މިސަރުކާރުގައި ތޮއްޑޫގެ ތަރައްގީއަށް އެތައް ކަމެއް ފަހިވެގެންދާނެ: ރައީސް ނަޝީދު
10 އޮކްޓޯބަރު 2019 | ބުރާސްފަތި 17:46ސްކޫލު ތަރައްގީ ކުރުމަށް ޚާއްސަ ޕްރޮގްރާމްތައް ހިންގިގެންދާނެ
ތޮއްޑޫ ސްކޫލުގެ އިނާމު ދިނުމުގެ ޖަލްސާގެ ތެރެއިން
ސަރުކާރުގެ އެކިއެކި މަޝްރޫއުގެ ތެރެއިން އއ. ތޮއްޑޫގެ ތަރައްގީއަށް އެތައް ކަމެއް ފަހިވެގެންދާނެ ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ތޮއްޑޫ ސްކޫލުގެ އިނާމު ދިނުމުގެ ޖަލްސާ ޝަރަފުވެރިކޮށްދެއްވާ ރައީސް ނަޝީދު ވިދާޅުވީ ތޮއްޑޫގެ ތަރައްގީއަށް ގިނަ މަސައްކަތްތައް ކުރެވޭއިރު، ޚާއްސަކޮށް ސްކޫލު ތަރައްގީ ކުރުމަށް ކުރިއަށް އޮތް ފަސް އަހަރު ދުވަހުގެ ތެރޭގައި ގިނަގުނަ ޕްރޮގްރާމްތައް ހިންގިގެންދާނެ ކަމަށެވެ. ރައީސް ނަޝީދު ވިދާޅުވީ ތޮއްޑޫ ސްކޫލުގައި އަލަށް އިމާރާތް ކުރެވޭ 12 ކްލާސްރޫމާއެކު އެއްދަންފަޅިއަށް ސްކޫލު ބަދަލުވެގެންދާނެ ކަމަށާއި، 12 ކްލާސްރޫމާއެކު މަލްޓިޕާޕަސް ހޯލެއް އިމާރާތް ކުރެވިގެންދާނެ ކަމަށެވެ. އަދި މިއީ ލިބޭ ވަރަށް ބޮޑު ކުރިއެރުމެއް ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ތޮއްޑޫ ދަރިންނަކީ އެކިދާއިރާތަކުން ގައުމަށް ރީތިނަން ގެނައުމުށް ވިދަމުން އައިސްފައިވާ ބައެއް ކަމަށާއި، އުޖާލާ މުސްތަގުބަލަކަށް ވާސިލްވުމަށް ގަދައަޅާ މަސައްކަތް ކުރާ ބައެއް ކަމަށެވެ.
އެހެންކަމުން މަތީތައުލީމަށް ކިޔެވުމަށް އަމިއްލަ ރަށްދޫކޮށްދާއިރު އަބަދު ވެސް ރަށް މަތިން ހަނދުމަ ކުރުމަށް އެމަނިކުފާނު އިލްތިމާސްކުރެވިއެވެ.
