އޭޝިއާ ޕެސިފިކް ކޮންފަރެންސްގައި ޖެންޑަރ މިނިސްޓްރީގެ އޮފިޝަލުން ބައިވެރިވެއްޖެ

25 ވަނަ އޭޝިއާ ޕެސިފިކް ޖޮއިންޓް ރީޖަނަލް ސޯޗަލް ވޯކް ކޮންފަރެންސް ގައި ޖެންޑަރ މިނިސްޓްރީގެ ސްޓޭޓް މިނިސްޓަރު ފަޒްނާ ޝާކިރު އާއި މިނިސްޓްރީގެ ބައެއް ބޭފުޅުން ބައިވެރިވެވަޑައިގެންފިއެވެ.

އިންޑިއާގެ ބެންގަލޫރުގައި ބޭއްވޭ މި ކޮންފަރެންސްގެ މިއަހަރުގެ ޝިއާރަކީ މުޖުތަމައުގެ ހުރިހާ ފަރުދުންގެ މެދުގައި ހަމަހަމަކަން ގާއިމުކުރުމަށް އިޖްތިމާއީ ފެންވަރުގައި މަސައްކަތް ކުރުމެވެ.

މިއަހަރުގެ ކޮންފަރެންސް ބޭއްވޭނީ ސެޕްޓެމްބަރު މަހުގެ 18 އިން 20 ގެ ނިޔަލަށެވެ. އެގޮތުން، މުހިއްމު މަޝްވަރާތަކެއް ކުރިއަށްގެންދެވޭކަމަށް ފާހަގަކޮށްލެވޭ މި ކޮންފަރެންސަކީ ކޮންމެ ދެއަހަރުން އެއް އަހަރު ބާއްވަމުންގެންދާ ކޮންފަރެންސެކެވެ.

އޭޝިއާ ޕެސިފިކް ސަރަހައްދުގައި ގާތްގަނޑަކަށް 30 ގައުމުން ބައިވެރިވާ މި ކޮންފަރެންސްގައި 1000 އަށްވުރެ ގިނަ ތަޖުރިބާކާރު އިޖްތިމާއީ މަސައްކަތްތެރިންނާއި ސިޔާސަތު އެކުލަވާލާ ފަރާތްތަކުގެ އިތުރުން ދަރިވަރުންވެސް ބައިވެރިވުމަށް ހަމަޖެހިފައިވެއެވެ.