އިމާރޖެންސީ ހާލަތުގައި ބަލި މީހުން މާލެ ގެންދިއުމަށް ދިމާވާ ދަތިތައް ހައްލުކޮށްދޭނަން: ރައީސް
16 އޮކްޓޯބަރު 2019 | ބުދަ 19:17ހޮސްޕިޓަލްގެ އާ އިމާރާތް ފަރުމާކޮށް ނިމި، އެކަމަށް ބޭނުންވާ ފައިސާވެސް ބަޖެޓުގައި ހަމަޖެހިޖެހިފައިވާ ކަމަށް ވިދާޅުވި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
އިމާރޖެންސީ ހަލާތްތަކުގައި ބަލިމީހާ މާލެ ގެންދިއުމަށް ދިމާވާ ދަތިތަކަށް ހައްލެއް ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު މިހެން ވިދާޅުވީ ދ. އަތޮޅުގެ ސިއްހީ ހިދުމަތަށް 50 އަހަރު ފުރުމާއި ގުޅިގެން ބޭއްވި ޚާއްސަ ރަސްމިއްޔާތުގައި ވާހަކަދައްކަވަމުންނެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސް ސޯލިހު ވިދާޅުވީ އަތޮޅުތަކުގެ ހޮސްޕިޓަލްތަކަށް 50 އަހަރު ފުރިގެން އެކަން ފާހަގަކުރި ނަމަވެސް އެންމެ އެކަށީގެންވާ ފެންވަރަށް ސިއްހީ ހިދުމަތް ލިބެން ނެތްކަން ގަބޫލު ކުރައްވާކަމަށެވެ.
ރައީސް ސޯލިހު ވިދާޅުވީ ދ. ކުޑަހުވަދޫ ހޮސްޕިޓަލްގެ ހިދުމަތްތަކަށް ހެޔޮ ބަދަލުތަކެއް އަންނާނެ ދުވަސްތަކެއް ފެނިގެންދާނެ ކަމަށެވެ. އަދި އެ ހޮސްޕިޓަލްގެ އާ އިމާރާތް ފަރުމާކޮށް ނިމި، އެކަމަށް ބޭނުންވާ ފައިސާވެސް ބަޖެޓުގައި ހަމަޖެހިޖެހިފައިވާ ކަމަށެވެ. ރައީސް ސޯލިހު ވިދާޅުވީ އެ ހޮސްޕިޓަލުގެ އާއިމާރާތުގެ އަމަލީ މަސައްކަތް ރޭވިފައިވާ ގޮތަށް ކުރިއަށް ދާނެ ކަމަށެވެ.
ރަސްމިއްޔާތުގައި ވާހަކަަދައްކަވަމުން ރައީސް ސޯލިހު ވިދާޅުވީ ހޮސްޕިޓަލް ތަރައްގީކުރުމުގެ އިތުރުން، ސްކޫލަށްވެސް ބޭނުންވާ އިތުރު ވަސީލަތްތައް ގާއިމުކޮށްދެއްވާނެ ކަމަށެވެ. އަދި މަގުތައް ހަދާ، ފެރީ ޓަރމިނަލް ހެދުމުގެ އިތުރުން ރަށަށް ބޭނުންވެފައިވާ މަސްމާރުކޭޓަކާއި އަތޮޅުގެ މީހުން ބާނާ މަސް ފަސޭހައިން ގަނެވޭނެ އިންތިޒާމް ހަމަޖައްސަވާދެއްވާނެ ކަމަށެވެ.
ރައީސް ސޯލިހު ވިދާޅުވީ ޒުވާނުންނަށް ބޭނުންވާ ކުޅިވަރުތައް ކުޅެވޭނެ އިންތިޒާމް ހަމަޖެހުމުގެ އިތުރުން އެރަށުގައި ޒޯން ރަނގަޅު ފެންވަރުގެ ސްޓޭޑިއަމްއެއް ގާއިމުކުރެވިގެންދާނެ ކަމަށެވެ.
