ދީނަށް ފުށުއަރާ ފޮތްތައް ކިޔަވައިދޭން ބޭނުންކުރާ ކަމުގެ ޝަކުވާ ލިބޭ
މައްސަލަ ބަލަމުންދާ ކަމަށް ވިދާޅުވި
އެޑިއުކޭޝަން މިނިސްޓްރީގެ ބޭފުޅުން މަޖިލީހުގެ ކޮމިޓީގައި
ދީނަށް ފުށުއަރާ ފޮތްތައް ސްކޫލުތަކުގައި ކިޔަވައިދޭން ބޭނުންކުރާ ކަމުގެ ޝަކުވާ ބެލެނިވެރިންގެ ފަރާތުން ލިބިފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
ހޯމަ ދުވަހު އޮތް ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކަ ކޮމިޓީއަށް އެޑިއުކޭޝަން މިނިސްޓްރީގެ އިސްބޭފުޅުން ވަނީ ހާޒިރުކޮށްފައެވެ.
އެޑިއުކޭޝަން މިނިސްޓްރީން ކުރަމުންދާ އެންމެ ފަހުގެ މަސައްކަތް ކޮމިޓީއާ ހިއްސާ ކުރައްވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ އަބްދުﷲ ރަޝީދު އަހުމަދު ވިދަޅުވީ، ސަރުކާރުގެ 100 ދުވަހުގެ ވައުދުތަކުގެ ތެރޭގައި ހިމެނޭ ކަންތައްތަކުގެ ތެރެއިން، ކިޔަވާ މަންހަޖު ތަންފީޒު ކުރުމަށް އިތުރަށް ރަނގަޅު ކުރަން ޖެހޭ ކަންތައްތަކާއި ބެހޭ ގޮތުން ދާދި ފަހުން ކަރިކިއުލަމް މަހާސިންތާ އެއް ބާއްވަފައިވާ ކަމަށެވެ.
އެ މަހާސިނަތްގާއި ފާހަގަކުރެއްވުނު ކަންތައްތަކަށް އަލިއަޅުވައިލަމުން ޑރ. އަބްދުﷲ ރަޝީދު ވިދާޅުވީ، ކަރިކިއުލަމް ތަންފީޒު ކުރަން ވަގުތު ނުލިބުމާއި، ކުދިންގެ ކިބާގައި ހުނަރު އަށަގަންނަމުން ނުދާކަމުގެ އިތުރުން ޓީޗަރުން އެކަށީގެންވާ ވަރަށް ތަމްރީނުވެފައިނުވާ ކަންވެސް އެމަހާސިންތާ އިން ފާހަގަވެފައިވާ ކަމަށެވެ. އަދި އޭގެ އިތުރުން ދަރިވަރުންގެ ތެރޭގައި ގާބިލިއްޔަތު އަށަނުގަނެވުމުގެ އިތުރުން، ގާބިލިއްޔަތު ''އެސެސް'' ކުރުމާއި ''އެސެސް'' ކުރާނެ ގޮތް އެންމެ ރަނގަޅަށް ޓީޗަރުންނަށް އެނގިފައިނުވާކަންވެސް ވަނީ އެ މަހާސިންތާގައި ދެނެގަނެވިފައެވެ.
އެކަމާއި ގުޅިގެން އިސްލާމް ފޮތްތައް ބެލުމަށްޓަކައި ދީނީ އިލްމުވެރިންގެ ކޮމީޓިތައް އެކުލަވާލައިގެން އެ މަސައްކަތް ފަށާފައިވާ ކަމަށް އެޑިއުކޭޝަން މިނިސްޓްރީން ބުންޏެވެ.
