ޖިންސީ ގޯނާގެ ތުހުމަތުގައި ހައްޔަރުކުރި ގައުމީ ކްރިކެޓް ޓީމުގެ ކޯޗު އާސިފް ޚާންގެ މައްސަލައިގައި ފުލުހުންނަށް ދޭންޖެހޭ އެއްބާރުލުން ޔޫތު މިނިސްޓްރީގެ ފަރާތުން ލިބޭނެ ކަމަށް އެ މިނިސްޓްރީން ބުނެފިއެވެ.

ހޯމަ ދުވަހު ޔޫތު މިނިސްޓްރީން ނެރުނު ބަޔާނެއްގައި ބުނީ، ގައުމީ ކްރިކެޓް ޓީމުގެ ކޯޗު އާސިފް ޚާން ކޯޗިން ސެޝަންތަކެއްގެ ތެރެއިން ބައެއް ކުދިންނަށް ޖިންސީ ގޯނާ ކުރިކަމުގެ މައްސަލަ ކްރިކެޓް ބޯޑަށާއި، މޯލްޑިވްސް ޕޮލިސް ސަރވިސްއަށް ހުށަހަޅާފައިވާ ކަމުގެ މައުލޫމާތު ލިބިފައިވާ ކަމަށެވެ.

އެގޮތުން އެ މައްސަލައަކީ ގައުމީ ޓީމެއްގެ ކޯޗަކާއި ގުޅޭ މައްސަލައެއް ކަމުގައި ވިޔަސް އެއީ ޖިނާއީ މައްސަލައެއް ކަމުން އެކަން ތަހުގީގު ކުރުމުގެ ހުރިހާ ކަމެއް ކުރިޔަށް ގެންދަންވާނީ ފުލުހުން ކަމަށްވެސް ޔޫތު މިނިސްޓްރީން ބުނެއެވެ.

މި މައްސަލައާ ގުޅިގެން ފުލުހުން ވަނީ ހޮނިހިރު ދުވަހު އާސިފް ހައްޔަރުކޮށްފައެވެ. އޭނާ ހައްޔަރުކުރީ ފުރަން އެއަރޕޯޓުގައި ހުއްޓައެވެ. ނަމަވެސް މުއްދަތު ޖެހުމަށް އާދީއްތަ ދުވަހު ކޯޓަށް ގެންދިޔުމުން 24 ގަޑިއިރު ފާއިތުވުމާ ގުޅިގެން ކްރިމިނަލް ކޯޓުން ވަނީ އޭނާ ދޫކޮށްލާފައެވެ.

މައުލޫމާތު ލިބިފައިވާ ގޮތުގައި ޒުވާން ކްރިކެޓް ކުޅުންތެރިންނަށް އާސިފް ވަނީ އެކި ފަހަރު މަތިން ޖިންސީ ގޯނާ ކޮށްފައެވެ. އަދި އޭގެ ތެރޭގައި އޭނާ އެ އަމަލު ހިންގި ކަމަށް ތުހުމަތު ކުރެވޭ 18 އަހަރު ނުފުރޭ ކުޅުންތެރިންވެސް ހިމެނޭ ކަމަށްވެއެވެ.

މީގެއިތުރުން އާސިފްގެ މައްސަލަ ފެންމަތިވެފައި އޮއްވައި، އޭނާއަށް އެއްވެސް ފިޔަވަޅެއް ނާޅައި ރާއްޖެއިން ފުރުވާލަން ކްރިކެޓް ބޯޑް އޮފް މޯލްޑިވްސްއިން މަސައްކަތް ކުރި ކަމަށްވެސް އަޑުތައް ވަނީ ފެތުރިފައެވެ.