އޭއެފްސީ 16 އަހަރުން ދަށުގެ ކޮލިފައިންގައި ބައިވެރިވުމަށް ގައުމީ 16 އަހަރުން ދަށުގެ ފިރިހެން ފުޓުބޯޅަ ޓީމު އިރާނަށް ފުރައިފިއެވެ.

2020 ވަނަ އަހަރު އޮންނަ އޭއެފްސީ މުބާރާތުގެ ކޮލިފައިންގައި ރާއްޖެ ހިމެނެނީ ގްރޫޕް ސީގައެވެ. މި ގްރޫޕްގައި ހިމެނެނީ ރާއްޖޭގެ އިތުރުން އިރާން އާއި އަފްއާނިސްތާން އަދި ފަލަސްތީނެވެ.

ގްރޫޕްގައި ރާއްޖެ ފުރަތަމަ ނިކުންނާނީ މި މަހުގެ 18 ވަނަ ދުވަހު އިރާނާ ދެކޮޅަށެވެ. ދެވަނަ މެޗުގައި މި މަހުގެ 20 ވަނަ ދުވަހު އަފްއާނިސްތާނާ ދެކޮޅަށް ނިކުންނައިރު، ފަހު މެޗުގައި ފަލަސްތީނާ ދެކޮޅަށް ނިކުންނާނީ މި މަހުގެ 22 ވަނަ ދުވަހުއެވެ.

ކޮލިފައިންގައި ހިމެނޭ ގްރޫޕްގެ އެއްވަނަ ހޯދާ ޓީމަކަށް 2020 ވަނަ އަހަރުގެ އޭއެފްސީ 16 އަހަރުން ދަށުގެ މުބާރާތުން ޖާގަ ލިބޭއިރު، ދެވަނައަށް ދާޓީމަށްވެސް ވަކި އުސޫލެއްގެ ތެރެއިން ފުރުސަތު ލިބެއެވެ.

މި މަހުގެ 18 އިން 22 އަށް ކުރިޔަށްދާ ކޮލިފައިންގައި ރާއްޖޭގެ ޓީމަށް އިރުޝާދު ދޭނީ ތަޖުރިބާކާރު ކޯޗު މުހައްމަދު ނިޒާމް (ނިޒާމްބެ) އެވެ. އޭނާގެ އިރުޝާދުގެ ދަށުން ޒުވާޏް ޓީމު ވަނީ ދާދި ފަހުން ގަތަރުގައި ބޭއްވި 4 ނޭޝަންސް ކަޕްގައި ވާދަކޮށްފައެވެ.