ޓެރަރިޒަމް މަނާ ކުރުމުގެ ގާނޫނަށް ގެނެވޭ އިސްލާހުގެ ސަބަބުން ހައްގުތައް ބޮޑަށް ހަނިކޮށްފައެއްނުވޭ
17 ސެޕްޓެމްބަރު 2019 | އަންގާރަ 04:43ޓެރަރިޒްމް މަނާ ކުރުމުގެ ބިލަށް ގެންނަ އިސްލާހުތަކުގެ ސަބަބުން އަންނަ ނަތީޖާ މުޅިން ތަފާތުކަމަށް
ރައީސުލްޖުމްހޫރިއްޔާގެ އޮފީހުގެ ލީގަލް ކައުންސެލް ޓު ދަ ޕްރެޒިޑެންޓް، އަހުމަދު އަބްދުﷲ އަފީފު
ޓެރަރިޒަމް މަނާކުރުމުގެ ގާނޫނަށް ގެނެވޭ އިސްލާހެއްގެ ސަބަބުން ބަޔާންކޮށްފައިވާ ބޮޑެތި ހައްގުތައް މާ ބޮޑަކަށް ހަނިކޮށްފައި ނުވާނެ ކަމަށް ރައީސުލްޖުމްހޫރިއްޔާގެ އޮފީހުގެ ލީގަލް ކައުންސެލް ޓު ދަ ޕްރެޒިޑެންޓް، އަހުމަދު އަބްދުﷲ އަފީފު ވިދާޅުވެއްޖެއެވެ.
އަހުމަދު އަބްދުﷲ މިހެން ވިދާޅުވީ ހޯމަ ދުވަހުގެ ރޭ ރާއްޖެޓީވީގެ ފަލަ ސުރުޚީ ޕްރޮގްރާމްގައި ޓެރަރިޒްމް މަނާކުރުމުގެ ގާނޫނަށް ހުށަހެޅިފައިވާ އިސްލާހުތަކާއި ގުޅިގެން ވާހަކަދައްކަވަމުންނެވެ.
އަހުމަދު އަބްދުﷲ ވިދާޅުވީ، ޓެރަރިޒަމް މަނާ ކުރުމުގެ ބިލަށް ގެންނަ އިސްލާހުތަކުގެ ސަބަބުން އަންނަ ނަތީޖާ މުޅިން ތަފާތު ކަމަށެވެ. ހަނު ހުރުމުގެ ހައްގު މިސާލެއްގެ ގޮތުގައި ނަންގަވަމުން އަހުމަދު އަބްދުﷲ ވިދާޅުވީ ކުރީގެ ޓެރަރިޒަމް މަނާ ކުރުމުގެ ގާނޫނު އޮތް ގޮތުން އެ ގާނޫނުގައި ބަޔާން ކޮށްފައިވާ ކުށެއްގެ ތުހުމަތެއްގައި ހައްޔަރު ކުރެވިއްޖެނަމަ، ކޮންމެވެސް މިންވަރަކަށް ހަނުހުރުމުގެ ހައްގު ހަނިކުރެވޭ ކަމަށެވެ. އަދި ކުރީގެ ގާނޫނު އޮތް ގޮތުން ތުހުމަތުކުރެވޭ ފަރާތާއި ދެކޮޅަށް ޝަރީއަތުގެ މަރުހަލާހަގައި އެ ހައްގު ބޭނުން ކުރެވިދާނެ ހުއްޖަތެއް ގޮތުގައި ނެގިދާނެ ކަމަށެވެ. ނަމަވެސް މިހާރު ހުށަހެޅިފައިވާ އިސްލާހުގައި އެ މާއްދާ ބާތިލް ކުރެވޭނެ ކަމަށެވެ. އަހުމަދު އަބްދުﷲ ވިދާޅުވީ ޓެރަރިޒަމް ގެ އަމަލެއް ކަމުގައި ވީނަމަވެސް ތުހުމަތު ކުރެވޭ މީހާ ހަނު ހުރުމަށް ބޭނުންވާ ނަމަ އެ ހައްގު އެމީހެއްގެ ކިބައިން ނިގުޅައި ގަތުމުގެ އެއްވެސް ބޭނުމެއް ނެތް ކަމަށެވެ.
އަހުމަދު އަބްދުﷲ ވިދާޅުވީ ޑިމޮކްރާތީ އެއްވެސް ގައުމެއްގައި ހިފައްހައްޓާފައިނުވާ މިންވަރަކަށެއް ގެނެވޭ އިސްލާހުތަކުގެ ސަބަބުން މާ ގިނަ ހައްގުތަކެއް ހިފެހެއްޓިފައި ނުވާނެ ކަމަށެވެ.
ނަމަވެސް ޓެރަރިޒަމްގެ ކުށްތަކަކީ ބޮޑެތި ކުށްތަކަކަށް ވުމުން އެ ބާވަތުގެ ކުށްތައް މުޅިން ހުއްޓުވުމަށް ބައެއް އަސާސީ ހައްގުތައް ހަނިކުރުމަކީ އެއްވެސް ގައުމަކުން ނުކުރާކަމެއް ކަމަށް ނުބުނެވޭނެ ކަމަށް އަހުމަދު އަބްދުﷲ ފާހަގަ ކުރެއްވިއެވެ. އަހުމަދު އަބްދުﷲ ވިދާޅުވީ އާދަޔާ ޚިލާފު މިންވަރަކަށް އެއްވެސް ހައްގެއް ހަނި ކުރެވިފައިނުވާ ކަމަށެވެ.
ޓެރަރިޒަމް މަނާ ކުރުމުގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ބިލެއް ހުށަހެޅިފައިވާއިރު ޓެރަރިޒަމްގެ ބޮޑެތި ކުށްތަކުގައި ތުހުމަތު ކުރެވޭ ފަރާތްތައް ކޯޓު އަމުރަކާ ނުލައި ފުލުހުންނަށް ހައްޔަރު ކުރެވޭނެ ގޮތަށް ބިލުގައިވަނީ ހިމަނާފައެވެ. އަދީ މީގެ އިތުރުން ޓެރަރިޒަމްގެ ޢަމަލުތައް ހިންގާ ފަރާތްތައް ނުވަތަ އެފަދަ ޢަމަލުތަކަށް ހުށަހެޅިދާނެ ފަރާތްތައް، އެފަދަ ޢަމަލުތަކުން ދުރުކޮށް، މުޖުތަމަޢުއަށް އަނބުރާ ރުޖޫޢަވުމަށްޓަކައި، ރިހެބިލިޓޭޝަން ޕްރޮގްރާމް ހިންގުމަށް ވެސް ބިލުގައި ހިމެނެއެވެ.
