މާލެ ސިޓީގެ ޓްރެފިކް މައްސަލައަށް ލުޔެއް ހޯދުމަށް ނައިބު ރައީސް ކަމާބެހޭ އިދާރާތަކާއި ބައްދަލުކުރައްވައިފި
17 ސެޕްޓެމްބަރު 2019 | އަންގާރަ 04:00ހިނގާ ބިނގާވެ އުޅޭ ފަރާތްތަކަށް ދިމާވާ ދަތިތައް ހައްލުކުރުމަށް ވަނީ މަޝްވަރާކޮށްފައި
ނައިބު ރައީސް ކަމާބެހޭ އިދާރާތަކާއެކު ބައްދަލުކުރައްވަނީ
މާލެ ސިޓީގައި ތޮއްޖެހުން ކުޑަކޮށް، ޓްރެފިކް މައްސަލަތަކަށް ހައްލު ހޯދުމާއި ބެހޭގޮތުން ރައީސުލްޖުމްހޫރިއްޔާގެ ނައިބު ފައިޞަލް ނަސީމް، ކަމާބެހޭ މުއައްސަސާތަކާ މަޝްވަރާކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި އަންގާރަ ދުވަހު ބޭއްވި ބައްދަލުވުމުގައި، މާލޭގެ މަގުތަކުގައި އިތުރަށް ޖާގަހެދުމާ، ބާރުބޮޑުވެ އުޅަނދުފަހަރު ދުއްވުމުގެ އިތުރުން ހިނގާ ބިނގާވެ އުޅޭ ފަރާތްތަކަށް ކުރިމަތިވަމުންދާ ދަތިތަކަށް އަވަސް ހައްލެއް ހޯދުމާ ގުޅޭގޮތުން ވަނީ މަޝްވަރާކޮށްފައެވެ. އަދި ޤަވާއިދާ ޚިލާފަށް ޕާކު ކުރުމުގެ ސަބަބުން ދުއްވުމާ ހިނގާ ބިނގާވެ އުޅޭ ފަރާތްތަކަށް ދިމާވާ ދަތިތައް ޙައްލުކުރުމަށް އެޅިދާނެ ފިޔަވަޅުތަކާ ބެހޭގޮތުން ވެސް ބައްދަލުވުމުގައި މަޝްވަރާކުރެވުނެވެ.
މި ބައްދަލުވުމުގައި ނައިބު ރައީސް ވަނީ މަގު ހުރަސް ކުރުމުގައި ކަފި ހުރަސް ބޭނުންކުރުމަށް އަހުލުވެރިކުރުމުގެ ގޮތުން ޓްރެފިކް ފުލުހުން ކުރިޔަށްގެންދިޔަ ޚާއްޞަ ހަރަކާތުގެ ސަބަބުން ހެޔޮ ބަދަލުތަކެއް ފެންނަން ފަށާފައިވާކަން ފާހަގަކުރައްވާފައެވެ. ރައީސް އޮފީހުގައި ބޭއްވި ބައްދަލުވުމުގައި ފުލުހުންގެ މުއައްސަސާއާއި މާލޭ ސިޓީ ކައުންސިލާއި ޓްރާންސްޕޯޓް އޮތޯރިޓީގެ އިތުރުން ރައީސުލްޖުމްހޫރިއްޔާގެ އޮފީހުގެ ބައެއް އިސް ބޭފުޅުންވެސް ބައިވެރިވެވަޑައިގެންނެވިއެވެ.
