މިސަރުކާރުން އަޅުގަނޑު ނިކަމެތި ކޮށެއް ނުލާނެ: ގާސިމް
19 އޮކްޓޯބަރު 2019 | ހޮނިހިރު 07:06ކުރީގެ ރައީސް ނަޝީދުގެ ސަރުކާރުގައި ހޯމް މިނިސްޓަރުކަމުން އަމިއްލަފުޅަށް އިސްތިއުފާދެއްވީ މަހެއް ނުވަނީސް
ރައީސް އިބްރާހީމް މުހައްމަދު ސޯލިހު އާއި ޖޭޕީގެ ރައީސް ގާސިމް އަދި އަދާލަތު ޕާޓީގެ ރައީސް ޝެއިހު އިމްރާން ހަފްލާއެއްގައި--
ރާއްޖޭގެ މަޝްހޫރު ވިޔަފާރިވެރިޔާ އަދި ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހީމް ނިކަމެމެތިކޮށް ނުލާނެކަމަށް އުއްމީދު އެބައޮތް ކަމަށް އޭނާ ވިދާޅުވެއްޖެ އެވެ.
"އެންމެންގެ ޖުމްހޫރީ ޕާޓީ"ގެ ނަމުގައި ހުކުރު ދުވަހުގެ ރޭ ވީޓީވީން ގެނެސްދިން ޕްރޮގްރާމްގައި ގާސިމް ވިދާޅުވީ ކުރިން ދެ ސަރުކާރުން ވެސް އޭނާއާމެދު އަމަލުކޮށްފައިވަނީ ވަރަށް ދެރަކޮށް ކަމަށާއި، ނަމަވެސް ރައީސް ސޯލިހުގެ މިސަރުކާރުން އެފަދަ ގޮތަކަށް އަމަލު ނުކުރައްވާނެ ކަމަށް އުއަމީދު ކުރައްވާ ކަމަށެވެ.
ގާސިމް ވިދާޅުވީ ރައީސް ސޯލިހުއަކީ ވިސްނުންތެރިކަމާއި ކެތްތެރިކަމާއެކު ކަންކަން ނިންމަވާ ބޭފުޅެއް ކަމަށާއި އެހެންކަމުން ކުރީގެ ސަރުކާރުތަކަށްވުރެ ރަނގަޅަށް ކަންކަން ނިންމަވާނެ ކަމަށް ގަބޫލު ކުރައްވާ ކަމަށެވެ.
ގާސިމް ވިދާޅުވީ އެއްވެސް ބަޔަކާ ދިމާކޮށްލައި، ޒާތީވެ، ފިތުނަވެރިކަމެއް އޮވެގެން ޖުމްހޫރީ ޕާޓީން މަސައްކަތް ކުރަން އެއްވެސް އިރެއްގައި ބޭނުން ނުވާ ކަމަށެވެ.
ކުރީގެ ދެ ސަރުކާރު ނިކަމެތިގޮތްތަކެއް ދިމާވިކަމަށް ގާސިމް އެވިދާޅުވަނީ، ކުރީގެ ރައީސް މައުމޫން އަބްދުލްގައްޔޫމްގެ ވެރިކަން ނިންމުމަށްޓަކައި އޭރުގެ އިދިކޮޅު ޕާޓީތަކުން އެކުގައި ބޮޑު ކޯލިޝަނެއް ހަދައި، 2008 ވަނަ އަހަރު ބޭއްވި ރިޔާސީ އިންތިހާބު ކާމިޔާބު ކުރެއްވި ކުރީގެ ރައީސް މުހައްމަދު ނަޝީދު ސަރުކާރާއި ނިމިދިއަ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރެވެ.
ކުރީގެ ރައީސް ނަޝީދުގެ ވެރިކަން ކަމު ނުގޮސް ، ކެތްތެރިކަން ކުޑަވެ، މަހެއް ނުވަނީސް ހުންނެވި ހޯމް މިނިސްޓަރު ކަމުގެ މަގާމުން ގާސިމް ވަނީ އަމިއްލަފުޅަށް އިސްތިއުފާ ދެއްވާފަ އެވެ. އަދި އޭގެ ފަހުން ރައީސް ނަޝީދުގެ ވެރިކަން "ބަގާވާތަކުން" ވައްޓާލުމަށް އޭރުގެ އިދިކޮޅު ފަރާތްތަކާއެކު މަސައްކަތް ކުރެއްވި އެންމެ އިސް އެއް ފަރާތަކީ ވެސް ގާސިމް އެވެ.
ރައީސް ނަޝީދުގެ ވެރިކަން ވައްޓާލުމަށްފަހު، ވެރިކަމަށް އަރާވަޑައިގެންނެވި ރައީސް މުހައްމަދު ވަހީދުގެ ވެރިކުގައި ވެސް ގާސިމަކީ އެ ސަރުކާރުގެ އިސް ބޭފުޅެކެވެ. އަދި ރައީސް ވަހީދުގެ ވެރިކަން ނިމި، 2013 ވަނަ އަހަރުގެ ރިޔާސީ އިންތިހާބުގެ ފުރަތަމަ ބުރުގައި ގާސިމަށް ބޮޑު ނާކާމިޔާބަކާ ކުރިމަތިވެ، ރިޔާސީ އިންތިހާބުގެ ދެވަނަ ބުރުގައި ރައީސް ނަޝީދުގެ ވެރިކަން ވައްޓާލުމަށް ގާސިމާއެކު މަސައްކަތް ކުރެއްވި ކުރީގެ ރައީސް ޔާމީނާއެކު ކޯލިޝަން ހައްދައި 2013 ވަނަ އަހަރުގެ ރިޔާސީ އިންތިހާބު ކާމިޔާބު ކުރެއްވި އެވެ. ނަމަވެސް ރައީސް ޔާމީނާއެކުވެސް ގާސިމަށް ވަނީ ކުރިއަށް ދެވޭ ގޮތް ނުވެފަ އެވެ. މާގިނަ ދުވަސްތަކެއް ނުވެ، މައްސަލަތައް ދިމާވެ، ޖުމްހޫރީ ޕާޓީ ވަނީ ކޯލިޝަނުން ވަކިވެފަ އެވެ.
ރައީސް ޔާމީން ވެރިކަމަށް ގެންނަވަން ބުރަ މަސައްކަތްތަކެއް ކުރެއްވި ގާސިމް، ޔާމީންގެ ވެރިކަމުގެ ފަހުކޮޅު އޮންނަވަން ޖެހިވަޑައިގެންނެވީ ޖަލުގަ އެވެ.
