ސަރުކާރުގެ ތެރެއިން ކަންތައްތަކެއް ހޯއްދަވަން އުޅުއްވާ ކަމަށް ދެކެވޭ ވާހަކަ އަކީ ތެދެެއް ކަމަށާއި، ރަނގަޅު ގޮތުގައި ސަރުކާރުން ކަންތައްތައް ހޯއްދަވަން ބޭނުންފުޅުވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ޖުމްހޫރީ ޕާޓީއާ އަލަށް ގުޅުނު މެމްބަރުން ސޮއިކުރުމަށް އަންގާރަ ދުވަހުގެރޭ މ. ކުނޫޒް ގައި ބޭއްވި ރަސްމިއްޔާތެއްްގައި ވާހަކަ ދައްކަވަމުން ގާސިމް ވިދާޅުވީ، ގައުމުގެ ކުރިއެރުމަށާއި، ގައުމަށް ފައިދާ އާއި މަންފާ ލިބިގަތުމަށްޓަކައި ކުރެވޭ މަސައްކަތުގައި އިސްލާމްދީނުގެ އުސޫލުތަކުން ނެއްޓިގެން ނުދާހާ ހިނދަކު ޖޭޕީގެ ފަރާތުން ސަރުކާރަށް އެއްބާރުލުން ލިބޭނެ ކަމަށެވެ. އެހެން ނަމަވެސް ވަކި ފަރާތަކަށް، ވަކި ގައުމަކަށް ތާއިދު ކުރުމުގެ ގޮތުން ނުވަތަ ވަކި މީހަކަށް އަނިޔާ ދިނުމުގެ ގޮތުން ކުރާ ކަންތައްތަކުގައި ހައްގު ބަސް ބުނުމަށް އަބަދުވެސް އެ ޕާޓީ ދެމިތިބޭނެ ކަމަށް ވިދާޅުވިއެވެ.
ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރުކަންވެސް ކުރައްވާ ޤާސިމް ވިދާޅުވީ، އެފަދަ ކަންތައްތަކަކީ ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހުއާ ''ޖެހިގަނެގެން'' ކުރާ ކަމެއް ނޫން ކަަމަށެވެ.
ގާސިމް އުޅުއްވަނީ ރައީސް ސޯލިހު އާއި ރައީސް ނަޝީދުއާ ދެމެދު ދޭތެރެ ޖައްސައިގެން ސަރުކާރުން ކަންތައްތަކެއް ހޯއްދަވަން ކަމަށް އެމްޑީޕީގެ މެމްބަރުން ވިދާޅުވަމުން ގެންދަވާތީވެ އެއަށް ރައްދު ދެއްވާ ގާސިމް ވިދާޅުވީ، ސަރުކާރުގެ ތެރެއިން ވަކި ކަމެއް ބޭނުންނުވާ މީހަކު ނުހުންނާނެ ކަމަށާއި، އެހެން ނަމަވެސް ނަހަމަ ގޮތުގައި ކަންތައްތަކެއް ކުރަން ބޭނުންނުވާ ކަމަށެވެ.
އަޅުގަނޑު ދަންނަވާނީ އަަޅުގަނޑު އެހެން އެކަން ކުރަނީ. އެއާ އަޅުގަނޑު ދެބަހެއް ނުވަމޭ. އަޅުގަނޑު ބޭނުމޭ ކަންތައްތައް ސަރުކާރުން ކުރަން.ގާސިމް އިބްރާހިމް ~ ޖޭޕީގެ ލީޑަރު ~
ގާސިމް ވިދާޅުވީ، މި ސަރުކާރު ވައްޓާލަން ބަޔަކު ރެއާ ދުވާލު ކިތަންމެ މަސައްކަތެއް ކުރިޔަސް އެކަން ކާމިޔާބު ނުވާނެ ކަމަށާއި، އަދި ވަކިން ހާއްސަކޮށް ވެރިކަމުގެ ނިޒާމު ބަރުލަމާނީ އަށް ބަދަލުނުކުރެވޭނެ ކަމަށެވެ.
