ޑރ. ނާޒްގެ "ހޯމް އިކޮނޮމިކްސް އެންޑް ޕަރސަނަލިޓީ ޑިވެލޮޕްމެންޓް ޕްރޮގްރާމް" ފަށައިފި
27 ސެޕްޓެމްބަރު 2019 | ހުކުރު 14:29ޕްރޮގްރާމްގައި އެންމެ އިސްކަމެއް ދީގެން ދަސްކޮށްދެވޭނީ ހޯމް މެނޭޖްމެންޓް ސްކިލްސް
ޕްރޮގްރާމް ފައްޓަވައި ދެއްވީ މަރިއަމް ވަހީދާ
ރާއްޖޭގައި ފުރަތަމަ ފަހަރަށް ހޯމް އިކޮނޮމިކްސް އެންޑް ޕަރސަނަލިޓީ ޑިވެލޮޕްމެންޓް ޕްރޮގްރާމް އެއް ފަށައިފިއެވެ.
މަޝްހޫރު ސައިކޮލޮޖިސްޓް ޑރ. އައިޝަތު އަލީ ނާޒް އިސްނަގައިގެން ފެށި މި ޕްރޮގްރާމް ފައްޓަވައިދެއްވާފައިވަނީ މަރިއަމް ވަހީދާ އެވެ.
ހުކުރު ދުވަހު މިޕްސްޓަރގައި ކުރިއަށް ދިޔަ ހަފްލާގައި ޕްރޮގްރާމް ފައްޓަވައިދެއްވާ ވާހަކަދައްކަވަމުން ވަހީދާ ވިދާޅުވީ، ފިނިޝިންގ ސްކޫލެއް ރާއްޖޭގައި ފެއްޓުމަކީ އޭނާގެ ވަރަށް ބޮޑު ހުވަފެނެއްކަމަށާއި، ޑރ. ނާޒް އިސްނަގައިގެން މިފަދަ ޕްރޮގްރާމެއް ރާއްޖޭގައި ފެއްޓުމުން ވަރަށް އުފާވާ ކަމުގައެވެ. އަދި މި ޕްރޮގްރާމް ކާމިޔާބުކަމާއިއެކު ކުރިއަށް ގެންގޮސް ސްކޫލަކަށް ބަދަލުވަ ދުވަސް ވަރަށް ދެކެން ބޭނުންވާކަމަށް ވެސް ވަހީދާ ވިދާޅުވިއެވެ.
މި ޕްރޮގްރާމްގައި އެންމެ އިސްކަމެއް ދީގެން ދަސްކޮށްދެވޭނީ ހޯމް މެނޭޖްމެންޓް ސްކިލްސްކަން ފާހަގަކޮށް ޑރ. ނާޒް ވިދާޅުވީ ޕްރޮގްރާމް ބޮޑަށް އަމާޒު ކޮށްފައި ވާނީ ސްކޫލް ދައުރު ނިންމާ މުޖުތަމައުއަށް ނުކުންނަ ކުދިންނަށް ކަމަށެވެ. އަދި އަމާޒަކީ ކޮންމެ ކުއްޖަކީވެސް އަމިއްލައަށް ކައްކައި ގޭތެރެ މަސައްކަތްކޮށް، އިތުރު މީހެއްގެ އެހީއާއި ނުލައި ދިރިއުޅެވޭނެ ކުއްޖަަކަށް ހަދައިދިނުން ކަމުގައި ޑރ. ނާޒް ވިދާޅުވިއެވެ.
ޑރ. ނާޒް އިތުރަށް ވިދާޅުވީ، ދެ ޖިންސުގެ ކުދިންނަށް ހާއްސަކޮށްގެން ކުރިއަށްގެންދާ މި ޕްރޮގްރާމްގެ ތެރެއިން ޕާރސަނަލިޓީ ޑިވެލޮޕްމެންޓް ސެޝަންތައްވެސް ކުރިއަށް ގެންދެވޭނެ ކަމުގައެވެ. ބޭނުމަކީ ކުދިންގެ މެންޓަލް ސްޓޭބިލިޓީ ވަރުގަދަ ކުރުން ކަމަށް ޑރ. ނާޒް ވިދާޅުވިއެވެ.
މި ޕްރޮގްރާމްގެ ދަށުން ގޭތެރޭގެ މަސައްކަތްތަކާއި، ކޭކް ކޯހަކާއި، ސެލްފް ގްރޫމިންގ ކޯހެއްގެ އިތުރުން ޕާރސަނަލިޓީ ކޯހެއް ކުރިއަށް ދާނެއެވެ. ކޯސްތައް ނިމި ދިހަ ދުވަހުގެ ތެރޭގައި ކޯހުގެ ބައިވެރިންނަށް ސެޓްފިކެޓް ލިބިގެންދާނެއެވެ.
