ޖުމްހޫރީ ޕާޓީއަށް ބަޔަކު ގުޅުމުން ސަރުކާރަށް އުނދަގުލެއް ކުރިމަތިވާނެ ކަމަށް ދެކިވަޑައިނުގަންނަވާ ކަމަށް ޓްރާންސްޕޯޓް މިނިސްޓްރަ އައިޝަތު ނަހުލާ ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމުގައި ވާހަކަ ދައްކަވަމުން މިނިސްޓަރ ނަހުލާ ވިދާޅުވީ، ޖުމްހޫރީ ޕާޓީއަށް ބަޔަކު ގުޅުމުން ސަރުކާރަށް ނުވަތަ ސަރުކާރު ނިސްބަތްވާ ޕާޓީއަށް އަދި އެހެން ބަޔަކަށްވެސް އޭގެ ސަބަބުން އުނދަގުލެއް ކުރިމަތިވާނެ ކަމަށް ދެކިވަޑައިނުގަންނަވާ ކަމަށެވެ.

މިނިސްޓަރ ނަހުލާ ވިދާޅުވީ، ސިޔާސީ ޕާޓީއަކަށް ކޮންމެ މީހަކު ވަންނަން ބޭނުންވިޔަސް އެ ފުރުސަތު ދޭންޖެހޭ ކަމަށާއި، އެ ފުރުސަތު ނުދީފިނަމަ އެކަން ބަލައިނުގަންނާނެ ކަމަށެވެ.

އެގޮތުން މިނިސްޓަރ ނަހުލާ ވިދާޅުވީ، ކުރިން ކޮންމެ ފިކުރެއްގައި ހުރި މީހެއް ވިޔަސް، ކުރިން ހިނގި ކަންކަން ގޯސްކަން ގަބޫލުކޮށް، ރައްޔިތުންނަށް ފައިދާ ހޯދަން މަސައްކަތް ކުރާނަމަ އެ މީހަކަށް އެ ފުރުސަތު ލިބެން ޖެހޭ ކަމަށެވެ.

މީގެއިތުރުން މިނިސްޓަރ ނަހުލާ ވިދާޅުވީ، ޖުމްހޫރީ ޕާޓީއާ ގުޅެން ބޭނުންވާ ކޮންމެ މެމްބަރަކަށްވެސް އެ ޕާޓީން ފުރުސަތު އޮންނާނެ ކަމަށާއި، ސަރުކާރު ދަމަހައްޓަން ކުރާ މަސައްކަތުގައި އެފަރާތްތަކުގެ އެއްބާރުލުން ލިބޭނެ ކަމަށް އުންމީދުކުރާ ކަމަށެވެ.

ޖުމްހޫރީ ޕާޓީ ނޫން ޕާޓީއަކުން ނުފެންނަންވީ ސަބަބެއް ނެތްކަން ފާހަގަކުރައްވަމުން މިނިސްޓަރ ނަހުލާ ވިދާޅުވީ، ޖުމްހޫރީ ޕާޓީ ދޫކޮށްލަންވީ ސަބަބެއްވެސް ނެތް ކަމަށެވެ.

މީގެއިތުރުން ޖުމްހޫރީ ޕާޓީގެ ލީޑަރޝިޕް ގާސިމް އިބްރާހިމް ދޫކޮށްލި ދުވަހަކުން އެ ޕާޓީގެ އެންމެ އިސް މީހެއްގެ ގޮތުގައި މަސައްކަތް ކުރެއްވުމުގެ ވިސްނުމެއް ނުގެންގުޅުއްވާ ކަމަށާއި، އެފަދަ ދުވަހެއް އައިސްފިނަމަ ޕާޓީގެ މެމްބަރުން ބޭނުންވާ ގޮތެއްވެސް އޮންނާނެ ކަމަށް މިނިސްޓަރ ނަހުލާ ވިދާޅުވިއެވެ.

ދާދީފަހުން ޕްރޮގްރެސިވް ކޯލިޝަނުން ޖޭޕީއަށް ގުޅިވަޑައިގެންނެވި މެމްބަރުންގެ ތެރޭގައި ކުރީގެ ނައިބު ރައީސް އަބްދުﷲ ޖިހާދާއި ކުރީގެ ހޯމް މިނިސްޓަރު އަޒްލީން އަހްމަދު، ވިލިމާލެ ދާއިރާގެ ކުރީގެ މެމްބަރު އަހްމަދު ނިހާން ހުސައިން މަނިކު، ކެލާ ދާއިރާގެ ކުރީގެ މެމްބަރު އަލީ އާރިފް، ދާންދޫ ދާއިރާގެ ކުރީގެ މެމްބަރު އަހްމަދު އަސްއަދް, އިނގުރައިދޫ ދާއިރާގެ ކުރީގެ މެމްބަރު އިބްރާހިމް ފަލާހު، އިތުރުން ޕީޕީއެމްގެ ކުރީގެ ޑެޕިއުޓީ ސެކްރެޓަރީ ޖެނެރަލް އިގްބާލް އާދަމް ހިމެނިވަޑައިގަންނަވައެވެ.