ޕްރިމިއާ ލީގުގައި ޗެލްސީ މޮޅުވިއިރު، ޓޮޓެންހަމް ހޮޓްސްޕާ ކުޅުނު މެޗުން އެޓީމު އެއްވަރުވެއްޖެއެވެ.

ހޮނިހިރު ދުވަހުގެ ރޭ ކުޅުނު މެޗުން ޗެލްސީ މޮޅުވީ ނިއުކާސަލް ޔުނައިޓެޑާ ވާދަކޮށް 0-1 ގެ ނަތީޖާއަކުންނެވެ.

ޗެލްސީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ނިއުކާސަލްގެ ހާފަށް ބާރުބޮޑުކޮށް އެޓީމުން ވަނީ ގިނަ ހަމަލާތައް އުފައްދާފައެވެ.

މި ހާފްގައި ނިއުކާސަލްއަށް ލަނޑު ޖެހުމަށް މާ އެދެވޭ ފުރުސަތުތަކެއް ލިބިފައިނުވާއިރު، އެޓީމުން ވަނީ ރަނގަޅަށް ޑިފެންސްކޮށްފައެވެ. އެގޮތުން ފުރަތަމަ ހާފް ނިމިފައިވަނީ ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ޗެލްސީން އެޓީމުގެ އެޓޭކްތައް ވަރުގަދަކޮށްފައިވާއިރު، ލަނޑު ޖެހުމަށްވެސް ގިނަ ފުރުސަތުތަކެއް އެޓީމަށް ވަނީ ލިބިފައެވެ. ނަމަވެސް އެ ފުރުސަތުތަކުގެ ބޭނުން އެންމެ ރަނގަޅަށް ނުކުރެވެއެވެ.

ޗެލްސީން މެޗުގައި ކާމިޔާބުކުރި ހަމައެކަނި ލަނޑު 73 ވަނަ މިނެޓުގައި ޖެހީ މާކޯ އެލޮންސޯއެވެ. މި ލަނޑަށްފަހުވެސް ޗެލްސީއަށް ވަނީ ލީޑު ފުޅާކުރަން ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ޗެލްސީ އޮތީ ކުޅުނު ނުވަ މެޗުން ލިބުނު 17 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ނިއުކާސަލް އޮތީ ނުވަ މެޗުން ލިބުނު ނުވަ ޕޮއިންޓާއެކު ޕޮއިންޓް ތާވަލުގެ 17 ވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން ޓޮޓެންހަމް އެއްވަރުވީ ވޮޓްފޯޑްއާ ވާދަކޮށް 1-1 ގެ ނަތީޖާއަކުންނެވެ.

ޓޮޓެންހަމް ދަނޑުގައި ކުޅުނު މި މެޗު ފެށިގެން ހަވަނަ މިނެޓުގައި ވޮޓްފޯޑްއިން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޖެންމާޓްގެ އެހީތެރިކަމާއެކު ޑޯކާއެވެ.

މި ލަނޑާއެކު ޓޮޓެންހަމުން އެޓީމުގެ ކުޅުން ރަނގަޅުކޮށްފައިވާއިރު، ލަނޑު ޖެހުމަށްވެސް ފުރުސަތުތަކެއް ހޯދިއެވެ. ނަމަވެސް ވޮޓްފޯޑުން ވަނީ ޓޮޓެނަހަމުން އުފެއްދި ހަމަލާތައް ދިފާއުކޮށްފައެވެ.

ދެވަނަ ހާފް ފެށިގެންވެސް ރަނގަޅަށް ކުޅެމުންދިޔައީ ޓޮޓެންހަމުންނެވެ. އެގޮތުން ފުލުފުލުގައި ހަމަލާތައް އުފައްދަން އެޓީމުން މަސައްކަތް ކުރިއެވެ.

މެޗުގައި ޓޮޓެންހަމްގެ ފަރާތުން ފެނިގެންދިޔަ ހަމައެކަނި ލަނޑު 87 ވަނަ މިނެޓުގައި ކާމިޔާބުކުރީ ޑެލެއަލީއެވެ. މި ލަނޑަށްފަހު ނަގަންވެސް ފުރުސަތުތަކެއް އެޓީމަށް ވަނީ ލިބި ބޭކާރުވެފައެވެ.

މި ނަތީޖާއާއެކު ޓޮޓެނަހަމް އޮތީ ކުޅުނު ނުވަ މެޗުން ލިބުނު 12 ޕޮއިންޓާއެކު ޕޮއިންޓް ތާވަލުގެ ހަތްވަނައިގައެވެ. ވޮޓްފޯޑް އޮތީ ކުޅުނު ނުވަ މެޗުން ލިބުނު ހަތަރު ޕޮއިންޓާއެކު ޕޮއިންޓް ތާވަލުގެ 20 ވަނައިގައެވެ.