''ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސްގެ'' ނަމުގައި މޯލްޑިވިއަން ޑިމޮކްރެސީ ނެޓްވޯކް (އެމްޑީއެން) ފަރާތުން އާންމުކުރި ރިޕޯޓާއު ގުޅިގެން ހާޒިރުކުރަންޖެހޭ މީހުން ހާޒިރުކުރާނެކަމަށާއި، ބައެއް މީހުންނަށް ޗިޓު ފޮނުވާފައިވާކަމަށް މޯލްޑިވިސް ޕޮލިސް ސާރވިސްއިން ބުނެފިއެވެ.

ފުލުހުން މިހެން ބުނެފައިވަނީ، ޖަރުމަނުވިލާތުގައި ހުންނަވައި ބޭރުގެ މީޑިއާއަކަށް ދިން ބަސްދީގަތުމެއްގައި އެ ޖަމިއްޔާގެ އެގްޒެކިއުޓިވް ޑިރެކްޓަރ ޝަހިންދާ އިސްމާއިލް ތަހުގީގަށް އޭނާ ހާޒިރު ކުރުމަށް ޗިޓު ހަވާލު ކުރާނެ އެޑްރެހެއް ހޯދަން ފުލުހުން އޭނާއަށް ގުޅިކަމަށް ވިދާޅުވެފައިވަނިކޮށެވެ. އަދި ޝަހިންދާ ވަނީ ފުލުހުން ޗިޓު ހަވާލުކުރާތާ 14 ދުވަހުގެ ތެރޭގައި އެ އިދާރާއަށް ހާޒިރުވާން އަންގާފައިވާ ކަމަށް ބުނެފައެވެ. ފުލުހުން މިކަން ކަށަވަރަުކޮށް ބުނެފައިވަނީ، އެމްޑީއެންގެ މައްސަލައިގައި ތަހުގީގަށް ހާޒިރުކުރުމަށް ކުރަންޖެހޭ މަސައްކަތް ކުރަމުންދާކަމަށާއި ބައެއް މީހުންނަށް މިހާރު ޗިޓު ހަވާލުކޮށްފައިވާކަމަށެވެ.

އެމްޑީއެންގެ ރިޕޯޓުގައި މާތްﷲ އަށާއި ރަސޫލާ (صلى الله عليه وسلم) އަށް ފުރައްސާރަކޮށްފައިވާ ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. އަދި އާންމުންގެ ފާޑު ކިޔުންތައް އަމާޒުވުމުން އެ ރިޕޯޓް ނެގުމަށް ފަހު އެމްޑީއެންއިން ވަނީ މާފަށް އެދި އެފަދަ ކަމެއް ތަކުރާރު ނުވާނެ ކަމަށް ބުނެފައެވެ.

އެ ރިޕޯޓުގެ މައްސަލަ އިސްލާމިކް މިނިސްޓްރީން ފުލުހުންނަށް ހުށަހަޅާފައިވާއިރު ފުލުހުން ވެސް ވަނީ އެ މައްސަލަ ސީރިއަސް މައްސަލައެއްގެ ގޮތުގައި ތަހުޤީޤު ކުރަމުންދާ ކަމަށް ބުނެފައެވެ. އެ ރިޕޯޓުގެ މައްސަލަ ބެލުމަށްފަހު ޔޫތް މިނިސްޓްރީން ވަނީ އެމްޑީއެންގެ މަސައްކަތްތައް ވަގުތީ ގޮތުން ހުއްޓާލުމަށް އެ ޖަމްއިއްޔާ އަށް އަންގާފައެވެ. އެކަމާއި ގުޅިގެން ޝަހިންދާ ކުރެއްވި ޓްވީޓެއްގައި ވިދާޅުވީ، 2015 ވަނަ އަހަރު ރިޕޯޓް ތައްޔާރުކުރުމުންދާކަން ވެސް އިސްލާމިކް މިނިސްޓްރީ އަށް އެނގޭ ކަމަށެވެ. އަދި މިނިސްޓްރީގެ އިންޓަވިއުވެސް ރިޕޯޓްގައި ހިމަނާފައިވާ ކަމަށް ޝަހިންދާ ވިދާޅުވި އެވެ.