ޔޫއެފާ ޗެމްޕިއަންސް ލީގު: ޕީއެސްޖީ އިން ވަރުގަދަ ރެއާލް މެޑްރިޑް ލަދު ގަންނަވާލައިފި

ޔޫއެފާ ޗެމްޕިއަންސް ލީގުގައި ޕެރިސް ސެއިންޓް ޖާމަން އިން ވަރުގަދަ ރެއާލް މެޑްރިޑް ލަދު ގަންނަވާލައިފިއެވެ.

ޕީއެސްޖީ ދަނޑުގައި ކުޅުނު މި މެޗު ޕީއެސްޖީ އިން ކާމިޔާބުކުރީ 3-0 ގެ ނަތީޖާ އަކުންނެވެ.

މެޗު ފަށައިގެން ޕީއެސްޖީއިން މޮޅަށް ކުޅުނު އިރު މެޗުގެ 14 ވަނަ މިނެޓުގައި ޕީއެސްޖީއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ ޑި މާރިޔާއެވެ.

މި ލަނޑަށް ފަހުވެސް ޕީއެސްޖީގެ ފަރާތުން މޮޅު ކުޅުމެއް ފެނިގެންދިޔައެވެ. އެގޮތުން ޕީއެސްޖީއިން ވަނީ ފުލުފުލުގައި ރެއާލުގެ ގޯލަށް ނުރައްކާ ކުރަމުންނެވެ. މެޗުގެ 33 ވަނަ މިނެޓުގައި ޕީއެސްޖީއިން ވަނީ އިތުރު ލަނޑެއް ޖަހާ މެޗުގެ ލީޑު ފުޅާ ކޮށްފައެވެ. މި ލަނޑު ވެސް އެޓީމަށް ކާމިޔާބުކޮށްދިނީ ފުރަތަމަ ލަނޑު ކާމިޔާބުކޮށްދިން ކުޅުންތެރިޔާ ޑި މާރިޔާ އެވެ.

މެޗުގެ 35 ވަނަ މިނެޓުގައި ރެއާލް މެޑްރިޑްގެ ގެރެތް ބޭލް ލަނޑެއް ޖެހި ނަމަވެސް ވީއޭއާރް ބެލުމަށްފަހު ރެފްރީ ނިންމީ އެއީ ލަނޑެއް ނޫން ކަމަށެވެ.

މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާ އަކުން ޕީއެސްޖީ ކުރީގައި އޮވެގެންނެވެ.

މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެން ދިޔަ އިރު މި ހާފުގައި ރެއާލުން ވަނީ ލަނޑު ޖެހުމަށް ފުރުސަތު ތަކެއް ތަނަވަސް ކޮށްފައެވެ. ނަމަވެސް ރެއާލުން ފޮނުވާލި ގިނަ ހަމަލާތައް ހުށިޔާރު ކަމާއެކު ޕީއެސްޖީގެ ކީޕަރު ވަނީ ދިފާއު ކޮށްފައެވެ.

ޕީއެސްޖީޢިން ކާމިޔާބުކުރި ތިންވަނަ ލަނޑު މެޗުގެ އިތުރު ވަގުތުގައި ކާމިޔާބުކޮށްފައި ވާއިރު މި ލަނޑު އެޓީމަށް ކާމިޔާބު ކޮށްދިނީ ތޯމަސް އެވެ.

މި ނަތީޖާ އާއިއެކު ޕީއެސްޖީ ގްރޫޕް "އޭ"ގެ އެއްވަނައިގައި އޮތީ ލިބުނު ތިން ޕޮއިންޓާއެކުގައެވެ. އަދި ރެއާލް މެޑްރިޑް އޮތީ މި ގްރޫޕްގެ ފުލުގައެވެ.