މަރު ކޮމިޝަނުން ބަލާ މައްސަލަތަކުގެ ތެރެއިން ތިން މައްސަލައެއްގެ ތަހުގީގު ނިންމާލައިފި
19 ސެޕްޓެމްބަރު 2019 | ބުރާސްފަތި 13:01އެ ކޮމިޝަނުން 25 މައްސަލައެއް ދަނީ ބަލަމުން
ރައީސް އުފެއްދެވި މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ކޮމިޝަންގެ މެމްބަރުންތަކެއް
މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ކޮމިޝަނުން ތިން މީހެއްގެ ތަހުގީގު ނިންމާލާފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް އޮފީހުގައި ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުން ރައީސް ސޯލިހު ވިދާޅުވީ ރ. މީދޫ ފެންފިޔާޒްގެ މުހައްމަދު އަނަސް އަދި ރައުދާ އާތިފް އަދި ބްލޮގާ ޔާމީން ރަޝީދުގެ މަރުގެ މައްސަލަ ބަލައި ނިމި ރިޕޯޓް ނިމިފައިވާ ކަމަށެވެ. އަދި އިތުރު ހަތަރު ފަރާތެއްގެ މައްސަލަ މިހާރު އެކޮމިޝަނުން ބަލަމުން ދާކަމަށް މައުލޫމާތު ލިބިވަޑައިގެންފައިވާ ކަމަށް ރައީސް ވިދާޅުވިއެވެ.
ރައީސް ސޯލިހު ވިދާޅުވީ ޔާމީން މަރާލި މައްސަލައިގެ ތަހުގީގު ކޮމިޝަން އިން ނިންމާފައިވާ ކަމަށެވެ. ނަމަވެސް އެ މައްސަލަ މިހާރު ކޯޓުގައި ހިނގަމުންދާތީ ޝަރީއަތް ނިމުމުން އެމައްސަލައިގެ ތަހުގީގު ރިޕޯޓް އާންމު ކުރައްވާނެ ކަމަށެވެ. ޔާމީންގެ މައްސަލަ އަންނަ މަހުގެ ކުރީ ކޮޅު ނިންމޭނެ ކަމުގެ މައުލޫމާތު ލިބިވަޑައިގެންފައިވާ ކަމަށް ރައީސް ސޯލިހު ވިދާޅުވިއެވެ.
އަނަސްގެ މަރުގެ މައްސަލައިގައި ދެފަރާތަކާއި ސުވާލު ކުރަން ޖެހޭކަމަށާއި އެ ސުވާލުތައް ކުރުމަށްފަހު ރިޕޯޓް އާންމު ކުރައްވާނެ ކަމަށް ރައީސް ވިދާޅުވިއެވެ. މީގެ އިތުރުން ރައުދާގެ މައްސަލަ ނިމިފައިވާ ކަމަށް ރައީސް ވިދާޅުވިއެވެ.
ރައީސްގެ ޚާއްސަ ގަރާރަކުން އުފައްދަވާފައިވާ އެ ކޮމިޝަނުގެ މެންޑޭޓުގައި ހިމެނެނީ 1 ޖެނުއަރީ 2012 އިން ފެށިގެން 17 ނޮވެމްބަރ 2018 ގެ މުއްދަތުގެ ތެރޭގައި ހިމެނޭ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލައި އެކަމުގެ ހަގީގަތް ހޯދުމެވެ.
