މަގާމުގައި ހުންނެވިިހާ ދުވަހަކު، ފެންވަރު ދަށް މުވައްޒަފުންނަށް ފިޔަވަޅު އަޅާނަން: މިނިސްޓަރ ނަހުލާ
މިހާތަނަށް ފިޔަވަޅު އަޅާފައިވާނީ ޕަރފޯރމަންސް ދަށް މުވައްޒަފުންނާ މެދު އެކަނި
މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ
މަގާމުގައި ދެމި ހުންނެވިހާ ދުވަހަކު، ހިދުމަތް ހޯދަން އަންނަ ފަރާތްތަކަށް ދަށް ފެންވަރުގެ ހިދުމަތްދޭ މުވައްޒަފުންނާ މެދު ފިޔަވަޅު އަޅުއްވާނެ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވެއްޖެއެވެ.
މިނިސްޓަރ އައިޝާ މިހެން ވިދާޅުވީ ޓްރާންސްޕޯޓް މިނިސްޓްރީގެ މަސައްކަތްތަކާއި ބެހޭގޮތުން، ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައާ ބެހޭ ކޮމިޓީއަށް މައުލޫމާތު ދެއްވުމަށް ވަޑައިގެން ވާހަކަފުޅު ދައްކަވަމުންނެވެ. ހޯމަ ދުވަހު އޮތް ކޮމިޓީގެ ބައްދަލުކުރެއްވުމުގައި މިނިސްޓަރ މިހެން ވިދާޅުވީ، ތުލުސްދޫ ދާއިރާގެ މެމްބަރު އިބްރާހިމް ނަސީރު ކުރެއްވި ސުވާލަކަށް ޖަވާބުދާރީ ވެވަޑައިގަންނަވަމުންނެވެ.
ސިވިލް ސަރވަންޓުން ވަކިކުރުމާ ވަޒީފާ ދިނުމަކީ، މިނިވަން މުއައްސަސާއެއް ކަމުގައިވާ ސިިވިލް ސަރވިސް ކޮމިޝަނުން ކުރައްވަމުން ގެންދަވާ މަސައްކަތެއްކަން ފާހަގަކުރައްވާ މިނިސްޓަރ ވިދާޅުވީ، މިހާތަނަށް އެ މިނިސްޓްރީން ފިޔަވަޅު އަޅާފައިވާނީ ޕަރފޯމަންސްގެ މަައްސަލަތަކާއި ހާޒިރީގެ މައްސަލަތައް އުޅޭ މުވައްޒަފުންނަށް އެކަނި ކަމުގެ ޔަގީންކަން ކޮމިޓީއަށް ހާޒިރުވެވަޑައިގެން ތިއްބެވި މެމްބަރުންނަށް އަރުވާފައެވެ.
މިނިސްޓަރ އައިޝާ އިތުރަށް ވިދާޅުވީ ދެވޭ ހިދުމަތުގެ ފެންވަރު ދަށްވުމަކީ އެއްވެސް ވަރަކަށް ބަލައިގަންނާނެ ކަމެއް ނޫން ކަމަށާއި، ކުރިޔަށް އޮތް ތަނުގައި ވެސް ފެންވަރު ދަށް މުވައްޒަފުންނާ ދެކޮޅަށް ފިޔަވަޅު އަޅާނެ ކަމަށް ވިދާޅުވެފައެވެ. މިނިސްޓަރ ވިދާޅުވީ އެކަމަނާއަކީ ވެސް ރައްޔިތުންގެ ހާދިމެއް ކަމަށާއި، އަދި އެކަމަނާގެ ވެރިޔަކީ ރައްޔިތުން ކަމަށެވެ.
މިނިސްޓަރ މިހެން ވިދާޅުވެފައި މިވަނީ، ޓްރާންސްޕޯޓް މިނިސްޓްރީން ނުހައްގުން މީހުން ވަޒީފާއިން ވަކިކުރާ ކަމުގެ އަޑުތަކެއް އިވެމުންދާ ދުވަސް ކޮޅެއްގައެވެ. އަދި މިނިސްޓަރ ނަހުލާ އެތަނުގެ މުވައްޒަފުން ކުޑައިމީސްކޮށް ޓްރާންސްޕޯތް އޮތޯރިޓީގެ މުވައްޒަފުންނާ މެދު ވާހަކަ ދައްކާކަމަށް ބުނާ އޯޑިއޯއެއް މިފަހުން ލީކުވެފައިވެއެވެ. ނަމަވެސް، މި އޯޑިއޯއާ ގުޅިގެން މިނިސްޓަރއަށް ވަނީ ގިނަ ބައެއްގެ ތައުރީފް ލިބިފައެވެ. އަދި ޓްރާންސްޕޯޓް އޮތޯރިޓީގައި މަސައްކަތްކުރާ މުވައްޒަފުން މަސައްކަތަށް ފަރުވާ ކުޑަކަމަށް ގިނަ ބަޔަކު އަޑުއުފުލާފައިވެއެވެ.
