މުއާގެ '' ލީނާ'' އައްޑޫ އަށް
27 ސެޕްޓެމްބަރު 2019 | ހުކުރު 13:05މަރަދޫގެ އިތުރުން ހިތަދޫގައި ޝޯތައް އަޅުވާނެ
ލީނާ ފިލްމު ރިލީޒް ކުރުމަށް ބޭއްވި ރަސްމިއްޔާތުގެ ތެރެއިން
މައުސޫމް އަންހެން ކުއްޖެއްގެ މަރުގެ ހާދިސާއެއްގެ މައްޗަށް ބިނާކޮށް ހަދާފައިވާ ފިލްމު "ލީނާ" ގެ ޝޯތަކެއް އަންނަ މަހު އައްޑޫގައި އަޅުވަން ހަމަޖެހިއްޖެއެވެ.
އެ ފިލްމުގެ ޑައިރެކްޓަރ އަބްދުﷲ މުއާޒު(މުއާ) ބުނީ، ފިލްމު ރިލީޒް ކުރި ދުވަހުން ފެށިގެން އައްޑޫގައި ފިލްމު އެޅުވުމަށް ގިނަ ބެލުންތެރިންގެ ރިކުއެސްޓް ލިބެމުންދާތީވެ ފިލްމުގެ ޝޯ ތަކެއް އައްޑޫގައި އެޅުވުމަށް ނިންމާފައިވާ ކަމަށެވެ. ފިލްމު އަޅުވަނީ އައްޑޫ ސިޓީ މަރަދޫގެ އިތުރުން ހިތަދޫގައެވެ. އެގޮތުން މަރަދޫގައި ފިލްމު އަޅުވަނީ އަންނަ މަހު ތިނަކުން ހަތަރަކަށް އެ ރަށު ބޮންޑާގެއެވެ. އަދި ހިތަދޫ ގައި އަޅުވަން ހަމަޖެހިފައިވަނީ އަންނަ މަހު ފަހަކުން ހަޔަކަށް ހިތަދޫ ބިލަބޮން ސްކޫލުގައި ހޯލުގައި ކަމަށް މުއާ ޕްރޮޑަކްޝަނުން މައުލޫމާތުދެއެވެ.
އއ. އުކުޅަހުގައި ނަގާފައިވާ ލީނާ ފިލްމު ޕްރިމިއާ ކޮށްފައިވަނީ ޖުލައި މަހުގެ 24 ވަނަ ދުވަހުއެވެ. ފިލްމަކީ އަސްލު ހާދިސާއެއްގެ މައްޗަށް ހަދާފައިވާ ފިލްމެއް ކަމަށް ބުނެ އާއްމުންގެ ގިނަ ފާޑުކިޔުންތަކަށް އަމާޒުވިއެވެ. އެހެން ނަމަވެސް އެއީ އަޒްލީނާގެ ދިރިއުޅުމުން '' އިންސްޕަޔާ'' ވެގެން ހަދާފައިވާ ފިލްމެއް ކަމަށް މުއާ ވަނީ ބުނެފައެވެ. މުއާ ބުނީ، އޭގެ ސަބަބުން ފިލްމަށް މާ ބޮޑު އަސަރެއް ނުކުރާ ކަމަށާއި، ފިލްމު ވަރަށް ކާމިޔާބު ކަމަށެވެ.
