އެމްޑީޕީ ބައިބައެއް ނުކުރެވޭނެ، މިއީ ވަރުގަދަ ޕާޓީއެއް: ރައީސް ނަޝީދު
ގިނަ ސިޔާސީ ޕާޓީ ހައްދަވަން ބޭނުމެއް ނޫން
އެމްޑީޕީގެ ކުރީގެ ރައީސް މުހައްމަދު ނަޝީދު ޕާޓީގެ މެންބަރުނާއި ބައްދަލުކުރައްވަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ބައިބައި ކޮށްނުލެވޭނެ ކަމަށް އެޕާޓީގެ ރައީސް, ރައީސް މުޙައްމަދު ނަޝީދު ވިދާޅުވެއްޖެ އެވެ.
ބުރާސްފަތި ދުވަހުގެ ރޭ ދަރުބާރުގޭގައި އެމްޑީޕީގެ މެންބަރުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް ނަޝީދު ވިދާޅުވީ އެމަނިކުފާނަކީ އެންމެ ގިނަ ސިޔާސީ ޕާޓީ ހައްދަވަން އުޅުއްވާ ބޭފުޅާ ނޫން ކަމަށާއި އެމަނިކުފާނު އަބަދުވެސް ގެންގުޅުއްވަނީ އެންމެ ސިޔާސީ ޕާޓީއެއް ގެންގުޅުމުގެ ފިކުރު ކަމަށެވެ.
ރައީސް ނަޝީދު ވިދާޅުވީ ގިނަ ސިޔާސީ ޕާޓީ އެކުލެވޭ ސިޔާސީ ނިޒާމެއް އޮތުން އެއީ އަބަދުވެސް ހިތުގެ އަޑިން ޤަބޫލުކުރައްވާކަމަށެވެ. އެހެންނަނަމެވެސް އެމަނިކުފާނުގެ ވިސްނުމަކީ އަބަދުވެސް އެއްޕާޓީއެއްގައި ދެމިހުރުން ކަމަށެވެ.
އެމްޑީޕީގެ މެންބަރުންނާ މުޚާތަބު ކުރައްވާ ރައީސް ނަޝީދު ވިދާޅުވީ ކުރީގެ ރައީސް މައުމޫން އަބްދުލް ޤައްޔޫމާއި ކުރީގެ ރައީސް ޢަބްދުﷲ ޔާމީންވެސް މިރާއްޖޭގައި މިވަގުތު ރައްޔިތުންނާއެކުގައި އެގޮތަށް އެ އުޅުއްވެވެނީ އެ ބޭފުޅުންނާއި ހުރެކަމަށެވެ.
މީގެ ކުރިން ރާއްޖޭގައި ވެރިކަން ބަދަލުވީމާ ކުރީގައި ވެރިއަކަށް ހުންނަ މީހާއަށް އެހެން ޕާޓީތަކުން އަދި އެހެން ސަރުކާރު ތަކުން ހަދަމުންދިޔަ ގޮތް ފެނިފައިވާނެ ކަމަށް ވިދާޅުވިއެވެ.
މީގެ އިތުރުން ރައީސް ނަޝީދު ވިދާޅުވީ އެމްޑީޕީ އާއި ދިމާލަށް ހުރިހާ ވާދަވެރި ޕާޓީތައް އަބަދުވެސް އަންނާނެ ކަމަށެވެ. އަދި އެބޭފުޅުން މަސައްކަތް ކުރައްވާނީ ޕާޓީގެ ތެރޭގައި ޚިލާފު އުފައްދަން ކަމަށް ވިދާޅުވިއެވެ. އެހެންނަމަވެސް އެމްޑީޕީ އެއަށް ވުރެ ބަދަހި ކަމަށާއި، ފެންނަނީ އެހެން ޕާޓީތަކުގެތެރޭގައި ޚިލާފު އުފެދިގެން އުޅޭ މަންޒަރުކަމަށެވެ.
އެހެން ނަމަވެސް އެމްޑީޕީގެ މެންބަރުންގެ ސާބިތުކަން ގުޑުވައި ނުލެވޭނެ ކަން ޔަގީން ކަށަވަރު ކަމަށް އެމަނިކުފާނު ވިދާޅުވިއެވެ.
