އަލިފާން ފުރަތަމަ ރޯވީ ލޯންޗުގައި
ބައުޒަރުތަކުގައި ރޯވެ އަނދަނީ
ހޯމަ ދުވަހު ޓީޖެޓީ ސަރަހައްދުގައި އޮތް ތެޔޮ ބައުޒަރުތަކުގެ ރޯވި އަލިފާންގަނޑު ހާދިސާގައި އެންމެ ބޮޑު އެއްގެއްލުމެއް ލިބުނު އެއްފަރާތަކީ މޫސާ އިބްރާހިމްއެވެ.
މި ހާދިސާގައި 01 ލޯންޗާއި، 06 ބައުޒަރު ބޭނުން ނުކުރެވޭ ވަރަށް އަނދާހުލިވެފައިވާއިރު އޭގެ ތިން ބައުޒަރަކީ، މޫސާ މުޅި އުމުރު ދުވަހު ކުރި ވިޔަފާރިއެވެ. މުޅި ދިރިއުޅުން އެ ވިޔަފާރިއަށް ބަރޯސާވެފައިވާއިރު، އުފަން ރަށް އދ. މަހިބަދޫ ދޫކޮށް މާލެ ބަދަލުވީ ފޮނި އުންމީދުތަކަކާއެކުއެވެ.
މިހާދިސާ ހިނގާ ދިޔަގޮތް ރާއްޖެ.އެމްވީއަށް ކިޔާދެމުން މޫސާ ބުނީ މިފަދަ ހިތާމަވެރި ހާދިސާއެއް ހިނގާފާނެ ކަމަށް އުންމީދު ވެސް ނުކުރާ ކަމަށެވެ. އެތައް ދުވަހެއްގެ މިންނެތް މަސައްކަތް ނެތިދިޔައީ މަދު ސިކުންތު ކޮޅެއްގެ ތެރޭގައި ކަމަށް މޫސަ ބުންޏެވެ.
އަލިފާނުގެ ހާދިސާ ހިނގި ވަގުތު އެތަނުގައި ތިބި މީހުންނާ ހަވާލާދީ މޫސާ ބުނީ ފެޓްރޯލް އަޅަމުންދިޔަ ވަގުތު ލޯންޗް ތެރޭގައި ސިގިރޭޓް ބުއި ކަމަށާއި، 99 އިންސައްތަ ބެލެވެނީ ސިގިރޭޓަކުން ކަނޑާލި އަޅިއަކުން ލޯންޗްގައި ހެދިފައިހުރި އާވީގެ ސަބަބުން ހުޅުގަނޑު ހިފީ ކަމަށެވެ. އަދި އެވަގުތު މެރީޑިއަމް ތެޔޮބައުޒަރުގެ ހޮޅީގައި އަލިފާން ހިފީ ކަމަށާއި، އަލިފާންގަނޑު ފެތުރުނުއިރު ބައުޒަރުތައް ދުރަށް ޖައްސަން ވަގުތުވެސް ނުލިބުނު ކަމަށެވެ.
ހާދިސާގައި ލިބުނު ބޮޑު ގެއްލުމުގެ ވާހަކަ ހިތާމަވެރި އަޑަކުން ހިއްސާކުރަމުން މޫސަ ބުނިގޮތުގައި މި ހާދިސާއިން ވަނީ ގިނަ ފިލާވަޅުތަކެއް ލިބިގެންގޮސްފަ އެވެ.
މޫސަގެ ނަސޭހަތަކީ ބަނދަރުގެ ތޮށިގަނޑާ އެހާ ކައިރީގައި ބައުޒަރު ބާއްވައިގެން ތެޔޮ ނޭޅުމަށެވެ. އަދި ލޯންޗް ސިގިރޭޓް ބުއިން މަނާކޮށް، އެފަދަ ފަރާތްތަކާއިމެދު ފިޔަވަޅު އެޅުމަށް މޫސަ ވަނީ އެދިފަ އެވެ.
އަލުން ވިޔަފާރި ފެށޭނެ ދުވަހެއް ނޭނގުނު ނަމަވެސް މޫސާ އުންމީދު ކުރަނީ ސަރުކާރުގެ އެހީތެރިކަން ލިބި މިކަމުން އަރައިގަނެވޭނެ ދުވަހަކަށެވެ.
މޫސާގެ ތުހުތަމުތައް ތެދުނަމަ މިމައްސަލައަށް އަވަސް ފިޔަވަޅެއް އަޅަން ޖެހެއެވެ. ގާނޫނުގެ ތެރެއިން ރައްޔިތުންނަށް ރައްކާތެރިކަން ކަށަވަރުކޮށްދޭންޖެހެއެވެ. ބައެއްގެ ފަރުވާ ކުޑަ އަމަލެއްގެ ސަބަބުން ގިނަ ބަޔަކު ދިރިއުޅުމަށް ކުރި މަސައްކަތް އަނދާހުލިވެފައިވާއިރު އެރައްޔިތުންނަށް އިންސާފު ލިބެންޖެހެއެވެ. މިއަލިފާނުގެ ހާދިސާގެ ތަހުގީގު ފުލުހުން ކުރިއަށް ގެންދާއިރު ހަތަރު ކުދިންގެ ބައްޕަ މޫސާގެ އިތުރުން އެތައް އާއިލާއެއް ތިބީ ކަމާ ބެހޭ މުއައްސަސާތަކުން ދޭނެ ޖަވާބެއްގެ އިންތިޒާރުގައެވެ.
