ޓެރެރިޒަމް މަނާކުރުމުގެ ބިލަކީ ނުރައްކަލުގެ ރަނގަބީލެއް ނޫން: ޝަމީމް
15 ސެޕްޓެމްބަރު 2019 | އާދީއްތަ 02:33ޓެރެރިޒަމަށް ވާނީ މަޤްސަދާއި އަމަލާއި ގުޅިގެންކަމަށް ވިދާޅުވި
ކުރީގެ ޑެޕިއުޓީ ޕްރޮސެކިއުޓަރ ޖެނެރަލް ހުސައިން ޝަމީމް
ޓެރެރިޒަމް މަނާކުރުމުގެ ބިލަކީ ނުރައްކަލުގެ ރަންގަބީލެއް ނޫން ކަމަށް ކުރީގެ ކުރީގެ ޑެޕިއުޓީ ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޓެރެރިޒަމް މަނާކުރުމުގެ ބިލަކީ ނުރައްކަލުގެ ރަނަގބީލެއް ކަމަށް ކުރީގެ ރައީސް އަބްދުﷲ ޔާމީން ވިދާޅުވުމާއި ގުޅިގެން ހޮނިހިރު ދުވަހުގެ ރޭ ރާއްޖެޓީވީގެ "ފަލަ ސުރުޚީ" ޕްރޮގްރާމްގައި ވާހަކަ ދައްކަވަމުން ޝަމީމް ވިދާޅުވީ ކުރީގައި އަމަލު ކުރަމުން ދިޔަ ޤާނޫނުގައި އެންމެ ބޮޑަށް އުނދަގޫވި މާއްދާ އަކީ އޭގެ ތަޢާރަފް ކަމަށާއި އެ ތަޢާރަފް އޮތްލެއް ފުޅާކަމުން ރައީސް ޔާމީންގެ ވެރިކަމުގައި ފުލުސް އޮފީހުގައި ތިއްބެވި ބޭފުޅުންނަށް ޤާނޫނު ނަހަމަ ގޮތުގައި ބޭނުން ކުރުމުގެ ފުރުސަތު ލިބިގެން ދިޔަ ކަމަށެވެ.
މި ތަޢާރަފް މިހާރު ވަނީ ހަނި ކުރެވިފައި ކަމަށާއި މިހާރު އޮތް ގޮތުން ހަމައެކަނި އަމަލެއް ޓެރެރިޒަމަށް ނުފެތޭނެ ކަމަށާއި ޓެރެރިޒަމަށް ފެތުމަށްޓަކައި މަގްސަދެއް އޮންނަން ޖެހޭ ކަމަށާއި ޓެރެރިޒަމަށް ވާނީ މަޤްސަދާއި އަމަލާއި ގުޅިގެންކ ަމަށް ޝަމީމް ވިދާޅުވިއެވެ.
މީގެ އިތުރުން މިހާރު އޮންނަ ޔަގީން ކަމަކީ ފުލުސް އޮފީހުން ކޮންމެ ސަކަރާތެއް ޖެހިކަމުގައި ވިޔަސް އެކަން ބަލާނެ މުއައްސަސާތައް ހުރުން ކަމަށާއި އެކަން ބަލާނެ މުއްސަސާތަކުން އެކަން ނުކޮށްފިނަމަ ރައްޔިތުންގެ މަޖިލީހުން އެކަން ބައްލަވާނެ ކަމަށް އޭނާ ވިދާޅުވިއެވެ. ޝަމީމް އިތުރަށް ވިދާޅުވީ ސްޕުރީމް ކޯޓަށް ވެސް ރަނގަޅު ބޭފުޅުން އައްޔަންކުރަމުންދާ ކަމަށާއި އެހެންކަމުން ސްޕްރީމް ކޯޓާއި ހިސާބުންވެސް ކަންކަން ބެލޭނެ ނިޒާމް ޤާއިމްވާނެ ކަމަށް ޝަމީމް ވިދާޅުވިއެވެ.
މާގިނަ ދުވަހެއް ނުވެ ހުރިހާ ނިޒާމްތަކެއް ޤާއިމްވެ ހަމަޖެހޭނެ ކަމަށާއި ހަމަޖެހެންވާއިރަށް ބާރުތައް ފުލުހުންނަށް ލިބިފައި އޮތަސް އެއީ މާބޮޑު މައްސަލައަކަށް ވާނެ ދެކިވަޑައިނުގަންނަވާ ކަމަށް ޝަމީމް ވިދާޅުވިއެވެ.
