ގުރުއާނުގައި ސައްހަވެފައިވާ ކަންތަކާއި މެދު ސުވާލުއުފައްދާފައިވާ ކަމަށް
ނޮޅިވަރަމް ދާއިރާގެ މެމްބަރު މުހައްމަދު ނަޝީދު
އިސްލާމް ދީނައް ފުރައްސާރަކުރުމާއި ދެކޮޅަށް މަޖިލީހަށް ކުއްލި މައްސަލައެއް ހުށަހަޅައިފިއެވެ.
ކުއްލި މައްސަލަ މަޖިލީހަށް ހުށަހެޅުއްވީ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲއެވެ.ނަޝީދު ހުށަހެޅުއްވި ކުއްލި މައްސަލައަށް ބަހުސް ކުރަން ފެންނަ ކަމަށް ފަންސާސް ފަސް މެމްބަރުން ވަނީ ވޯޓް ދެއްވާފައެވެ.
ކުއްލި މައްސަލަ މަޖިލީހުގެ ތަޅުމަށް ހުށަހަޅުއްވަމުން ނަޝީދު ވިދާޅުވީ ދިވެހިރާއްޖޭގެ ގާނޫނު އަސާސީގައި 10 ވަނަ މާއްދާގައި ދިވެހި ދައުލަތުގެ ދީނަކީ މާތްވެގެންވާ އިސްލާމްދީން ކަމަށް ކަނޑައަޅާފައިވާ ހިނދު "ޕްރިލިމިނަރީ ރިޕޯޓް އޮން ރެޑިކަލައިޒޭޝަން އިން ދަ މޯލްޑިވްސް" ގެ ނަމުގައި "އެމްޑީއެން" އިން ނެރުނު ރިޕޯޓްގައި މާތްﷲގެ ކުޅަދުންވަންތަ ކަމާއި އެ އިލާހުގެ ވަހީ ބަސްފުޅާއި ކީރިތި ގުރުއާނުގެ ސައްހަކަން ސާބިތުވެފައިވާ ކަންކަމާއި މެދު ސުވާލު އުފައްދާފައިވާ ކަމަށެވެ.
ކުއްލި މައްސަލައަށް ބަހުސްކުރެއްވި މެމްބަރުން ވަނީ އިސްްލާމްދީން ދިފާއުކުރައްވާ ވާހަކަފުޅު ދައްކަވާފައެވެ. އިސްލާމްދީނާއި ދެކޮޅަށް ނެރޭ މިފަދަ ރިޕޯޓްތަކުގެ މައްސަލަ ބަލަންޖެހޭނެ ކަމަށާއި، އަދި އެމްޑީއެންގެ ރިޕޯޓްގެ މައްސަލަ ސަރުކާރުން ބަލަންޖެހޭނެ ކަމަށް މެމްބަރުން ވަނީ ވިދާޅުވެފައެވެ.
ކުއްލި މައްސަލައަށް ވާހަކަފުޅު ދައްކަވަމުން އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ އޭނާ މި މައްސަލަ ބަލައިގަންނަން ވޯޓް ދެއްވީ މިކަން ސަރުކާރުގެ ސަމާލުކަމަށް ގެނައުމުގެ ބޭނުމުގައި ކަމަށެވެ. ޝަރީފް ވިދާޅުވީ އެއްބަޔަކު އަނެއްބަޔަކަށް އިނގިލި ދިއްކުރުމަކީ ޒިންމާދާރު ކަމެއް ނޫން ކަމަށާއި، މި ބާވަތުގެ ކަންކަން ދިމާވީމައި ދައުލަތުގެ ކަމާއި ބެހޭ އިދާރާތަކުން ފިޔަވަޅު އަޅަންވާނެ ކަމަށެވެ.އަދި ފިޔަވަޅު އަޅުއްވާނެ ކަމަށް ގަބޫލުކުރައްވާ ކަމަށް ޝަރީފް ވިދާޅުވިއެވެ.
ރަސޫލާއަށް ހަޖޫ ޖެހުމަކީ ދިވެހިރާއްޖޭގެ އެއްވެސް ރައްޔިތަކު ބަލައިގަންނާނެ ކަމެއް ނޫން ކަމަށް ވިދާޅުވެ ވާހަކަފުޅު ދައްކަވަމުން ވައިކަރަދޫ ދާއިރާގެ މެމްބަރު ހުސެން ޒިޔާދު ވިދާޅުވީ އެމްޑީއޭގެ ރިޕޯޓްގައި ހުރި ހުރިހާ ކަމެއް އޭނާ ކުއްވެރިކުރައްވާ ކަމަށެވެ.
އެންޓި ޓެރަރިޒަމް ގާނޫނު އައުމާއި އެއްކޮށް ބަޔަކު މީހުން މި ކަން ފެންމަތި ކޮށްފައިވާ ކަމަށް އިޝާރާތް ކުރައްވާ ވާހަކަފުޅު ދައްކަވަމުން މައްޗަންގޮޅި ދެކުނު ދާއިރާގެ މެމްބަރު އަހްމަދު ހައިތަމް ވިދާޅުވީ 2016 ވަނަ އަހަރު 31 ޕޭޖްގެ ރިޕޯޓެއްވެސް އޮތީ އައިސްފައިވާ ކަމަށެވެ. ހައިތަމް ވިދާޅުވީ މިކަން ފެންމަތިވެފައި މި އޮންނަނީ މި ފަހަރު އެންޓިޓެރަރިޒަމް ގާނޫނު އައުމާއި އެއްކޮ ކަމަށާއި، އެންޓި ޓެރަރިޒަމް ޤާނޫނު އައުމާއި އެއްކޮށް ބައެއް މީހުންނަށް ހީވެގެން ދިޔައީ އެ ހިސާބަކުން އެ ބަޔަކު "އިމުއިންވީ"އޭ ކަމަށެވެ. އެބަޔަކަށް ބޭނުންހާ އެއްޗެއް ކިއިދާނެ ކަމަށެވެ.
އެމްޑީއެންގެ ރިޕޯޓާއި ގުޅިގެން މަޖިލީހަށް ކުއްލި ދެ މައްސަލައެއް ހުށަހެޅުނެއެވެ. އެއީ ނަޝީދު ހުށަހެޅުއްވި މައްސަލައިގެ އިތުރުން ޕީއެންސީގެ ޕާލަމެންޓްރީ ގްރޫޕުގެ ލީޑަރު އާދަމް ޝަރީފް އުމަރުވެސް ހުށަހެޅުއްވިއެވެ. އެއްގޮތް ދެ މައްސަލައަށް ވާތީ، ޝަރީފް ހުށަހެޅުއްވި މައްސަލަ އޭނާ ވަނީ އަނބުރާ ގެންދަވާފައެވެ.
އެމްޑީއެންގެ ރިޕޯޓާއި ގުޅިގެން މަޖިލީހަށް ކުއްލި މައްސަލައެއް ހުށަހެޅި ބަހުސްކުރެވެމުން އަންނައިރު، ސަރުކާރުގެ ކަމާއި ބެހޭ އިދާރާތަކުން ވަނީ އެ ރިޕޯޓް ކުއްވެރިކޮށްފައެވެ. އެގޮތުން އިސްލާމިކް މިނިސްޓްރީގެ ފަރާތުން ރިޕޯޓްގެ މައްސަލަ ފުލުހުންގެ އިދާރާއަށް ހުށަހަޅާފައިވާއިރު، އެ އިދާރާއިން އެ މައްސަލަ ބަލާނެ ކަމަށް ވަނީ ބުނެފައެވެ. ރިޕޯޓްގައި ހުރި ވާހަކަތައް މަޖިލީހުގެ ރައީސް މުހައްމަދު ނަޝީދުވެސް ވަނީ ކުއްވެރިކުރައްވާފައެވެ.
