ޓެރެެރިޒަމް މައްސަލައިގައި ހައްޔަރުކުރި މީހާގެ މުއްދަތަށް 15 ދުވަސް ޖަހައިފި
22 އޮކްޓޯބަރު 2019 | އަންގާރަ 07:47މައްސަލައިގައި ހައްޔަރުކޮށްފައިވަނީ 27 އަހަރުގެ މީހެއް
ޓެރެރިޒމްގެ ތުހުމަތުގައި ފުލުހުން ތަނެއް ބަލައި ފާސްކުރަނީ
މި މަހުގެ 12 ވަނަ ދުވަހު ޓެރެެރިޒަމް މައްސަލައިގައި ހައްޔަރުކުރި މީހާގެ މުއްދަތަށް 15 ދުވަސް ކްރިމިނަލް ކޯޓުން ޖަހައިފައިވާ ކަމަށް މޯލްޑިވިސް ޕޮލިސް ސާރވިސް އިން ބުނެފިއެވެ.
އެ މީހާ ހައްޔަރުކޮށްފައިވަނީ މުޖުތަމައުގެ ތެރޭގައި ބިރުވެރިކަން އުފެދޭ ގޮތަށް މީހުންގެ ފުރާނައަށް ގެއްލުން ދިނުމަށާއި އަނިޔާވެރިކަމުގެ އަމަލު ހިންގުމަށް ގޮވާލި ކަމުގެ ތުހުމަތުގައެވެ. އުމުރުން 27 އަހަރުގެ އެ ފިރިހެން މީހާ ހައްޔަރުކުށްފައިވަނީ ޓެރަރިސްޓު ޖަމާއަތްތަކުގެ ނިޝާންތަކާއި، ލިޔެ ކިޔުންތައް ޝޯޝަލް މީޑިއާގައި އާއްމު ކުރުމުންނެވެ.
މިކަމާއި ގުޅިގެން އަންގާރަ ދުވަހު ފުލުހުން ބުނެފައިވަނީ މި މައްސލައިގައި ތުހުމަތުކުރެވޭ ފަރާތުގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓުން ގެންދިޔުމުން، އޭނާއަށް 15 ދުވަހުގެ މުއްދަތު އިތުރުކޮށްދީފައިވާކަމަށެވެ.
ޓެރަރިޒަމްގެ ތުހުމަތުގައި މީހަކު ހައްޔަރު ކޮށްފައިވާއިރު، މިއީ ޓެރަރިޒަމްގެ ޤާނޫނަށް އިސްލާހު ގެނައުމަށްފަހު ހައްޔަރުކުރި ފުރަތަމަ މީހާ އެވެ. އިސްލާހްކުރެވުނު ޓެރަރިޒަމްގެ ޤާނޫނުގެ ދަށުން ފުލުހުންނަށް ވަނީ ބޮޑެތި ބާރުތަކެއްދީފަ އެވެ.
