ބަހެއް އެކްސިޑެންޓްވެ 4 މީހުން މަރުވެއްޖެ
22 ސެޕްޓެމްބަރު 2019 | އާދީއްތަ 05:03ބަހުގައި ދަތުރު ކުރަމުން ދިޔައީ 31 މީހުން
ބަހުގައި ދަތުރު ކުރަމުން ދިޔަ ގިނަ މީހުން ތިބީ ސީޓް ބެލްޓް ނާޅައި
ޗައިނާގެ ފަތުރުވެރިން ތަކެއް ގޮވައިގެން ދަތުރު ކުރަމުން ދިޔަ ބަހެއް އެކްސިޑެންޓްވެ ހަތަރު މީހުން މަރުވެއްޖެއެވެ.
އެމެރިކާގެ ޔޫޓާގެ "ރެޑް-ރޮކް ލޭންޑް ސްކޭޕް"ގައި ދަތުރު ކުރަމުން ދިޔަ މި ބަސް ހައިވޭގެ ގަރޑް ރެއިލްގައި ޖެހި ހިނގި އެކްސިޑެންޓްގައި، ބަހުގައި ދަތުރު ކުރި 31 މީހުންނަށް ވަނީ އަނިޔާވެފައެވެ. އެކްސިޑެންޓަށް ފަހު 15 މީހުން ކްރިޓިކަލް ކޮންޑިޝަންގައި ވީކަމަށް ކަމާބެހޭ އިދާރާތަކުން ވަނީ މައުލޫމާތު ދީފައެވެ. އެހެން ނަމަވެސް މީގެ ތެރެއިން ގިނަ ބަޔަކު މިހާރު ދޫކޮށްލާފައި ވާއިރު ފަސް މީހަކު އަދިވެސް އޮތީ ކްރިޓިކަލް ކޮންޑިޝަންގައެވެ.
ކަމާބެހޭ ފަރާތްތަކުން މައުލޫމާތު ދޭ ގޮތުގައި ބަހުގައި ދަތުރު ކުރި ގިނަ މީހުން ތިބީ ސީޓް ބެލްޓް ނާޅައެވެ.
ހުކުރު ދުވަހުގެ މި އެކްސިޑެންޓް ހިނގާފައި ވަނީ ޔޫޓާގެ ބްރައިސް ކެންޔަން ނެޝަނަލް ޕާކް ކައިރިންނެވެ. އެކްސިޑެންޓްގައި ބަސް ދުއްވަން އިނީ އެމެރިކާގެ ރައްޔިތެއް ކަމަށާއި އޭނާ އިނީ މަސްތުވެފައި އިން ހާލަތެއްގައި ނޫންކަމަށް ކަމާބެހޭ ފަރާތްތަކުން މައުލޫމާތު ދެއެވެ. އަދި ފުލުހުން ދަނީ މިކަން އިތުރަށް ތަހުގީގު ކުރަމުންނެވެ.
