ކުންފުނިތަކުގެ އިމާރާތްތައް މަރާމާތުކޮށް ބެލެހެއްޓުމާ ގުޅޭ މަސައްކަތު ބައްދަލުވުމެއް ފެށިއްޖެ
މި ވޯކްޝޮޕްގައި ޕްރިވެންޓިވް މެއިންޓެނަންސް ނެތް ކަމަށްވާނަމަ ދިމާވާނެ މާލީ ގެއްލުންތަކާ ބެހޭ ސެޝަންތަކެއް ނަގައިދޭނެ
އެޗްއާރް ކުންފުންޏަކީ ލަންކާގެ ބޮޑެތި ކުންފުނިތަކައް މެއިންޓެނެސް މެނޭޖްކުރާނެ ގޮތް ދަސްކޮށްދެމުން އަންނަ ކުންފުންޏެއް
ސްރީލަންކާގެ އެޗްއާރް ޑިވެލޮޕްމެންޓްގެ ފަރާތުން ކުރިއަށް ގެންދާ ކުންފުނިތަކުގެ އިމާރާތްތައް މަރާމާތުކޮށް ބަލަހައްޓާނެ ގޮތްތައް ދަސްކޮށްދޭ މަސައްކަތު ބައްދަލުވުމެއް ފެށިގެން ކުރިއަށް އެބަދެއެވެ.
މޫކައި ހޮޓެލްގައި ކުރިއަށްދާ މި ބައްދަލުވުން އިއްޔެ ފެށިފައިވާއިރު، ބައްދަލުވުން ނިންމުމުގެ ރަސްމިއްޔާތު އޮތީ 8 ވަނަ ދުވަހުގެ ހަވީރުއެވެ.ސްރީލަންކާގެ އެޗްއާރް ޑިވެލޮޕްމެންޓް ކުރިއަށް ގެންދާ މި މަސައްކަތު ބައްދަލުވުމަކީ މެއިންޓެނެންސް އިންޖިނިއަރުންނާއި، މެއިންޓެނެންސް މެނޭޖަރުންގެ އިތުރުން މިދާއިރާގައި މަސައްކަތްތައް ކުރައްވާ ފަރާތްތަކަށް އަމާޒުކޮށްގެން ކުރިއަށް ގެންދެވޭ މަސައްކަތު ބައްދަލުވުމެކެވެ.
މިމަސައްކަތު ބައްދަލުވުމުގައި ސެޝަންތައް ނަންގަވައިދެއްވަނީ ބައިނަލްއަގްވާމީ ގޮތުން މިދާއިރާގައި ފާހަގަކޮށްލެވޭ ފުންނާބު އުސް ފަރާތްތަކުންނެވެ. އަދި ގިނަގުނަ މުހިންމު މައުލޫމާތުތަކެއް މިމަސައްކަތު ބައްދަލުވުމުގައި ފޯރުކޮށްދޭނެއެވެ.
އޭގެ ތެރޭގައި ޕްރިވެންޓިވް މެއިންޓެނަންސްގެ ބޭނުން ނުހިފާނަމަ އޯގަނައިޒޭޝަންއަށް ކުރިމަތިވާ ގޮންޖެހުންތަކާއި، އެންމެފަހުގެ ޒަމާނީ މެއިންޓެނަންސް މެނޭޖްމެންޓާއި، މެއިންޓެނަންސްގެ ބާވަތްތަކާއި އަދި އަމަލީ ގޮތުން މިކަމުގައި ބޭނުންކުރާ އެކި އުކުޅުތަކާއި ވަސީލަތްތައް ކިޔަވައިދޭނެއެވެ. މީގެ އިތުރުން ޕްރިވެންޓިވް މެއިންޓެނަންސް ނެތް ކަމަށްވާނަމަ ދިމާވާނެ މާލީ ގެއްލުންތަކާ ބެހޭ ގޮތުން މުހިންމު ސެޝަންތަކެއް ނަގައިދޭނެއެވެ.
މި ބައްދަލުވުމުގައި ރާއްޖޭގެ މަޝްހޫރު ކުންފުނިތައް ކަމަށްވާ އެސްޓިއޯ، އެމްޓީސީސީ އަދި ބައެއް ރިސޯޓްތައް ބައިވެރިވެއެވެ. ސްރީލަންކާގެ އެޗްއާރްއިން ބުނީ މީގެ ދެވަނަ ވޯކް ޝޮޕް މާދަމާ ފެށޭނެ ކަމަށާއި،އެ ވޯކްޝޮޕް ކުރިއަށް ދާނީ 9 ވަނަ ދުވަހުގެ ނިޔަލަށް ކަމަށެވެ.
