ރާއްޖޭގައި ގަވާއިދާއި ޚިލާފަށް އުޅެމުންް ދިޔަ ބިދޭސީންގެ މައްސަލަ ތަހުގީގު ނުކޮށް ޑީޕޯޓުކޮށްލި މައްސަލަ ރައްޔިތުންގެ މަޖިލީހުގެ ކަމާބެހޭ ކޮމެޓީގެ ސަމާލުކަމަށް ގެނެސްފިއެވެ. ކޮމެޓީގެ ސަމާލުކަމަށް މި މައްސަލަ ގެނެސްފައިވަނީ ވިލިމާލޭ ދާއިރާގެ މެމްބަރު އަހުމަދު އުޝާމްއެވެ.
މެންބަރު އުޝާމް ވިދާޅުވީ ޖިނާއީ ކުށްތަކެއް ކުރަމުންދާ ކަމަށް ތުހުމަތުކުރެވޭ ފަރާތެއްގެ މައްސަލަ ތަހުގީގު ނުކޮށް ޑީޕޯޓް ކުރުމަކީ ވަރަށް ބޮޑު މައްސަލައެއް ކަމަށާއި އެ މައްސަލަ މަޖިލީހުގެ ކަމާބެހޭ ކޮމިޓީގެ ސަމާލު ކަމަށް ގެނެސް، އެ މައްސަލަ ބަލައިދިނުމަށް އެދިފައިވާ ކަމަށެވެ.
އިމިގްރޭޝަނުން ޑީޕޯޓު ކުރި ދެމީހުންނަކީ 49 އަހަރުގެ ބަންގްލަދޭޝް ފިރިހެނެއް ކަމަށްވާ އެމްޑީ ޝަފީގުލް އިސްލާމްއާއި އަބޫ ހަނީފްއެވެ. އެމްޑީ ޝަފީގުލް އިސްލާމް ޑީޕޯޓުކޮށްފައިވަނީ މޯލްޑިވްސް އިމިގްރޭޝަން އާއި މޯލްޑިވްސް ޕޮލިސް ސަރވިސް ގުޅިގެން ކުރިއަށް ގެންދާ އޮފަރޭޝަނެއްގެ ދަށުން ގަވައިދާ ހިލާފަށް ބިދޭސިން ރިކްރޫޓް ކުރާކަމުގެ ތުހުމަތުގައެވެ.
އަބޫ ހަނީފް ޑީޕޯޓުކޯށްފައިވަނީ މޯލްޑިވްސް އިމިގްރޭޝަން އިން ރާއްޖޭގައި ހުރުމަށް ދޫކޮށްފައިވާ ހުއްދައިގެ ޝަރުތުތަކާއި ޚިލާފުވުމުންނެވެ. އަބޫހަނީފް ވަނީ ރާއްޖޭގައި ބޮޑެތި ކުށްތައްކޮށް ތަފާތު ވިޔަފާރިތައް ކޮށްފަ އެވެ. އިމިގްރޭޝަނުން ކުރި ޓްވީޓެއްގައި ވަނީ އޭނާ ޑީޕޯޓު ކޮށްލާފައިވަނީ ހުކުރު ދުވަހުގެ ރޭ އެއާރޕޯޓުގައި ހިފެއްޓުމަށްފަހު ނޯޓިސްއަކާއި ނުލައި، ހުއްދަ ބާތިލު ކުރުމަށް ފަހު ކަމަށެވެ.
މިހާރުވެސް ރާއްޖޭގައި ލައްކަ އަކަށް ވުރެ ގިނަ ބިދޭސީން އުޅޭކަމަށް އިމިގްރޭޝަންގެ ތަފާސް ހިސާބުތަށް ދައްކާއިރު، އޭގެތެރެއިން 63،000 އަށް ވުރެ ގިނަ ބިދޭސީންނަކީ ގަވާއިދާއި ޚިލާފަށް އުޅޭ ބިދޭސީންނެވެ.
