ވަގު ޕާސްޕޯޓުގައި އެތެރެވާން އުޅުނު މީހާކާއި އޭނާއަށް އެހީތެރިވި މީހަކު އަތުލައިގަނެފި
މިހާތަނަށް 18 މީހަކު ވަނީ ހުއްޓުވާފައި
ވަގު ޕާސްޕޯޓުގައި އެތެރެވާން މަސައްކަތް ކުރި ބިދޭސީ އަންހެން މީހާ އަދި އޭނާއަށް އެކަމުގައި އެހީތެރިވި ބިދޭސީ ފިރިހެން މީހާ
ޕާސްޕޯޓުގެ ބައެއް ނަކަލުކޮށްގެން ރާއްޖެއަށް އެތެރެވާން އުޅުނު މީހާކާއި، އޭނާ އެތެރެވުމަށް އެހީތެރިވެދިން މީހަކު އަތުލައިގެންފިއެވެ.
އިމިގްރޭޝަނުން ބުނީ ޕާސްޕޯޓުގެ ބައެއް ނަކަލުކޮށްގެން (ކައުންޓަރފެއިޓް) ވެލާނާ އިންޓަރނޭޝަނަލް އެއާޕޯޓުން ރާއްޖެއަށް އެތެރެވުމަށް މަސައްކަތްކުރި ބިދޭސީ އަންހެނަކާއި، އަދި މިކަމުގައި އޭނާއަށް އެހީތެރިވާން އުޅުނު އިތުރު ބިދޭސީ ފިރިހެނެއް އިމިގްރޭޝަނުން ހުއްޓުވާފައިވާ ކަމަށެވެ.
މި މައްސަލައިގައި އަތުލައިގަނެވުނު ދެ މީހުންނާ ގުޅޭ އިތުރު ތަފްސީލެއް އިމިގްރޭޝަނުން ހާމައެއް ނުކުރެއެވެ.
އިމިގްރޭޝަނުން ވަނީ މީގެ ކުރިން ވެސް ޝަހުސު އޮޅުވާލައިގެން ވެލާނާ އިންޓަރނޭޝަނަލް އެއާޕޯޓް މެދުވެރިކޮށް އެތެރެވާން އުޅުނު ބަޔަކު ހުއްޓުވާފައެވެ. އަދި ފަހަކަށް އައިސް މިފަދަ މައްސަލަތައް އިތުރުވަމުން އަންނަ ކަމަސް ވެސް އިމިގްރޭޝަނުން ބުނެއެވެ.
އިމިގްރޭޝަނުން ބުނީ މި އަހަރުގެ މިހާތަނަށް 18 މީހަކު ޕާސްޕޯޓް ނަކަލުކޮށްގެންނާއި، ވަގު ޕާސްޕޯޓުގައި އެތެރެވާން މަސައްކަތް ކޮށްފައިވާ ކަމަށެވެ.
