ދިވެހި ޕްރިމިއާ ލީގު: ކުޅުންތެރިން ހަމަނުވުމުން މިއަދުވެސް ވިކްޓްރީ މެޗު ކެންސަލް

ދިރާގު ދިވެހި ޕްރިމިއާ ލީގުގައި ވިކްޓްރީ ސްޕޯޓްސް ކްލަބް އަދި ޔުނައިޓެޑް ވިކްޓްރީ ބައްދަލުކުރާ މެޗަށް ވިކްޓްރީއަށް ކުޅުންތެރިން ހަމަނުވުމުން މެޗު ކެންސަލް ކޮށްފިއެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނީ، ވިކްޓްރީ ސްޕޯޓްސް ކްލަބްގެ ކުޅުންތެރިން މެޗު ކުޅުމަށް ހާޒިރުވެފައިނުވާތީ މެޗު ކުޅެފައިނުވާ ކަމަށެވެ.

އާދީއްތަ ދުވަހު ހަވީރު ކުޅުމަށް ހަމަޖެހިފައިވާ މި މެޗު ކެންސަލް ކެންސަލް ކުރުމާއެކު، މެޗުން ޔުނައިޓެޑް ވިކްޓްރީއަށް ތިން ޕޮއިންޓް ލިބޭނެއެވެ. އަދި ވިކްޓްރީއަށް އެފްއޭއެމުން އަދަބުވެސް ދޭނެއެވެ.

މިއީ މި ސީޒަނުގައި ވިކްޓްރީ ހާޒިރުނުވި ތިންވަނަ މެޗެވެ. އަދި މިއީ ފާއިތުވެދިޔަ ދެ ސީޒަނުގެ ތެރޭގައި އެޓީމު ހާޒިރުނުވާ ފަސްވަނަ މެޗެވެ.

މިދިޔަ ސީޒަނުގައިވެސް ވިކްޓްރީ ދެ މެޗަށް ހާޒިރު ނުވެއެވެ. ނަމަވެސް މިދިޔަ ސީޒަނަށްވުރެ މި ސީޒަނުގައި ވިކްޓްރީގެ މާލީ ހާލަތު އިތުރަށް ގޯސްވެފައިވާއިރު، ކުރިޔަށް ހުރި މެޗުތަކުގައިވެސް ޓީމު ހަމަކުރަން އެޓީމަށް ފަސޭހަވާނެ ކަމަށް ނުބެލެވެއެވެ.

މިދިޔަ މަހުގެ 19 ވަނަ ދުވަހު ގްރީން ސްޓްރީޓްސްއާ ދެކޮޅަށް ވިކްޓްރީ ކުޅެން ޖެހޭ މެޗަށް އެޓީމު ހާޒިރު ނުވުމުން އެފްއޭއެމުން ވަނީ 40،000 ރުފިޔާއިން ޖޫރިމަނާކޮށްފައެވެ.

އޭގެ ފަހުން ފ. ނިލަންދޫއާ ދެކޮޅަށް ވިކްޓްރީން ވަނީ ބަދަލު ކުޅުންތެރިން ނުލައި ކުޅެފައެވެ. ނިލަންދޫއާ ދެކޮޅަށް ވިކްޓްރީން އެޓީމުގެ ފުރަތަމަ 11 ހަމަކުރީ ބަދަލު ކީޕަރުން ކުޅުންތެރިންގެ ގޮތުގައި ހިމަނައިގެންނެވެ.