ނ ލަންދޫގައި މިސްކިތެއް ޢިމާރާތް ކުރުމަށް 4 މިލިޔަނަށް ވުރެ ގިނަ ރުފިޔާގެ މަޝްރޫޢެއް!
މިއީ 510 މީހުންގެ ޖާގައިގެ މިސްކިތެއް
މިއަދު ބޭއްވުނު ރަސްމިއްޔާތުގެ ތެރެއިން
ނ ލަންދޫގައި މިސްކިތެއް ޢިމާރާތް ކުރުމަށް ހަތަރު މިލިޔަަނަށް ވުރެ ގިނަ ރުފިޔާގެ މަޝްރޫޢެއް ފެށުމަށް ނިންމާ، އެ މަޝްރޫޢުގެ މަސައްކަތް ބަޔަކާއި ޙަވާލުކޮށްފިއެވެ.
210 މީހުންގެ ޖާގައިގެ މި މިސްކިތް ޢިމާރާތްކުރުމުގެ މަޝްރޫޢު ސަރުކާރުން ޙަވާލުކުރީ މާރިސް ކޮންސްޓްރަކްޝަން އާއިއެވެ. 4،494.333.90 (ހަތަރުމިލިއަން ހަތަރުލައްކަ ނުވަދިހަ ހަތަރުހާސް ތިންސަތޭކަ ތިރީސް ތިން ރުފިޔާ ނުވަދިހަ ލާރި) ޚަރަދުކޮށްގެން އެކުންފުންޏާއި މިމަސައްކަތް ޙަވާލުކޮށްފައިވަނީ 210 ދުވަހުގެތެރޭގައި ނިންމާ ގޮތަށެވެ.
މަޝްރޫޢުގެ އެއްބަސްވުމުގައި ސޮއިކުރުމަށް ހޯމަ ދުވަހުގެ ހެނދުނު ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ އޮފް އިސްލާމިކް އެފެއަރޒް ޑރ. އަޙްމަދު ޒާހިރު ޢަލީ ވިދާޅުވީ، މި ސަރުކާރު ވުޖޫދަށް އައުމަށް ފަހު ލަންދޫގައި ގާއިމުކުރުމަށް ނިންމި މިސްކިތަކީ 4 ވަނަ މިސްކިތްކަމަށާއި އޭގެ ތެރެއިން އެއް މިސްކިތުގެ ބިންގާ މީގެކުރިން އަޅާފައިވާކަމަށެވެ.
މިނިސްޓަރ ވިދާޅުވީ ކުރިޔަށް އޮތް ދުވަސްތަކުގައި އެރަށުގެ އެކި ޞަރަޙައްދު ތަކުގައި އައު މިސްކިތްތަކުގެ ބިންގާ އެޅުމަށް ނިންމާފައިވާކަމަށާއި މިސްކިތްތައް އެޅުމަށް ސަރުކާރުން ނިންމަވަނީ އެ ރަށްރަށުގެ ޙާލަތު ރަނގަޅަށް ބެލުމަށްފަހުގައިކަމަށެވެ.
ނ ލަންދޫގައި މިސްކިތެއް ޢިމާރާތް ކުރުމުގެ މަޝްރޫޢުގެ އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއި ކުރެއްވީ މިނިސްޓަރ ޑރ. އަޙްމަދު ޒާހިރު ޢަލީއެވެ. އަދި މާރިސް ކޮންސްޓްރަކްޝަންސްގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ މުހޙައްމަދު ސައީދެވެ.
