީއާރުސީގެ ވައްކަމުގައި ބައިވެރިވި މީހުންގެ ނަންތަކެއް ނޫން ކަމަށެވެ. ސިއްރު ކުރީ އެ މައްސަލައިގައި ޝާމިލުވި މީހުންގެ އެކިއެކި މައްސަލަތަކުގެ މުހިއްމު މައުލޫމާތުތައް މިވަގުތު ސިއްރުކުރަން ޖެހޭތީ ކަމަށެވެ. އެ ބައްދަލުވުން ސިއްރުކޮށްފައިވަނީ ޕީޖީގެ އެދިލެއްވުމުގެ މަތިންނެވެ.
މެމްބަރު ވިދާޅުވީ ނަންތައް ސިއްރުކުރި ނަމަވެސް އަމިއްލަފުޅަށް ނަންތައް ހާމަ ކުރައްވާނެ ކަމަށެވެ. މި މައްސަލައާއި ގުޅިގެން އެކި ގޮތްގޮތަށް މަރުގެ އިންޒާރުތައް ވެސް ލިބެމުންދާ ކަމަށާއި ނަމަވެސް އެއްވެސް ގޮތަކަށް ފަހަތަށް ޖެހިވަޑައެއްނުގަންނަވާނެ ކަމަށް ޔައުގޫބް ވިދާޅުވިއެވެ.
ޔައުގޫބް ވިދާޅުވީ މި ވައްކަމުގައި ބައިވެރިވި އެއްވެސް ފަރާތެއްގެ ނަން ސިއްރު ނުކުރައްވާނެ ކަމުގެ ޔަގީންކަން ދިވެހި ރައްޔިތުންނަށް އަރުވާ ކަމަށެވެ. އަދި ވީހާ ވެސް އަވަހަކަށް އެ ލިސްޓު ހާމަ ކޮށްދެއްވުމަށް ޕީޖީއަށް ވަނީ ގޮވާލައްވާފައެވެ.
