ޓެރަރިޒަމް ގާނޫނަށް އިސްލާހު ގެންނަން ދައުރުން ބޭރުގައި ބާއްވާ ދެވަނަ ޖަލްސާ މިއަދު
ހަނުހުރުމުގެ ހައްގު ހަނިކޮށްފައިވާ ކަމަށްބުނެ ބުނެ އާންމުންގެ ފާޑުކިޔުން އަމާޒުވެފައިވޭ
ރައްޔިތުންގެ މަޖިލިސް
ޓެރަރިޒަމް މަނާ ކުރުމުގެ ގާނޫނަށް އިސްލާހު ގެނައުމަށް، ރައްޔިތުންގެ މަޖިލީހުގެ ދައުރުން ބޭރުގައި ބާއްވާ ދެވަނަ ޖަލްސާ އާދީއްތަ ދުވަހުގެ ހެނދުނު 10:00 އަށް ތާވަލް ކޮށްފިއެވެ.
ސަރުކާރުގެ ފަރާތުން ހެންވޭރު ދެކުނު ދާއިރާގެ މެމްބަރު ހުސައިން ޝަމީމް ހުށައަޅުއްވާފައިވާ ޓެރަރިޒަމް މަނާ ކުރުމުގެ ގާނުނަށް އިސްލާހު ގެނައުމުގެ ބިލުގެ ފުރަތަމަ ކިޔުން ވަނީ އެންމެ ފުރަތަމަ ދައުރުން ބޭރުގައި ބޭއްވި ޖަލްސާގައި އިއްވާފައެވެ. ދެން އެބިލްގައި އޮންނާނީ އިބްތިދާއީ ބަހުސްއެވެ. އިބްތިދާއީ ބަހުސް ކުރުމަށްފަހު އެ ބިލް އިތުރަށް ދިރާސާ ކުރުމަށް ކޮމިޓީއަށް ފޮނުވާނެތޯ ނުވަތަ ނޫންތޯ ކަނޑައެޅުމަށް ކޮމިޓީއަށް ފޮނުވުމަށް ވޯޓަށް އަހާނެއެވެ.
މަރުތަކާ ގެއްލުވާލާފައިވާ މީހުންގެ މައްސަލަތައް ބެލުމަށް ރައީސް އުފެއްދެވި ރިޔާސީ ކޮމިޝަނުގެ މަސައްކަތްތައް ކުރިއަށް ގެންދިއުމަށް ޓެރަރިޒަމް ހުއްޓުވުމުގެ ގާނޫނަށް އިސްލާހު ގެންނަން ހުށައަޅާފައިވާއިރު އެބިލްގައި ފުލުހުންނަށް ބޮޑެތި ބާރުތަކެއް ދީފައިވާ ކަމަށާއި ހަނުހުރުމުގެ ހައްގު ހަނިކޮށްފައިވާ ކަމަށްބުނެ ބުނެ އާންމުންގެ ފާޑުކިޔުން ވަނީ އަމާޒު ވެފައެވެ. ނަމަވެސް ސަރުކާރުން ބުނެފައިވަނީ ފުލުހުންނަށް ބޮޑެތި ބާރުތައް ދީފައި ނުވާނެކަމަށާއި ޓެރަރިޒަމްގެ ކުށްތަކަކީ ބޮޑެތި ކުށްތަކަކަށް ވުމުން އެ ބާވަތުގެ ކުށްތައް މުޅިން ހުއްޓުވުމަށް ބައެއް އަސާސީ ހައްގުތައް ހަނިކުރުމަކީ އެއްވެސް ގައުމަކުން ނުކުރާކަމެއް ނޫން ކަމަށެވެ. އަދި އެއްވެސް ހައްގެއް އާދަޔާ ޚިލާފަށް ހަނިކޮށްފައި ނުވާނެ ކަމަށް ސަރުކާރުން ވަނީ ބުނެފައެވެ.
ސަރުކާރުން އިސްލާހު ހުށައެޅި އެބިލުގައި ވާގޮތުން އެހެން ގާނޫނެއްގައި އެހެން ގޮތަކަށް ބަޔާންކޮށްފައިވީ ނަމަވެސް، ބިލްގައި ބުނާ ޓެރަރިޒަމްގެ ކުށެއްގެ ތުހުމަތުކުރެވޭ މީހާގެ އަތުގައި، ކުށެއް ކުރުމަށް ބޭނުންކުރެވޭނެ އެއްޗެއް ނުވަތަ އެފަދަ ކުށެއްގެ ހެއްކެއްގެ ގޮތުގައި ބޭނުންކުރެވޭނެ އެއްޗެއް އޮތްކަމަށް އެކަށީގެންވާ ސަބަބުގެ މައްޗަށް ބިނާކޮށް ތުހުމަތުކުރެވޭ ނަމަ، ކޯޓު އަމުރަކާ ނުލައި އެފަދަ މީހެއް ބަލައި ފާސް ކުރުމުގެ ބާރު ފުލުހުންނަށް ލިބިގެންވެއެވެ.
