ގައިދީން ފޮނުވި 16 ސިޓީގައި ހުރި މައްސަލަތައް ބަލަނީ!
9 އޮކްޓޯބަރު 2019 | ބުދަ 10:5916 ސިޓީގެ ޚުލާސާއެއް ތައްޔާރުކޮށްފައިވާ ކަމަށް
މާލޭ ޖަލު
ޖަލުތަކުން ރައީސް ނަޝީދަށް ފޮނުވާފައިވާ 16 ސިޓީއެއް ބެލުމަށް ރައްޔިތުންގެ މަޖިލީހުގެ ހިއުމަންރައިޓްސް އެންޑް ޖެންޑަރ ކޮމިޓީއަށް ފޮނުވައިފިއެވެ.
ބުދަ ދުވަހުގެ ރައްޔިތުންގެ މަޖިލިސް ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ފާއިތުވި 3 މަސް ދުވަހުގެ ތެރޭގައި ރާއްޖޭގެ އެކި ޖަލުތަކުން އެ މަނިކުފާނަށް 16 ސިޓީއެއް ލިބިވަޑައިގެންފައިވާ ކަމަށެވެ. މި ސިޓީތަކަކީ ޖަލުތަކުގައި ތިބި މީހުންގެ ކަންބޮޑުވުންތަކާއި އުދާސްތައް ބަޔާންކޮށް އެ މީހުން ފޮނުވާފައިވާ ސިޓީތައް ކަމަށް އެ މަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ އެ 16 ސިޓީގެ ޚުލާސާއެއް އެ މަނިކުފާނު ތައްޔާރުކޮށްފައިވާ ކަމަށާއި، އެ ޚުލާސާ އާއިއެކު 16 ސިޓީގައި ހިމެނޭ ކަންތައް ބެލުމަށް މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ފޮނުވާ ކަމަށެވެ.
ރާއްޖޭގެ ޖަލުތަކުގެ ހާލަތު ބެލުމުގެ ގޮތުން ޖަލުތަކާއި ބެހޭ އޮޑިޓެއް ސަރުކާރުން ވަނީ ހަދާފައެވެ. އޮޑިޓްގައިވާ ގޮތުން ޖަލުތަކުގެ ހާލަތު އަދިވެސް އޮތީ ކަންބޮޑުވާންޖެހޭ ފަދަ ހާލަތެއްގައެވެ. ޖަލުތަކުގައި އަނިޔާ ކުރާ ކަމަށާއި، ޖަލުތަކުގައި އެކަށީގެންވާ މިންވަރަށް ވުރެ ގިނައިން ގޮޅިތަކުގައި ކުށްވެރިން ގެންގުޅުން ފަދަ ގިނަ މައްސަލަތައް ޖަލުއޮޑިޓްގައި ވަނީ ފާހަގަކޮށްފައެވެ.
ޖަލުތަކުގެ އޮޑިޓް ރިޕޯޓްގައި ރަނގަޅު ކުރަން ބުނެފައިވާ ކަންކަން ރަނގަޅު ކުރުމަށް ފުރިހަމަކުރަންޖެހޭ ކަންކަން ރަނގަޅު ކުރުމަށް ކަރެކްޝަނަލް ސާރވިސްއަށް ހޯމް މިނިސްޓަރ އިމްރާން އަބްދުﷲ ވެސް ވަނީ ގޮވާލައްވާފައެވެ.
