ފަތުރުވެރިކަމުގެ ސިނާއަތުގައި މަސައްކަތްކުރާ ދިވެހިންނަށްވުރެ ގިނައީ ބިދޭސީން
4 އޮކްޓޯބަރު 2019 | ހުކުރު 04:19ފަތުރުވެރިކަމުގެ ސިނާޔަތުގައި މަސައްކަތްކުރާ ދިވެހިންގެ އަދަދަކީ 17،138
ޓޫރިޒަމް މިނިސްޓަރ އަލީ ވަހީދު އަދި ރައީސް އިބްރާހިމް މުހައްމަދު ސޯލިހް
ފަތުރުވެރިކަމުގެ ސިނާޔަތުގައި މަސައްކަތްކުރާ ދިވެހިންނަށްވުރެ ގިނައީ ބިދޭސީންކަމަށާއި، ދިވެހި މުވައްޒަފުންގެ ނިސްބަތް 45 ޕަސެންޓަށް ވުރެ ދަށް 58 ރިސޯޓު ރާއްޖޭގައި އެބައޮތްކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.
ދުނިޔޭގެ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ގާލާ ނައިޓްގައި ފަތުރުވެރިންނަށް ޚިދުމަތްދޭ ތަންތަނާއި މުވައްޒަފުންގެ ސާރވިސް ޗާރޖުގެ އިތުރުން ސަލާމަތީ ކަންކަމާއި ގުޅޭ އިންސްޕެކްޝަންގެ މައުލޫމާތު ހިއްސާކުރައްވަމުން މިނިސްޓަރ ވިދާޅުވީ އެ އިންސްޕެކްޝަންގައި 1000 އަށްވުރެ ގިނަ ފަތުރުވެރިކަމުގެ މަސައްކަތް ކުރާ ފެސިލިޓީއެއް ބަލާފައިވާކަމަށެވެ. އަދި މިހާތަނަށް ފަތުރުވެރިކަމުގެ ދާއިރާގައި މަސައްކަތްކުރާ ޖުމްލަ މުވައްޒިފުންގެ އަދަދެއް ނެތްއިރު، އެ ތަންތަނުގައި 36،301 މީހުން ވަޒީފާ އަދާކުރާކަން އެނގިވަޑައިގެންފައިވާ ކަމަށް މިނިސްޓަރ ވިދާޅުވި އެވެ.
އޭގެތެރޭގައި ގިނައީ ބިދޭސީންކަން ފާހަގަކުރައްވަމުން މިނިސްޓަރ ވިދާޅުވީ ފަތުރުވެރިކަމުގެ ސިނާޔަތުގައި މަސައްކަތްކުރާ 36،301 މީހުންގެ ތެރެއިން 18،947 މީހުންނަކީ ބިދޭސީން ކަމަށާއި، ދިވެހިންގެ އަދަދަކީ 17،138 ކަމަށެވެ. އަދި ދިވެހި މުވައްޒަފުންގެ ނިސްބަތް 45 ޕަސެންޓަށް ވުރެ ދަށް 58 ރިސޯޓު ރާއްޖޭގައި އެބައޮތްކަން ފާހަގަކުރެވިފައިވާކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވިގޮތުގައި އާންމުގޮތެއްގައި ސާރވިސްޗާޖްގެ ގޮތުގައި މުވައްޒިފުންނަށް ދެވިފައިވަނީ 200 ޑޮލަރާއި 500 ޑޮލަރުގެ އަދަދެކެވެ.
އިތުރަށް ވާހަކަދައްކަވަމުން މިނިސްޓަރ ވިދާޅުވީ މި ސަރުކާރާއި ހަވާލުވީއިރު ޓޫރިޒަމް މިނިސްޓްރީގެ ޓްރަސްޓުފަންޑުގައިހުރީ އެންމެ 1.6 މިލިއަން ރުފިޔާ ކަމަށެވެ. ނަމަވެސް އެ އަދަދު 17 މިލިއަނަށް ބަދަލުކުރެވިފައިވާކަމަށާއި، 17 މިލިއަން ރުފިޔާ ޓްރަސްޓުފަންޑުގައި މިވަގުތު ހުރީ ކަމާބެހޭ ފަރާތްތަކުގެ މަސައްކަތުން ކަމަށް މިނިސްޓަ ވިދާޅުވި އެވެ.
ދުނިޔޭގެ ފަތުރުވެރިކަމުގެ ދުވަސް ވަރަށް ފުޅާ ދާއިރާއެއްގައި ރާއްޖޭގައި ފާހަގަކޮށްފައިވާއިރު އެ ދުވަހާއި ގުޅިގެން ވަނީ ވ އަތޮޅުގައި ކެނޯރޭހެއްގެ އިތުރުން ވ ކެޔޮދޫގައި ކަލްޗަރަލް ނައިޓެއްވެސް ބާއްވާފައެވެެ.
މީގެ އިތުރުން ބަރޮސްފަޅުތެރޭގައި 521 މީހުންނާއި އެކު ފްރީޑައިވް ވޮލްޑްރެކޯޑްވެސް ވަނީ ގާއިމުކޮށްފައެވެ. އަދި ރ އަނގޮޅިތީމުގައި ދިވެހި ރާއްޖެ ޑިމޮކްރަސިއަށް ކުރި ދަތުރު ދައްކުވައިދޭ ޓުއަރިސްޓު ވިޒިޓަރ ސެންޓަރުގެ ބިންގާ އަޅާފައިވާއިރު ސްކޫލްކުދިންނަށް ބޭނުން ސުވާލެއް ކުރުމަށް އޯޕަންޑޭ އެއްވަނީ ބާއްވާފައެވެ.
މި ހަރަކާތްތަކަށް އަލިއަޅުވާލައްވަމުން އަލީ ވަހީދު ވިދާޅުވީ ދުނިޔޭގެ ފަތުރުވެރިކަމުގެ ދުވަސް ރާއްޖޭގައި ފާހަގަ ކުރެވިގެންދިޔައީ އީދެއް ގޮތަށް ކަމަށާއި މި ހަރަކާތްތަކުގެ ސަބަބުން ރާއްޖެ ވަރަށް ބޮޑަށް އިޝްތިހާރުވެގެންދިޔަ ކަމަށެވެ.
