އެންސިސް ތެރެއިން އަތުލައިގަތް 5 ކިލޯގެ މަސްތުވާތަކެތީގެ މައްސަލަ ސާބިތެއްނުވި
މި މައްސަލައިގައި ދައުވާ ކޮށްފައިވަނީ އެންމެ މީހެއްގެ މައްޗަށް
މި މަައްސަލައިގައި ފުލުހުން އަތުލައިގަނެފައިވާ މަސްތުވާތަކެތި
މީގެ ދެ އަހަރު ކުރިން ފުލުހުން ހިންގި އޮޕަރޭޝަނެއްގައި, އެންސިސްގެ ގުދަނެއްގެ ތެރެއިން އަތުލައިގަތް ފަސް ކިލޯގެ މަސްތުވާތަކެތީގެ މައްސަލަ ސާބިތުނުވާކަމަށް ކްރިމިނަލް ކޯޓުން ނިންމައިފިއެވެ.
މި މައްސަލައިގައި ކްރިމިނަލް ކޯޓުގައި ދައުވާ އުފުލާފައިވަނީ، ގދ.ވާދޫ އަސްރަފީގެ، މުހައްމަދު ޝަރީފްގެ މައްޗަށެވެ. އޭނާގެ މައްޗަށް ދައުލަތުން އުފުލާފައިވަނީ ކެނަބިސް ޓްރެފިކްކުރުމުގެ ދައުވާއެވެ. ކްރިމިނަލް ކޯޓުން އޭނާގެ މައްޗަށް ދައުވާ ސާބިތުނުވާކަމަށް ކަނޑައަޅާފައި ވަނީ އެކަށީގެންވާ ވަރަށް ހެކި ލިބިފައިނުވާ ކަމަށް ބުނެއެވެ.
މައްސަލައިގެ ދައުވާގެ ހުލާސާއަށް ބަލާލާއިރު، މި މައްސަލައިގައި ހިމެނޭ މުހައްމަދު ޝަރީފް ހުޅުމާލޭ އެމްޕީއެލް ސަރަހައްދުން ފުލުހުންގެ ބެލުމުގެ ދަށަށް ގެންގޮސްފައިވަނީ 21 ނޮވެމްބަރު 2017 ވަނަ ދުވަހުގެ ހަވީރުގެ ވަގުތެއްގައެވެ. ފުލުހުން ބެލުމުގެ ދަށަށް އޭނާ ގެންގޮސްފައިވަނީ ކޯޓު އަމުރެއްގެ ދަށުންނެވެ. މުހައްމަދު ޝަރީފްގެ މައްޗަށް ފުލުހުން ކޯޓު އަމުރެއް ނަގާފައިވަނީ، ފުޅާ ދާއިރާއެއްގައި ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރިކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެންނެވެ.
މި މައްސަލައިގައި ހިމެނޭ މަސްތުވާތަކެތި ފެނިފައިވަނީ މުހައްމަދު ޝަރީފް އޭރު މަސައްކަތްކުރަމުން ދިޔަ އެންސިސްގެ، M29 ގުދަނުގެ ތެރެއިންނެވެ. އެމަސްތުވާތަކެތި ފެނިފައިވަނީ އެ ގުދަނަށް ވަންނަ ދޮރާ ދިމާލު ކަނާތް ފަރާތުގައި ހުރި ކަރުދާސް ފޮށިގަނޑެއްގެ ތެރެއިންނެވެ. އެ ފޮށިގަނޑުގެ ތެރޭގައި އޮތް ހުދު ފޮތިގަނޑެއްގެ ތެރެއިން 23 ރަބަރު ގަނޑު ނަގާފައިވާއިރު، އޭގައި ހުރި ކެނެބިސްގެ ޖުމްލަ ބަރުދަނަކީ 2205 ގްރާމު (2.2 ކިލޯ) ފުލުހުން ބުނެފައިވެއެވެ. ހަމަ އެ ފޮށިގަނޑުގެ ތެރެއިން ނެގި އިތުރު ހުދު ކުލައިގެ ފޮށިގަނޑެއްގެ ތެރެއިން ނެގި އިތުރު 28 ރަބަރު ގަނޑުގައި 2725 ގްރާމު (2.7 ކިލޯ) ކެނެބިސް ހުރި ކަމަށް ވެސް އެތަކެތީގެ ތަހުލީލު ރިޕޯޓާ ހަވާލާދީ ފުލުހުން ބުނެފައިވެއެވެ. މުހައްމަދު ޝަރީފް އޭރު އަދާކުރަމުން ދިޔައީ އެ ގުދަނުގެ ސުޕަވައިޒަރުގެ ވަޒީފާއެވެ.
މި މައްސަލައިގައި ދައުލަތުން ހުށައަޅާފައިވާ ހެކިންގެ ތެރޭގައި އެތަނުގައި މަސައްކަތްކުރާ ބިދޭސީން ހިމެނޭއިރު، މިމައްސަލައިގެ ތުހުމަތުގައި ބަންދުކުރެވުނު އެކަކު މައްސަލައިގެ ޝަރީއަތަށް ހާޒިރުކުރަން ބެލިއިރު ވަނީ ރާއްޖެއިން ފުރައިގެންގޮސްފައެވެ. ކޯޓުގައި ހެކިބަސް ދިން ފުލުހުންގެ ހެކިބަހަށް ބަލާއިރު، މިތަކެއްޗަކީ މުހައްމަދު ޝަރީފް ބުނެގެން ބެހެއްޓި ތަކެތި ކަމަށް ބުނެފައިވަނީ އެމީހާކަން އެނގެން އޮވެއެވެ.
މިތަކެތި ފެނުނު ގުދަނަށް ބަލާއިރު، އެ ގުދަނަކީ އެންސިސްގެ ގިނަ މުވައްޒަފުންތަކަކަށް ވަދެވޭނެހެން އޮންނަ ތަނެއް ކަމަށާއި، އެތަނުގެ ތަޅުދަނޑިއާ ހަވާލުވެގެން ހުންނަނީ މުހައްމަދު ޝަރީފް ނޫންކަންވެސް ހެކިންގެ ހެކިބަހުން ވަނީ ފާހަގަވެފައެވެ. އެގުދަނުގެ ތަޅުދަނޑިއަކީ މެއިންޓެނަންސްގައި މަސައްކަތްކުރާ ހުރިހާ މުވައްޒަފުންނަށް ލިބޭ ތަޅުދަނޑިއެކެވެ. ދިވެހިރާއްޖޭގެ ގާނޫނު އަސާސީ ބުނާގޮތުން ނަމަ މީހެއްގެ ހިޒާޔަތުގެ ތެރޭގައި ހުރި ތަނެއްގައި ހުރި ތަކެތީގެ ޝަރުއީ ޒިންމާ ނަގަން ޖެހޭނީ، އެތަނަކީ ސީދާ އެމީހެއްގެ ބެލުމުގެ ދަށުގައިވާ ތަނަކަށް ވާނަމައެވެ.
ގުދަން ތެރެއިން ފެނުނު މަސްތުވާތަކެތިން މުހައްމަދު ޝަރީފްގެ ފިނގަރ ޕްރިންޓް ހުރިކަމަށް، ދައުލަތުން ހުށައަޅާފައިވާ ލިޔެކިތުންތަކުން އެނގެން ނެތްކަމަށްވެސް ކޯޓުން ވަނީ ފާހަގަކޮށްފައެވެ. އަދި މިފަދަ ޙައްސާސްކަން ބޮޑު މައްސަލައެއްގައި، ހަމައެކަނި ފުލުހުންގެ އިންޓެލިޖެންސް ރިޕޯޓަކަށް ރިއާޔަތްކުރުމަށް ފަހު، އެ ގުދަން ތެރެއިން ފެނުނު މަސްތުވާތަކެއްޗަށް މި މައްސަލައިގެ ތުހުމަތުކުރެވުނު މުހައްމަދު ޝަރީފް ޒިންމާނަގަން ޖެހޭ ގާނޫނީ އަދި ޝަރުއީ އަސާސެއްނެތްކަމަށް ކްރިމިނަލް ކޯޓުން ވަނީ ނިންމާފައެވެ.
މި މައްސަލައިގައި އަތުލައިގަތް މަސްތުވާތަކެއްޗާ ބެހޭގޮތުން ފުލުހުން 2017 ވަނަ އަހަރުގެ ނޮވެމްބަރު މަހުގެ 23 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ، މި މައްސަލައިގައި ތިން ވައްތަރެއްގެ މަސްތުވާތަކެތި ފެނިފައިވާ ކަމަށެވެ. އޭގެ ތެރޭގައި ކްރިސްޓަލް މެތް، ހެރޮއިން އަދި ހެޝިޝް އޮއިލް ހިމެނޭކަމަށް ފުލުހުން ބުނެފައިވެއެވެ. ނަމަވެސް ކްރިމިނަލް ކޯޓަށް ހުށައެޅި މައްސަލައިގައި ހިމެނެނީ ކެނެބިސް އެކަންޏެވެ.
